မော်လမြိုင် ၊ ဇူလိုင် ၁၃
မွန်ပြည်နယ်မှာ အခုနောက်ပိုင်း ခိုးဆိုးလုယက်မှုတွေ ဆက်တိုက်ဖြစ်ပွားနေပေမယ့် စစ်ကောင်စီဘက်က ရှာဖွေဖော်ထုတ် အရေးယူနိုင်မှု မရှိသလောက် နည်းပါးနေတယ်လို့ ဒေသခံတွေက သံလွင်တိုင်းမ်ကို ပြောပါယ်။
ခိုးဆိုးလုယက်သူတွေဟာ မိုးရွာသွန်းမှုကို အခွင့်ကောင်းယူပြီး ညဘက်အပြင် နေ့ဘက်တွေမှာပါ ဆိုင်ကယ် ခိုးယူတာ၊ နေအိမ်အတွင်း ဝင်ရောက်ပြီး ငွေသားအပါအဝင် တန်ဖိုးရှိ ပစ္စည်း ခိုးယူတာအပြင် ဖုန်းတွေကအစ လိုက်လံခိုးယူနေတာပါ။
ခိုးဆိုးလုယက်ခံရမှုအပေါ် စစ်ကောင်စီ ရဲတပ်ဖွဲ့ဝင်ထံ တိုင်ကြားပါကလည်း သူတို့ရဲ့ လုံခြုံရေးအကြောင်းပြချက်နဲ့ ဖြစ်စဉ်တိုင်ချက်သာ ဖွင့်ထားပြီး လိုက်လံရှာဖွေ ဖမ်းဆီးပေးတာ မရှိဘူးလို့ ဆိုကြပါတယ်။
မွန်ပြည်နယ် ဒေသခံ တစ်ဦးက ခိုးမှုကျူးလွန်သူတွေဟာ အခုနောက်ပိုင်း မိုးလေကြီးတာကို အခွင့် ကောင်းယူပြီး နေအိမ်တွေပေါ်အထိတက်ကာ လိုက်လံခိုးယူနေတယ်လို့ ပြောပါတယ်။
“မိုးလေကြီးတော့ လင်မယားနှစ်ယောက်တည်း အိပ်နေတဲ့ အိမ်မှာ အိမ်ပေါ်တက်ပြီးတော့ ပိုက်ဆံအိတ် တွေရော အလုပ်လုပ်ထားတဲ့ ပိုက်ဆံ ထည့်ထားတဲ့ ခြင်းရော ထမင်းပေါင်းအိုးတွေရော နောက်မီးပူတွေ ဆိုင်ကယ်တွေ အိမ်ထဲဝင်ခိုးသွားတော့ သူတို့ အိမ်ရှင်တွေ မနိုးဘူး။ အိမ်ပေါ်ကို ဖောက်ထွင်းပြီး ခိုးဝင်တဲ့ လူတွေကလည်း လူကို အန္တရာယ် ပြုနိုင်တဲ့ ဓါးတို့ တုတ်တို့ ပါတာပေါ့နော်။ သူခိုးတွေက သောင်းကျန်းယုံမကဘူး။ အတင့်ရဲနေတယ်” လို့ ဆိုပါတယ်။
ဒါ့အပြင် ခိုးယူသူတွေဟာ စစ်ကောင်စီက ထုတ်ပြန်ထားတဲ့ ညမထွက်ရ အချိန်တွေမှာ ခိုးယူမှု အများဆုံး ပြုလုပ်နေတာ ဖြစ်ပြီး အုပ်စုအလိုက် ခိုးယူတာ ဖြစ်တဲ့အတွက် အသက်အန္တရာယ်ပါ ရှိလာတယ်လို့ သူက ဆက်ပြောပါတယ်။
ပစ္စည်း ခိုးယူခံရတဲ့ မွန်ပြည်နယ် ဒေသခံ တစ်ဦးကလည်း ခိုးယူသူတွေဟာ မိုးရာသီကာလမှာ ပိုအတင့်ရဲလာပြီး ခြံတွေထဲအထိ ဝင်ရောက်ခိုးယူနေတဲ့အတွက် ပစ္စည်းပျောက်ဆုံးမှုတွေ များလာတယ်လို့ ပြောပါတယ်။
“အခုကတွေ့တာ အကုန်ခိုးတော့တာပဲ။ မိုးရွာလို့ ခြံထဲမှာ ကားထည့်ထားတာ။ ကားအပေါ်မှာ ရှိတဲ့ ပစ္စည်း အကုန်ခိုးသွားတာ။ တကယ့်တန်ဖိုးကြီးတဲ့ ပစ္စည်းတွေ အဲဒီလိုမျိုးတွေ အခိုးများတယ်။ ခိုးပြီးရင်တော့ ပြန်ရတာ မရှိဘူး၊ တိုင်လည်း ပြန်မှမရဘဲ တော်တော်များတယ်။အခုဒီ မိုးရာသီကာလမှာ မိုးရွာတဲ့ အချိန်ဆို ပိုတောင် ဆိုးသေးတယ်”လို့ ဆိုပါတယ်။
ခိုးဆိုးလုယက်သူတွေဟာ အုပ်စုဖွဲ့ ကျူးလွန်နေတာကြောင့် ခိုးယူခံရလို့ သိရင်တောင် အသက်အန္တ ရာယ် စိုးရိမ်ရတဲ့အတွက် ပြန်မတုံ့ပြန် နိုင်တဲ့ အခြေအနေဖြစ်နေပြီး ဒေသတွင်းမှာ တရားဥပဒေ စိုးမိုးမှု ကင်းမဲ့လာတဲ့ ပုံစံ ဖြစ်လာတယ်လို့ သူက ဆက်ပြောပါတယ်။
တဖက်မှာတော့ စစ်ကောင်စီဟာ တော်လှန်ရေးအင်အားစုတွေ ဝင်ရောက်လာမှု မရှိစေဖို့အတွက်ဆိုကာ မြို့ဝင်၊ မြို့ထွက်တွေမှာ တင်းတင်းကျပ်ကျပ် စစ်ဆေးတာ၊ မြို့တွင်းမှာလည်း ပိတ်ဆို့ ရှာဖွေတာတွေကို နေ့စဉ် လုပ်ဆောင် နေတာပါ။
ဒါ့အပြင် မြို့တွင်းမှာလည်း လမ်းဆုံ၊ လမ်းခွတွေ၊ လမ်းသွယ်တွေနဲ့ မီးပ္ပိုင့်တွေ မှာပါ နေရာ အနှံ့ CCTV ကင်မရာတွေ အပြည့် တပ်ဆင် ထားပြီး စောင့်ကြည့်တာအပြင် ဧည့်စာရင်းတွေကအစ စစ် ဆေးတာတွေ ပြုလုပ်နေပေမယ့် ခိုးဆိုးလုယက်ခံရပါက ကိုယ်ဖြစ်ကိုယ်ခံ အခြေအနေ ဖြစ်နေရတယ်လို့ ဒေသခံတွေက ပြောကြပါတယ်။
သတင်း – သံလွင်တိုင်းမ်
ဓာတ်ပုံ-Social Media