ကျောက်ဖြူ ၊ ဩဂုတ် ၃
စစ်ကော်မရှင်ရဲ့ အမျိုးသားကာကွယ်ရေးနဲ့ လုံခြုံရေးကောင်စီက ရခိုင်ပြည်နယ်ရှိ မြို့နယ် ၁၄ ခုကို အရေးပေါ်အခြေအနေကြေညာပြီး စစ်အုပ်ချုပ်ရေးအမိန့်ကျင့်သုံးမှုအပေါ် လိုအပ်သလို တုံ့ပြန်သွားမယ်လို့ အာရက္ခတပ်တော် AA ပြောခွင့်ရ ဦးခိုင်သုခက သံလွင်တိုင်းမ်ကို ပြောပါတယ်။
ဇူလိုင် ၃၁ ရက်နေ့က တိုင်းဒေသကြီးနဲ့ ပြည်နယ် ၉ ခုမှာရှိတဲ့ ၆၃ မြို့နယ်ကို အရေးပေါ်အခြေအနေကြေညာပြီး စစ်အုပ်ချုပ်ရေးအမိန့် ကျင့်သုံးဖို့ အမျိုးသားကာကွယ်ရေးနဲ့ လုံခြုံရေးကောင်စီက ကြေညာပြီး တပ်မတော်ကာကွယ်ရေးဦးစီးချုပ်ကို အပ်နှင်းခဲ့တာပါ။
စစ်အုပ်ချုပ်ရေးအဖြစ် ကြေညာထားတဲ့ ဒေသတွေထဲမှာ ရခိုင်ပြည်နယ်က အာရက္ခတပ်တော် AA ထိန်းချုပ်ထားတဲ့ မြို့နယ်တွေအားလုံး ပါဝင်သလို ချင်းပြည်နယ်က ပလက်ဝမြို့လည်း ပါဝင်ပါတယ်။ဒါ့အပြင် ကျန်တိုင်းဒေသကြီးနဲ့ ပြည်နယ် ၇ ခုက မြို့နယ်တွေလည်း ထည့်သွင်းထားတဲ့အတွက် စုစုပေါင်း ၆၃ မြို့နယ်ဖြစ်ပါတယ်။
အဲဒီမြို့နယ်တွေဟာ စစ်တပ်က အပြည့်အဝ မထိန်းချုပ်နိုင်တဲ့ ဒေသတွေ ပါဝင်သလို သက်ဆိုင်ရာ ဒေသတွင်းတိုင်းရင်းသားလက်နက်ကိုင်အဖွဲ့အစည်းတွေနဲ့ တော်လှန်ရေးအင်အားစုတွေ အလုံးစုံ ထိန်းချုပ်ထားတဲ့ ဒေသတွေလည်း အများဆုံး ပါဝင်နေပါတယ်။
အာရက္ခတပ်တော် AA ပြောခွင့်ရ ဦးခိုင်သုခက စစ်ကောင်စီ မထိန်းချုပ်နိုင်တော့တဲ့ နေရာတွေကို စစ်အုပ်ချုပ်ရေးကြေညာတာဟာ သူတို့ရဲ့ ဂုဏ်သိက္ခာမဲ့မှုကို ဖော်ပြနေပြီး ပြည်သူတွေအပေါ် ခြိမ်းခြောက်မှုမှန်သမျှကို စောင့်ကြည့်နေတယ်လို့ ပြောပါတယ်။
လောလောဆယ်မှာ ရခိုင်ပြည်နယ်ရှိ မြို့တော် စစ်တွေနဲ့ သံတွဲမြို့နယ်တို့ကိုသာ စစ်ကော်မရှင်က ထိန်းချုပ်ထားနိုင်တာပါ။ တရုတ်စီမံကိန်းတွေ အများအပြားရှိတဲ့ ကျောက်ဖြူမြို့နယ်က နေရာအများစုကိုတော့ AA က ထိန်းချုပ်ထားနိုင်တာဖြစ်လို့ တန်ပြန်ထိုးစစ်တွေ လုပ်ဖို့ အင်အားဖြည့်တင်းနိုင်တယ်လို့ ဒေသတွင်း သတင်းတွေက ဖော်ပြကြပါတယ်။
အမျိုးသားကာကွယ်ရေးနဲ့ လုံခြုံရေးကောင်စီကတော့ လက်နက်ကိုင်အကြမ်းဖက်တိုက်ခိုက်မှုတွေ ချုပ်ငြိမ်းရေးနဲ့ နယ်မြေဒေသတည်ငြိမ်ရေး တရားဥပဒေစိုးမိုးရေးတို့ကို ထိရောက်စွာလုပ်ဆောင်နိုင်ဖို့ အကြောင်းပြထားပြီး ရက်ပေါင်း ၉၀ အထိ သတ်မှတ်ထားတာပါ။
ဒါကြောင့် တပ်မတော်ကာကွယ်ရေးဦးစီးချုပ်ရုံးက စစ်အုပ်ချုပ်ရေးအဖြစ် ကြေညာခံထားရတဲ့ မြို့နယ်တွေမှာ စစ်အုပ်ချုပ်ရေးအာဏာကို သက်ဆိုင်ရာတိုင်းစစ်ဌာနချုပ်၊ စစ်တိုင်းမှူးတွေကို အပ်နှင်းလိုက်တယ်လို့ ဇူလိုင် ၃၁ ရက်နေ့မှာ ထုတ်ပြန်ခဲ့ပါတယ်။
တစ်ဘက်မှာ စစ်ကော်မရှင်လို့ခေါ်တဲ့ အဖွဲ့ဝင် ၁၀ ဦးပါတဲ့ နိုင်ငံတော်လုံခြုံရေးနဲ့ အေးချမ်းသာယာရေးကော်မရှင်ကို ဖွဲ့စည်းပြီး ယာယီသမ္မတအဖြစ် တာဝန်ယူထားတဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပဲ ဥက္ကဌအဖြစ် တည်ရှိနေတာပါ။
အဲဒီ စစ်ကော်မရှင်ဟာ နိုင်ငံတော်ကာကွယ်ရေး လုံခြုံရေးနဲ့ အေးချမ်းသာယာရေးအပါအဝင် ရွေးကောက်ပွဲအောင်မြင်စွာ ကျင်းပနိုင်ရေးအတွက် လိုအပ်တဲ့ လမ်းညွှန်မှုတွေနဲ့ ပေါင်းစပ်ညှိနှိုင်းလုပ်ဆောင်နိုင်ဖို့ ဖွဲ့စည်းတာလို့ ဆိုပါတယ်။
ဦးခိုင်သုခကတော့ စစ်ယူနီဖောင်း တဝက် အရပ်ဝတ်တဝက် လဲဝတ်လိုက်ရုံနဲ့ စစ်တပ်ရဲ့ ရက်စက်တဲ့ မူဝါဒတွေ ဘာမှပြောင်းလဲသွားမှာ မဟုတ်ဘူးလို့ မှတ်ချက်ပြုပါတယ်။
လက်ရှိမှာတော့ စစ်တပ်ဟာ နိုင်ငံကို အရေးပေါ်အခြေအနေကနေ ပယ်ဖျက်ပြီး ဥပဒေပြုရေး၊ အုပ်ချုပ်ရေးနဲ့ တရားစီရင်ရေး အာဏာတွေကို အမျိုးသားကာကွယ်ရေးနဲ့လုံခြုံရေးကောင်စီထံ ပြန်လည်လွှဲအပ်ထားတာပါ။
လာမယ့် ဒီဇင်ဘာ တတိယပတ်ကနေ နောက်နှစ် ဇန်နဝါရီ ဒုတိယပတ်အတွင်း မြို့နယ် ၂၆၀ ကျော်မှာ အထွေထွေရွေးကောက်ပွဲတွေကို အီလက်ထရောနစ်မဲပေးစက်တွေ သုံးပြီး အပိုင်းလိုက်ကျင်းပသွားမယ်လို့ စစ်ကော်မရှင်က ထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ-AA