မော်လမြိုင်၊ ဩဂုတ် ၃
မွန်ပြည်နယ် မော်လမြိုင်မြို့အခြေစိုက် အရှေ့တောင်တိုင်းစစ်ဌာနချုပ် ဒုတိုင်းမှူး ဗိုလ်မှူးချုပ် ဇော်မင်းအောင်အပါအဝင် ဌာနဆိုင်ရာ ဝန်ထမ်း ၁၅ ဦး ဖမ်းဆီးစစ်ဆေးခံနေရတယ်လို့ စစ်ကောင်စီနဲ့နီးစပ်သူတွေက သံလွင်တိုင်းမ်ကို ပြောပါတယ်။
တရားမဝင်ကုန်ပစ္စည်းတွေကို လာဘ်ငွေယူကာ လွှတ်ပေးတယ်ဆိုတဲ့ အကြောင်းပြချက်နဲ့ ဒုတိုင်းမှူးအပါအဝင်ဌာနဆိုင်ရာ ဝန်ထမ်းတွေကို နေပြည်တော်ဗဟိုအဖွဲ့ကနေ လာရောက်စစ်ဆေးနေတာလို့ ဆိုပါတယ်။
ဖမ်းဆီးစစ်ဆေးခံရသူတွေထဲမှာ ဒုတိုင်းမှူး၊ ကရင်ပြည်နယ် အကောက်ခွန်ဦးစီးမှူး၊ ကရင်ပြည်နယ် စစ်ဖက်ဆိုင်ရာ လုံခြုံရေး တပ်ဖွဲ့၊ ဒုစရိုက်နှိမ်နင်းရေးရဲတပ်ဖွဲ့ ၊ သတင်းရဲ တပ်ဖွဲ့နဲ့ အကောက်ခွန်ဦး စီးဌာနက ဝန်ထမ်းတွေလည်း ပါဝင်ပါတယ်။
ဖမ်းဆီးစစ်ဆေးခံရတဲ့သူ အများစုဟာ မွန်ပြည်နယ်နဲ့ကရင်ပြည်နယ်ကို ဆက်သွယ်ထးတဲ့ ဘားအံ-သံလွင်တံတားဂိတ်မှာ တာဝန်ကျတဲ့ ဝန်ထမ်းတွေနဲ့ အဲဒီဂိတ်ကို အဓိက ကြီးကြပ်ရတဲ့ တာဝန်ရှိသူတွေ ဖြစ်ပါတယ်။
ဒုတိုင်းမှူး ဗိုလ်မှူးချုပ် ဇော်မင်းအောင် ဖမ်းဆီးစစ်ဆေးခံနေရာကြောင့် သူရဲ့နေရာမှာ မွန်ပြည်နယ် သံဖြူဇရပ်မြို့နယ် အမှတ်(၄) တန်းမြင့်လေ့ကျင့်ရေးကျောင်းက ကျောင်းအုပ်ကြီး ဗိုလ်မှူးကြီး ဗညာဝင်းကို ယာယီခန့်အပ်ထားတယ်လို့ သိရပါတယ်။
ရတခ ဒုတိုင်းမှူးအပါအဝင် ဌာနဆိုင်ရာ ဝန်ထမ်းတွေ ဖမ်းဆီးခံရတာဟာ ပြီးခဲ့တဲ့ ဇူလိုင် ၃၀ ရက်နေ့က ပြုလုပ်တဲ့ တရားမဝင် ကုန်သွယ်မှု တိုက်ဖျက်ရေး ဦးဆောင်ကော်မတီ လုပ်ငန်း ညှိနှိုင်း အစည်း အဝေးမှာ ဒုစစ်ခေါင်းဆောင်က တရားမဝင် ကုန်သွယ်မှုမှာပါဝင်တဲ့ ဝန်ထမ်းတွေကို ပြင်းပြင်း ထန်ထန် အရေးယူ သွားမယ်လို့ ပြောဆိုပြီးနောက် အခုလို ဖမ်းဆီး စစ်ဆေးခံရတာ ဖြစ်တယ်လို့ ဆိုပါတယ်။
ပြီးခဲ့တဲ့ ဇူလိုင်လအတွင်း ကရင်ပြည်နယ်ကနေ မွန်ပြည်နယ်ထဲ ဝင်ရောက်လာတဲ့ ထိုင်းကုန်ပစ္စည်း သယ်ဆောင်တဲ့ ကုန်တင်ကားရာနဲ့ချီ ဖမ်းဆီးခံခဲ့ရပြီး အဲဒီထဲမှာ တရားမဝင် ကုန်ပစ္စည်းတင်တဲ့ ကားတွေ သိမ်းဆည်းခံထားရတာ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-Social Media