ဘီးလင်း၊ ဒီဇင်ဘာ ၃
မွန်ပြည်နယ် ဘီးလင်းမြို့နယ် သစ်တိုကျွန်းကျေးရွာမှာ ကြံ့ခိုင်ရေးပါတီ စည်းရုံးရေးဆင်းချိန် လုံခြုံ ရေးလိုက်ပေးတဲ့ ပြည်သူ့စစ်တွေက စားသောက်ဆိုင်တွေမှာ ငွေမပေးဘဲ သေနတ်ပြစားသောက်မှုတွေကြောင့် ဆိုင်ရှင်တွေ နစ်နာခဲ့ရတယ်လို့ ဒေသခံတွေက သံလွင်တိုင်းမ်ကို ပြောပါတယ်။
နိုဝင်ဘာ ၃၀ ရက်နေ့နဲ့ ဒီဇင်ဘာ ၁ ရက်နေ့တို့မှာ ဘီးလင်းမြို့နယ် ကြံ့ခိုင်ရေးပါတီ ကိုယ်စားလှယ်လောင်းတွေ သစ်တိုကျွန်းနဲ့အနီးအနားကျေးရွာတွေကို မဲဆွယ်စည်းရုံးမှုဆင်းခဲ့ရာ လုံခြုံရေးလိုက်ပါလာတဲ့ ပြည်သူ့စစ်တွေက လက်ဖက်ရည်ဆိုင်နဲ့ စားသောက်ဆိုင်တွေမှာ ငွေမပေးဘဲ စားသောက်ခဲ့ကြတယ်လို့ ဆိုပါတယ်။
ဖြစ်စဉ်ကို မျက်မြင်ကြုံတွေ့ခံရတဲ့ ဒေသခံတွေရဲ့ ပြောပြချက်အရ ပြည်သူ့စစ်အဖွဲ့တွေရဲ့ စားသောက်မှုအပေါ် ဆိုင်တစ်ဆိုင်က ငွေကြေးတောင်းခံမှုကြောင့် သေနတ်ပြ ခြိမ်းခြောက်ခဲ့တဲ့အတွက် အချေအတင် ဖြစ်ခဲ့တယ်လို့ သိရပါတာယ်။
အဲဒီဖြစ်စဉ်တွေအတွင်း ပြည်သူ့စစ်အဖွဲ့တွေဟာ လက်နက်ပြ ခြိမ်းခြောက်ပြီး ငွေမပေးဘဲ စားသောက်ခဲ့တဲ့ ဆိုင် ၅ ဆိုင်အထိရှိခဲ့ပြီး တစ်ဆိုင်ကို ငွေကျပ် ၃၀၀၀၀ ကနေ ၅၀၀၀၀ ကျပ်ထိ နစ်နာခဲ့ရတယ်လို့ သိရပါတယ်။
အခုလို စားသောက်ဆိုင်တွေမှာ ငွေမပေးဘဲစားသောက်တဲ့သူတွေဟာ ကိုယ်စားလှယ်လောင်းတွေနဲ့ပါတီဝင်တွေမပါဘဲ ပြည်သူ့စစ်အဖွဲ့ဝင်တွေသာ ဖြစ်တယ်လို့ ဆိုပါတယ်။
ပြည်သူ့စစ်အဖွဲ့တွေရဲ့ ပြည်သူတွေအပေါ် သေနတ်နဲ့ခြိမ်းခြောက်မှုတွေကို ထိရောက်စွာ အရေးယူပေးဖို့ ဒေသခံတွေနဲ့ ဆိုင်ရှင်တွေက တောင်းဆိုတာတွေ ရှိနေပါတယ်။
ဘီးလင်းမြို့နယ်မှာ ပြည်သူ့စစ်အင်အား ၃၀၀ ကျော်ရှိပြီး စစ်ဆေးရေးဂိတ်တွေမှာ စစ်ကော်မရှင်တပ်သားတွေနဲ့အတူ ကင်းစောင့်တာ၊ ငွေတောင်းတာနဲ့ လှည့်ကင်းလုံခြုံရေးတွေမှာပါ လိုက်ပါလုပ်ဆောင်နေကြတယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ-Social Media