ဘန်ကောက်၊ သြဂုတ် ၄
ကမ္ဘောဒီးယားနဲ့ နယ်စပ်တိုက်ပွဲတွေ ဖြစ်ပွားပြီးနောက် စစ်တပ်ကို ထောက်ခံတဲ့အနေနဲ့ ထိုင်းနိုင်ငံ မြို့တော် ဘန်ကောက်မြို့မှာ ဆန္ဒပြသူတွေက တရားရုံးကနေ ရာထူးဆိုင်းငံ့ထားတဲ့ ဝန်ကြီးချုပ် ပေသွန်ထန် ရှင်နာဝါထရာ ရာထူးကနေ နုတ်ထွက်ပေးဖို့ တောင်းဆိုခဲ့ကြပါတယ်။
အပူချိန် မြင့်တက်နေပေမယ့် ဘန်ကောက်မြို့ အောင်ပွဲအထိမ်းအမှတ် နေရာမှာ စုဝေးရောက်ရှိလာတဲ့ ဆန္ဒပြသူတွေက မျိုးချစ်သီချင်းတွေ သီဆိုပြီး ပေသွန်ထန်နဲ့ သူ့ရဲ့ ဖခင် ဝန်ကြီးချုပ်ဟောင်း သက်ဆင်ကို ရှုတ်ချတဲ့ မိန့်ခွန်းတွေကို နားထောင်ခဲ့ကြပါတယ်။
ထိုင်းမှာ အာဏာချုပ်ကိုင်ထားတာ ကြာပြီဖြစ်တဲ့ စစ်တပ်ကိုထောက်ခံကြောင်းလည်း ဆန္ဒပြသူတွေက ပြောဆိုခဲ့ကြတာပါ။
သြဂုတ် ၂ ရက် ဆန္ဒပြပွဲမှာ လူပေါင်း ၂၀၀၀ ပါဝင်တယ်လို့ ရဲတပ်ဖွဲ့က ပြောကြားပြီး အပူချိန်လျော့ကျသွားချိန်မှာ လူပိုများလာနိုင်တယ်လို့ ခန့်မှန်းထားပါတယ်။
ဆယ်စုနှစ် များစွာ ရှိလာခဲ့တဲ့ နယ်စပ်အငြင်းပွားမှုကြောင့် ဖြစ်ပေါ်လာတဲ့ တိုက်ပွဲတွေကို ပေသွန်ထန်နဲ့ သူ့ရဲ့ မိသားစုက ဖြစ်ပွားခွင့် ပေးခဲ့တာ ဖြစ်တယ်လို့ ဆန္ဒပြသူတွေက ပြောဆိုနေကြပါတယ်။
ကမ္ဘောဒီးယားဝန်ကြီးချုပ်ဟောင်း ဟွန်ဆန်နဲ့ ဖုန်းပြောဆိုမှု ပေါက်ကြားခဲ့ပြီး ထိုင်းပြည်သူ အများကို ဒေါသထွက်စေခဲ့တဲ့ ပေသွန်ထန်ကိုဝန်ကြီးချုပ် ရာထူးကနေ တရားရုံးက ပြီးခဲ့တဲ့လက ဆိုင်းငံ့ခဲ့ပါတယ်။
ဝန်ကြီးချုပ်ဟောင်း ဟွန်ဆန်ကို ပေသွန်ထန်က ဦးလေးလို့ ခေါ်ဝေါ်ခဲ့ပြီး ထိုင်းစစ်ဦးစီးချုပ်ကို အပြစ်တင် ပြောဆိုခဲ့တာကြောင့် ထိုင်းနိုင်ငံသားတွေ ဒေါသထွက်ခဲ့ကြတာ ဖြစ်ပါတယ်။
နယ်စပ် တိုက်ပွဲတွေဟာ မလေးရှားရဲ့ ကြားဝင် ဖြေရှင်းပေးမှုနဲ့ ဇူလိုင် ၂၉ ရက်မှာ အဆုံးသတ်ခဲ့ပြီး လူသုံးဒါဇင်ကျော် သေဆုံးခဲ့သလို လူပေါင်း သိန်းချီ ထွက်ပြေးခဲ့ရပါတယ်။
၂၀၀၆ စစ်တပ် အာဏာသိမ်းမှုအတွင်း ဖြုတ်ချခံခဲ့ရတဲ့ သက်ဆင်ရဲ့ ရန်သူ ရှပ်ဝါခေါ် နန်းတော် ထောက်ခံသူ ရှေးရိုးစွဲ အများအပြား ဆန္ဒပြပွဲမှာ ပါဝင်ခဲ့ကြတယ်လို့ ဆိုပါတယ်။
သက်ဆင်ရဲ့ ညီမ ယင်လတ်ဟာလည်း ရှပ်ဝါတွေရဲ့ ဆန္ဒပြမှုကြောင့် ၂၀၁၄ ခုနှစ်မှာပြုတ်ကျခဲ့ပြီး စစ်တပ်က အာဏာသိမ်းခဲ့တာ ဖြစ်ပါတယ်။
ထိုင်းစစ်တပ်ဟာ နိုင်ငံရေးမှာ ကြီးမားတဲ့ အခန်းကဏ္ဍကနေ ဝင်ပါနေပြီး ၁၉၃၂ ခုနှစ်မှာ စည်းမျဉ်းခံဘုရင်စနစ် စတင် ကျင့်သုံးပြီး နောက်ပိုင်း အောင်မြင်တဲ့ အာဏာသိမ်းမှု ၁၃ ကြိမ် ပြုလုပ်ခဲ့တာဖြစ်ပါတယ်။
Ref:AP