မော်လမြိုင်၊ ဩဂုတ် ၃၀
မွန်ပြည်နယ်မှာ အာဏာသိမ်း စစ်ကော်မရှင်ရဲ့ပြည်သူ့စစ်တပ်ဖွဲ့ဝင်တွေအပါအဝင် ပြည်သူ့လုံခြုံရေးနှင့်အကြမ်းဖက်နှိမ်နှင်းရေးအဖွဲ့ဝင်တွေဟာ အခုနောက်ပိုင်းမှာ ဒေသတွင်းမှာ ထင်တိုင်းကြဲနေ တယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကော်မရှင် လက်အောက်ခံ လုံခြုံရေးအဖွဲ့ဝင်တွေဟာ အင်အား အများအပြားနဲ့ ရပ်ကွက်နဲ့ ကျေးရွာတွေအတွင်း မူးယစ် ရမ်းကားတာ၊ ဒေသခံတွေကို အနိုင်ကျင့် ဗိုလ်ကျတာအပြင် မူးယစ်ဆေးဝါးသုံးစွဲ ရောင်းချတာတွေကအစ ပြုလုပ်နေတာပါ။
ဒါ့အပြင် ဒေသတွင်းက လူငယ်တွေကိုလည်း သူတို့ အဖွဲ့ထဲ ဝင်ပါက စစ်မှုမထမ်းရသလို ရှေ့တန်းသွားစရာမလိုဘဲ ရပ်ကွက်နဲ့ ကျေးရွာတွေမှာပဲ နေထိုင်ရမှာ ဖြစ်သလို မူးယစ်ဆေးဝါးအပါအဝင် ကြိုက်တာလုပ်ခွင့်ပြုမယ့်ဆိုပြီး စည်းရုံး သိမ်းသွင်းတာတွေ ရှိနေတာ ဖြစ်ပါတယ်။
ဒေသခံ လူငယ် တစ်ဦးကတော့ စစ်ကော်မရှင်ရဲ့ လုံခြုံရေးအဖွဲ့ဝင်တွေဟာ အခုနောက်ပိုင်း ဒေသတွင်းမှာ တော်တော်ဆိုး နေသလို လူငယ်တွေကိုလည်း မထင်ရင်မထင်သလို ဖမ်းဆီးတာတွေ ရှိနေတယ်လို့ ပြောပါတယ်။
“ပြည်သူ့စစ်လား ဘာလားတော့ မသိဘူး။ ဝတ်စုံပြာနဲ့ တော်တော်ဆိုးဆိုးပဲ။အခုဟာက ဒီဘက်မှာကျတော့ ပြည်သူစစ် သက်သက်လည်း မသွားဘူး။သွားလို့ရှိရင် အဲဒီအပြာရောင် ဝတ်စုံနဲ့ ရဲနဲ့ အဲလိုမျိုးတွေ သွားကြတာ အဖွဲ့လိုက်ပေါ့။ မီးပွိုင့်တို့ ဘာတို့မှာ ဖမ်းတယ်။ ကားနဲ့သွားလို့ ရှိရင် လမ်းမှာတွေ့လို့ ရှိရင် ခေါ်စစ်တယ် မေးတယ်။ မြန်းတယ်။ဟိုစစ် ဒီစစ်ပေါ့ဗျာ။ အခန့်မသင့်ရင် တခါတည်း ခေါ်သွားတာတွေ ရှိတယ်”လို့ ဆိုပါတယ်။
စစ်ကော်မရှင်ရဲ့ လုံခြုံရေးအဖွဲ့ဝင်တွေ ဖမ်းဆီးခံရသူတွေထဲမှာတော့ စစ်ကော်မရှင်နဲ့ နီးစပ်သူတွေ၊ ရပ်ကျေး အုပ်ချုပ်ရေး အဖွဲ့နဲ့ နီးစပ်သူတွေကိုတော့ ငွေကြေးတောင်းခံပြီး ပြန်လွှတ်ပေးတာ ရှိပေမယ့် တခြားသူတွေကတော့ သတင်း အစအန မရဘဲ ပျောက်ဆုံးတာတွေ ရှိနေပါတယ်။
ဒေသခံ နောက်တစ်ဦးကလည်း စစ်ကော်မရှင်ရဲ့ လုံခြုံရေးအဖွဲ့ဝင်တွေဟာ စစ်ကော်မရှင်က ထုတ်ပြန်ထားတဲ့ ဥပဒေတွေထက် ကျော်လွန်လုပ်ကိုင်နေတာကြောင့် လူမှုစီးပွားဘဝတွေမှာပါ ဒုက္ခ ရောက်နေရတယ်လို့ ပြောပါတယ်။
“စစ်ကော်မရှင် လက်သပ်မွေးထားတဲ့ အဖွဲ့အစည်းတွေက သူထုတ်တဲ့ ဥပဒေက နည်းနည်းထုတ်ရင် သူတို့က များများလုပ်တယ်။ လုပ်တဲ့အခါကျတော့ ကျွန်တော်တို့ ပြည်သူက လူမှုစီးပွားဘာမှကို လုပ်လို့ မရတော့တဲ့ အဆင့်ပဲ။ မနေ့က ကျွန်တော်တို့ မနက် ၆ နာရီခွဲ လမ်းသွားလမ်းလာဘာညာပေါ့။ အကုန်လုံး ဆိုင်ကယ်အကုန် ဖမ်းတယ်။ ဒီနေ့ ဆိုရင် မနက် ၄ နာရီ ထဖမ်းတယ်။ အဲဒီတော့ လူမှုစီးပွားရဲ့ ဒုက္ခကတော့ ဒီရွေးကောက်ပွဲ မလုပ်ခင် စပ်ကြားတောင် ဒီလောက် ဒုက္ခရောက်နေတယ် ဆိုတော့ လုပ်ခါနီးဆို ပိုဆိုးမှာပေါ့” လို့ ဆိုပါတယ်။
ဒေသတွင်းမှာ စစ်ကော်မရှင်က ခန့်ထားတဲ့ ပြည်သူ့စစ်အဖွဲ့ဝင်နဲ့ ပြည်သူ့လုံခြုံရေးနှင့် အကြမ်းဖက်နှိမ်နင်ရေးအဖွဲ့ဝင် အများစုဟာ ရပ်ကွက်နဲ့ကျေးရွာအတွင်းက ဆိုးသွမ်းသူတွေ၊ မူးယစ်ရမ်းကားသူတွေအပြင် မူးယစ်ဆေးဝါး ရောင်းဝယ်သုံးစွဲသူတွေကအစ ပါဝင်နေတာပါ။
အခုလို ဆိုးသွမ်းရမ်းကားသူတွေကို ပြည်သူ့လုံခြုံရေးအတွက်ဆိုတဲ့ ခေါင်းစဉ်နဲ့ ခန့်ထားပြီး ထင်တိုင်းကြဲနေတာကြောင့် ပြည်သူတွေမှာ လုံခြုံမှုမရှိတဲ့အပြင် သူတို့ ရှိတဲ့နေရာတွေကို ဖြတ်သန်း သွားလာဖို့တောင် စိုးရိမ်ရတဲ့ အခြေအနေ ဖြစ်နေရတယ်လို့ ဒေသခံတွေက ဆိုကြပါတယ်။
မွန်ပြည်နယ်မှာတော့ စစ်ကော်မရှင်က ခန့်ထားတဲ့ ပြည်သူ့စစ်အဖွဲ့ဝင်နဲ့ ပြည်သူ့လုံခြုံရေးနှင့် အကြမ်းဖက်နှိမ်နင်ရေး အဖွဲ့ဝင်တွေဟာ ဒေသတွင်းမှာ ပိတ်ဆို့ ရှာဖွေ စစ်ဆေးတာ၊ ဂိတ်တွေမှာ ကင်းစောင့်တာ၊ ဧည့်စာရင်းစစ်ဆေးတာအပြင် အခမ်းအနားပွဲတွေမှာ လုံခြုံရေးယူတာတွေကို လုပ်ဆောင်နေတာ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ