မြန်မာကျားဖြန့်ဂိုဏ်း မြီ မိသားစုဝင် ၁၁ ဦးကို တရုတ် ကွပ်မျက်

ဘေဂျင်း၊ ဇန်နဝါရီ ၂၉

မြန်မာနိုင်ငံရဲ့ အရှေ့မြောက် နယ်စပ်တလျှောက်မှာ ကျားဖြန့် အွန်လိုင်းငွေလိမ်လုပ်ငန်းတွေ လုပ်ကိုင်ခဲ့တဲ့ နာမည်ဆိုးနဲ့ ကျော်ကြားတဲ့ မာဖီးယား မိသားစုဝင် ၁၁ ဦးကို တရုတ်က ကွပ်မျက်လိုက်ကြောင်း နိုင်ငံပိုင် မီဒီယာက ဖော်ပြပါတယ်။

ကွပ်မျက်ခံရတဲ့ မြီ မိသားစုဝင်တွေဟာ လူသတ်မှု၊ တရားမဝင် ဖမ်းဆီးထိန်းသိမ်းမှု၊ လိမ်လည်မှု၊ လောင်းကစားလုပ်ငန်း လုပ်ကိုင်မှုတို့ အပါအဝင် ရာဇဝတ်မှု အမျိုးမျိုးနဲ့ ပြီးခဲ့တဲ့နှစ် စက်တင်ဘာလက တရုတ်မှာ ရုံးတင် စစ်ဆေးခံခဲ့ရတာပါ။

မြီ မိသားစုဟာ လောက်ကိုင်မြို့ကို ကာစီနိုလုပ်ငန်း စုရပ် ပြည့်တန်ဆာလုပ်ငန်း စုရပ်အဖြစ် ပြောင်းလဲ ပစ်ခဲ့တဲ့ မျိုးနွယ်စုတွေထဲက တစ်စု ဖြစ်ပါတယ်။

သူတို့ရဲ့ အွန်လိုင်းငွေလိမ်လုပ်ငန်းတွေ ၂၀၂၃ ခုနှစ်မှာ နှိမ်နှင်းခံရပြီး မြန်မာ တိုင်းရင်းသား လက်နက်ကိုင်တွေက သူတို့ကို ဖမ်းဆီးပြီးတော့ တရုတ်ဆီ လွှဲအပ်ခဲ့တာ ဖြစ်ပါတယ်။

အဲဒီလို ကွပ်မျက် သတ်ဖြတ်မှုတွေနဲ့အတူ ဘေဂျင်းအစိုးရက အွန်လိုင်း လိမ်လည်မှုလုပ်ငန်း လုပ်ကိုင်မယ့် လူတွေကို သတိပေးလိုက်တာ ဖြစ်ပါတယ်။

ဒါပေမဲ့ အခုအချိန်မှာ ကျားဖြန့် လုပ်ငန်းတွေဟာ မြန်မာ-ထိုင်း နယ်စပ်နဲ့ တရုတ်ရဲ့ သြဇာ လွှမ်းမိုးမှု အများကြီး နည်းတဲ့ ကမ္ဘောဒီးယားနဲ့ လာအိုသို့ ပြောင်းရွှေ့သွားကြပြီ ဖြစ်ပါတယ်။

မြန်မာနိုင်ငံနဲ့ အရှေ့တောင်အာရှရှိ ကျားဖြန့်လုပ်ငန်းတွေမှာ အဓမ္မ အလုပ်စေခိုင်းဖို့ နိုင်ငံခြားသား ထောင်ပေါင်းများစွာကို ပြန်ပေးဆွဲ ခေါ်ယူမှုတွေ ရှိနေပါတယ်။

တရုတ်နိုင်ငံသား အများစု လုပ်ကိုင်နေတဲ့ ကျားဖြန့်လုပ်ငန်းတွေက တရုတ်နိုင်ငံသားတွေကို အဓိက လိမ်လည်နေတာ ဖြစ်ပြီး နှစ်စဉ် ဒေါ်လာ ဘီလီယံနဲ့ချီ ရရှိနေတာ ဖြစ်ပါတယ်။

မြီ မိသားစုဝင် ၁၁ ဦးဟာ တရုတ်က ကွပ်မျက် သတ်ဖြတ်တဲ့ ပထမဆုံး မြန်မာ ကျားဖြန့်လုပ်ငန်း ဦးစီး ဦးဆောင်သူတွေ ဖြစ်ပါတယ်။

သူတို့ ကျူးလွန်ခဲ့တဲ့ ရာဇဝတ်မှုတွေကြောင့် တရုတ်နိုင်ငံသား ၁၄ ဦး သေဆုံးခဲ့ရပြီး တခြား ရာပေါင်းများစွာ ထိခိုက်ဒဏ်ရာရရှိခဲ့ကြောင်း တရုတ် တရားရုံးက ပြောပါတယ်။

စက်တင်ဘာလက တခြား မြီ မိသားစုဝင်တွေကို ထောင်ဒဏ် ၅ နှစ်ကနေ တစ်သက်တစ်ကျွန်းအထိ တရုတ် တရားရုံးက ချမှတ်ခဲ့ပြီး ဖြစ်ပါတယ်။

မျိုးနွယ်စု ခေါင်းဆောင် မင်ရွှေကျန်းကတော့ ဖမ်းဆီးခံရမယ့် အရေးကို ရှောင်ရှားရင်း ကိုယ့်ကိုယ်ကို သတ်သေသွားတယ်လို့ ဆိုပါတယ်။

ကနဦးမှာ သူတို့ မိသားစုဟာ လောင်းကစားနဲ့ ပြည့်တန်ဆာ လုပ်ငန်းတွေကနေ အဓိက ဝင်ငွေ ရရှိခဲ့ပေမယ့် နောက်ပိုင်းမှား ကျားဖြန့်လုပ်ငန်းတွေကိုပါ လုပ်ကိုင်လာကြတာ ဖြစ်ပါတယ်။

Ref:BBC