NDF ပါတီ၏ ဗဟိုဦးစီးကော်မတီအစည်းအဝေးအတည်ပြုသည့် ဖက်ဒရယ်ပြည်ထောင်စုနှင့်ပတ်သက်သည့် စာတမ်း သမ္မတနှင့် နိုင်ငံတော်အတိုင်ပင်ခံထံပေးပို့

ရန်ကုန်၊ ဇူလိုင် ၁၆

ရန်ကုန်မြို့ YWCA ခန်းမ၌ ပြုလုပ်ခဲ့သော အမျိုးသားဒီမိုကရေစီအင်အားစု NDF ပါတီ၏ ဗဟိုဦးစီး ကော်မတီညီလာခံတွင်၂၁ ရာစုပင်လုံညီလာခံ၌ဆွေးနွေးရန်အကြံပြုချက်အဖြစ် ကျွနု်ပ်တို့ မျှော်မှန်းသော ဖက်ဒရယ်ပြည်ထောင်စုအမည်ဖြင့်စာတမ်းတစ်စောင်ကိုအတည်ခဲ့ပြီး သမ္မတနှင့် နိုင်ငံတော်အတိုင်ပင်ခံပုဂ္ဂိုလ် တို့ထံ ပေးပို့ထားကြောင်းသိရသည်။

“ကျွန်တော်တို့ပါတီအနေနဲ့ ၂၁ရာစုပင်လုံညီလာခံကိုတက်ခွင့်ရသည်ဖြစ်စေ။ မရသည်ဖြစ်စေ ဒီအကြံ ပြုချက်စာတမ်းကို ထည့်သွင်းဆွေးနွေးပေးဖို့ နိုင်ငံတော်သမ္မတနဲ့ နိုင်ငံတော်အတိုင်ပင်ခံပုဂ္ဂိုလ်တွေဆီကို ပေးပို့ထားပြီးပါပြီ”ဟု NDF ပါတီ၏ ဗဟိုအလုပ်အမှုဆောင်ကော်မတီဥက္ကဌ ဦးခင်မောင်ဆွေက သံလွင်တိုင်းမ် သို့ပြောသည်။

NDF ပါတီ၏ ကျွန်ပ်တို့မျှော်မှန်းသော ဖက်ဒရယ်ပြည်ထောင်စု စာတမ်းတွင် ဖက်ဒရယ်ပြည်ထောင်စု တည်ဆောက်နိုင်ရန်အဓိကအားဖြင့်လိုအပ်သော ၁။ မည်သို့သောဖက်ဒရယ်စနစ်လဲ၊ ၂။လုပ်ပိုင်ခွင့်အာဏာကို မည်ကဲ့သို့ခွဲဝေကျင့်သုံးကြမည်ဟူသည့်အချက်နှစ်ချက်ကိုအဓိကထား၍တင်ပြထားသည်ကိုတွေ့ရသည်။

ပြည်နယ်နှင့်တိုင်းများသတ်မှတ်ခြင်း(Federal Unit) လုပ်ပိုင်ခွင့်အာဏာကိုခွဲေ၀ ကျင့်သုံးခြင်း (Distribution Of Power)ကြွင်းကျန်သောအာဏာ(Residual Power)တို့နှင့်ပတ်သက်သော ရှင်းလင်းချက်များကိုလည်းထိုစာတမ်း၌တွေ့ရသည်။ထို့အပြင်ဖက်ဒရယ်ပြည်ထောင်စုအဖြစ်ဖွဲ့စည်းရေးအတွက်ကဏ္ဍ အသီးသီးတွင် ထည့်သွင်းစဉ်းစားရန်အဆိုပြုချက်များအဖြစ် နိုင်ငံရေးကဏ္ဍ၊ စီးပွားရေး(အခွန်နှင့်ပြည်သူ့ ဘဏ္ဍာခွဲဝေမှု )ကဏ္ဍ၊ သယံဇာတထုတ်ယူရေးနှင့်ပတ်ဝန်းကျင်ထိမ်းသိမ်းရေးကဏ္ဍ၊ နိုင်ငံတော်ကာကွယ် ရေးနှင့်လုံခြုံကဏ္ဍများအားရှုထောင့်မျိုးစုံဖြင့်ယင်းစာတမ်း၌ဖေါ်ပြထားသည်၊

NDF ပါတီ၏ ကျွန်ုပ်တို့မျှော်မှန်းသောဖက်ဒရယ်ပြည်ထောင်စုစာတမ်းတွင် ဖက်ဒရယ်စနစ်ကျင့်သုံးမည် ဆိုပါက အုပ်ချုပ်မှု၊ဥပဒေပြုမှု၊နှင့်အခြားလုပ်ငန်းစဉ်များတွင်တိုင်းရင်းသားလူမျိုးစုများ၏အခန်းကဏ္ဍ များပါဝင် လာမည်ဖြစ်၍လွှတ်တော်သုံးရပ်၌တိုင်းရင်းသားလူမျိုုးစုကိုယ်စားလှယ်များပိုမိုကျယ်ပြန့်စွာပါဝငိနိုင်အောင် PR စနစ်ကျင့်သုံးရေးကိုအရေးကြီးသည့်အချက်အဖြစ်ထောက်ပြထားသည်။

အမျိုးသားဒီမိုကရေစီအင်အားစု NDF ပါတီသည် ၂၀၁၅အထွေထွေရွေးကောက်ပွဲတွင် ပြည်နယ်/ တိုင်း၁၁ ခု၌ မြို့နယ်ပေါင်း ၉၅ခုလွှတ်တော်ကိုယ်စားလှယ်၂၆၅ ဦးဝင်ရောက်အရွေးချယ်ခံခဲ့ပြီး မွန်ပြည်နယ်တွင် အမတ်နေရာ ၁၅ခုဝင်ရောက်ယှဉ်ပြိုင်အရွေးချယ်ခံခဲ့သော်လည်း အောင်မြင်မှုမရခဲ့ကြောင်းသိရသည်။

သတင်း – ဝရဇိန် ပေါင်