ဂျေရုစလင်၊ ဇူလိုင် ၁၁
အီရန်က မိမိတို့ကို ခြိမ်းခြောက်လာရင် ထပ်မံ တိုက်ခိုက်သွားမှာ ဖြစ်ကြောင်း အစ္စရေး ကာကွယ်ရေးဝန်ကြီး အစ္စရေး ကာ့ဇ်က ဇူလိုင် ၁၀ ရက်မှာ ပြောကြားလိုက်ပါတယ်။
“တီဟီရန်၊ တာဘရဇ်၊ အစ္စဖာဟန်နဲ့ အစ္စရေးကို အန္တရာယ်ပေးဖို့ ဒါမှမဟုတ် ခြိမ်းခြောက်ဖို့ ခင်ဗျားတို့ ဘယ်နေရာကပဲ ကြိုးစားကြိုးစား အစ္စရေးရဲ့ ရှည်လျားတဲ့ လက်တံက ခင်ဗျားတို့ဆီ ရောက်လာမှာပဲ” လို့ ဝန်ကြီး အစ္စရေး ကာ့ဇ်က လေတပ်သင်တန်းဆင်းပွဲ အခမ်းအနား တစ်ခုမှာ ပြောကြားခဲ့တာပါ။
ကျွန်တော်တို့ ပြန်လာရမယ်ဆိုရင် ပိုကြီးမားတဲ့ အင်အားနဲ့ ပြန်လာမှာပါလို့ သူက ပြောပါတယ်။
ပြီးခဲ့တဲ့ ဇွန်လအတွင်း အစ္စရေးက အီရန်ကို ၁၂ ရက်ကြာ တိုက်ခိုက်ခဲ့တာကြောင့် ပိုကျယ်ပြန့်တဲ့ ဒေသဆိုင်ရာ စစ်ပွဲ တစ်ပွဲ ဖြစ်လာနိုင်တယ်ဆိုတဲ့ စိုးရိမ်မှုတွေ ထွက်ပေါ်ခဲ့ပါတယ်။
ရန်လို တိုက်ခိုက်မှု အဆုံးသတ်ရေး ဇူလိုင် ၂၃ ရက်မှာ သမ္မတ ဒေါ်နယ် ထရန့် ကြေညာခဲ့တဲ့ အမေရိကန် ကြားဝင်ညှိနှိုင်းပေးခဲ့တဲ့ အပစ်အခတ်ရပ်စဲရေးနဲ့ နှစ်ဖက် သဘောတူခဲ့ကြပါတယ်။
အီရန်ဟာ နျူကလီးယားလက်နက် ထုတ်လုပ်နိုင်စွမ်း ရရှိခါနီးနေပြီဆိုတဲ့ အကြောင်းပြချက်နဲ့ အစ္စရေးက အီရန်ရဲ့ နျူကလီးယား တည်နေရာတွေကို တိုက်ခိုက်ခဲ့တာပါ။
အီရန်က မိမိတို့ရဲ့ နျူကလီးယား စီမံကိန်းဟာ ငြိမ်းချမ်းရေး သက်သက် အတွက် ဖြစ်တယ်လို့ ပြောကြားပြီး နျူကလီးယား လက်နက် ထုတ်လုပ်ဖို့ ကြိုးပမ်းနေတယ်ဆိုတဲ့ စွပ်စွဲချက်တွေကို ငြင်းဆိုထားပါတယ်။
အဲဒီ စစ်ပွဲမှာ အမေရိကန်လည်း ဝင်ပါခဲ့ပြီး အီရန် နျူကလီးယားစက်ရုံတွေကို ဘန်ကာဖျက်ဗုံးတွေ သုံးပြီး တိုက်ခိုက်ခဲ့ပါတယ်။
ဒါပေမဲ့ အမေရိကန်ရဲ့ တိုက်ခိုက်မှုအပြီး အီရန် နျူကလီးယားစက်ရုံ တည်နေရာတွေမှာ ရေဒီယို သတ္တိကြွမှုတွေ မတွေ့ရဘူးလို့ ပညာရှင်တွေက ပြောပါတယ်။
အီရန်ဟာ သူတို့ရဲ့ သန့်စင်ပြီးသား ယူရေနီယံတွေကို အမေရိကန်ရဲ့ တိုက်ခိုက်မှု မတိုင်ခင် တခြားနေရာသို့ ပြောင်းရွှေ့ထားပြီး ဖြစ်တယ်ဆိုတဲ့ ပြောဆိုမှုတွေလည်း ထွက်ပေါ်ခဲ့ပါတယ်။
အီရန်အနေနဲ့ သူတို့ရဲ့ နျူကလီးယား စီမံကိန်းကို မကြာခင် ပြန်စတင်နိုင်တယ်ဆိုတဲ့ ခန့်မှန်း ပြောဆိုမှုတွေလည်း ထွက်ပေါ်နေပေမယ့် ဒေါ်နယ်ထရန့်က ပယ်ချပြီး တီဟီရန်ရဲ့ နျူကလီးယား စက်ရုံတွေကို အပြီးတိုင် ရှင်းလင်း ဖျက်ဆီးနိုင်ခဲ့တယ်လို့ ပြောထားပါတယ်။
Ref:Reuters