ရေတံခွန်အပျော်ခရီးမှပြန်လာသော ဆိုင်ကယ်စီးလူငယ်(၂)ဦး ကားတိုက်မှုကြောင့် သေဆုံး

ပေါင်၊ ဇွန် ၂၈

ဇင်းကျိုက်ရေတံခွန်သို့လာရောက်လည်ပတ်ခဲ့ပြီး သထုံမြို့သို့ပြန်သည့် လူငယ်နှစ်ဦးစီးလာသောဆိုင်ကယ်တစ်စီးမှာ မျက်နှာချင်းဆိုင်မှလာသည့်ကားတစ်စီးကိုတိုက်မိခဲ့၍ ကားကြိတ်ခံရပြီး နေရာ၌ပင်နှစ်ဦးစလုံးသေဆုံးခဲ့မှု ပေါင်မြို့ကတွန်ကျေးရွာတွင် ဇွန်လ၂၈ရက်နေ့ မွန်းလွဲပိုင်းက ဖြစ်ပွားခဲ့ကြောင်း သိရသည်။

ဇင်းကျိုက်ရေတံခွန်မှ သထုံမြို့သို့ပြန်ခဲ့စဉ် ဆိုင်ကယ်ကို ရဲကျော်မင်း အသက်၂၀နှစ်မောင်းနှင်လာပြီး နောက်တွင် မောင်စံဝင်း အသက်(၂၀)နှစ်ထိုင်၍ လိုက်ပါလာသည့် နံပတ်ပြားမပါ Hondor Wave 100ခဲရောင်ဆိုင်ကယ်မှာ ရန်ကုန်မော်လမြိုင်ကားလမ်းအတိုင်းမောင်းလာစဉ်ကတွန်ကျေးရွာရှိ မိုင်တိုင်အမှတ် ၁၆၄/၂အနီး အလက ကတွန်ကျောင်းမျက်နှာစာရှေ့သို့အရောက်တွင်လမ်းကွေ့အနေအထားဖြစ်နေ၍အရှိန်မထိန်းနိုင်ပဲမျက်နှာချင်းဆိုင်မှယာဉ်ကြောအတိုင်း ယာဉ်မောင်းအောင်ဝင်းခိုင်မောင်းလာသော 3E/5781 “ကန်တာ”အမျိုး အစားအဖြူရောင်ကားကိုတိုက်မိခဲ့ပြီးကားအောက်သို့ ရောက်ရှိကြိတ်မိခဲ့သည်။

ထိုသို့ကြိတ်မိပြီးဆိုင်ကယ်မောင်းသူမောင်ရဲကျော်မင်းနှင့်နောက်ကထိုင်လာသူမောင်စံဝင်းတို့နှစ်ဦးလုံး ဦးခေါင်းကွဲ၍ ခြေလက်များကျိုးသည့်အနေအထားများဖြင့် သေဆုံးခဲ့သည်။

“ကျွန်တော်ရောက်လာတော့ကားရှေ့ဘီးအောက်မှာကြိတ်ထားတဲ့လူတစ်ယောက်၊လမ်းမပေါ်မှာဆိုင်ကယ်ဘေးမှာတစ်ယောက်သေနေကြပြီ၊ရဲကိုအကြောင်းကြားပေးလိုက်တယ်၊ဆိုင်ကယ်သမားကသူများလမ်းကြောင်းထဲရောက်သွားတာပါ၊ရေတံခွန်ကပြန်လာတဲ့ကောင်လေးတွေလို့တော့သိရပါတယ်” ဟုကတွန်ကျေးရွာ အုပ်ချုပ်ရေးမှုးဦးငွေစိုးက ၎င်းသိသမျှ ကိုပြောဆိုခဲ့သည်။

သေဆုံးသူ (၂)ဦးစလုံးမှာ သထုံမြို့၊ ဘင်လိုင်ရပ်ကွက်မှ ကရင်လူမျိုး အသက်၂၀အရွယ်လူငယ်များဖြစ်ကြောင်း၎င်းတို့၏မိသားစုများကိုပေါင်ဆေးရုံ၌တွေ့ဆုံမေးမြန်းသိရသည်။

အမှုဖြစ်စဉ်နှင့်ပတ်သက်ပြီး ဆိုင်ကယ်မောင်းလာသူဖြစ်သည့် ရဲကျော်မင်း (ဘ) ဦးနန်းတိ ဘင်လိုင်ရပ်သထုံ မြို့နယ်နေသူကို ရဲအုပ်တင့်လွင်ကတရား လိုပြုလုပ်တိုင်တန်းချက်အရ ပေါင်ရဲစခန်း၏ယာဉ်(ပ) ၄၂ /၂၀၁၆ ပြစ်မှုပုဒ်မ ၃၀၄(က)အရအမှုဖွင့်အရေးယူစစ်ဆေးနေသည်။

သတင်း – ဝရဇိန် (ပေါင်)