မိတ္တီလာ၊ ဇူလိုင် ၁၂
လာမယ့် နှစ်ကုန်ပိုင်းနဲ့နှစ်ဆန်းပိုင်းအတွင်း အပိုင်းလိုက် ကျင်းပမယ့် ရွေးကောက်ပွဲမှာ နိုင်ငံတကာကနေ လေ့လာရေးအဖွဲ့တွေကို ဖိတ်ခေါ်သွားမယ်လို့ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင် လှိုင်က ပြောပါတယ်။
ဇူလိုင် ၁၀ ရက်နေ့က မန္တလေးတိုင်း မိတ္ထီလာခရိုင်အတွင်းရှိ ခရိုင်၊ မြို့နယ်အဆင့် ဌာနဆိုင်ရာတာ ဝန်ရှိသူတွေ၊ မြို့မိမြို့ဖတွေနဲ့ MSME လုပ်ငန်းရှင်တွေကို မိတ္ထီလာမြို့မှာ တွေ့ဆုံစဉ် ထည့်သွင်းပြောဆိုခဲ့တာပါ။
ရွေးကောက်ပွဲကျင်းပချိန်မှာ နိုင်ငံတကာက လေ့လာရေးအဖွဲ့တွေကို ဖိတ်ခေါ်သွားမှာဖြစ်ကာ တချို့နိုင်ငံတွေက လာရောက်ဖို့ သဘောတူပြီးဖြစ်တယ်လို့ စစ်ခေါင်းဆောင်က ပြောပါတယ်။
ဒါပေမယ့် ဘယ်နိုင်ငံတွေကို ဖိတ်ခေါ်သွားမယ် ဘယ်နိုင်ငံတွေက လာရောက်ဖို့ သဘောတူထားတယ်ဆိုတာကိုတော့ ပြောမသွားခဲ့ပါဘူး။
တရုတ်၊ ရုရှားနဲ့ ဘယ်လာရုစ်နိုင်ငံတွေကတော့ စစ်ကောင်စီ ကျင်းပမယ့် ရွေးကောက်ပွဲကို အသိ အမှတ်ပြု အားပေးထောက်ခံနေပြီး လိုအပ်တဲ့ အကူအညီတွေလည်း ပေးသွားဖို့ ရှိနေသလို လေ့ လာရေးအဖွဲ့တွေကိုလည်း စေလွှတ်သွားမယ်လို့ ထုတ်ပြောထားတာပါ။
လက်ရှိမှာတော့ စစ်အာဏာရှင်စနစ်ဆန့်ကျင်ရေး တိုက်ပွဲတွေ ဆက်ရှိနေပြီး စစ်ခေါင်းဆောင်က တော့ အခုနှစ်ကုန်ပိုင်းမှာ လွတ်လပ်ပြီး တရားမျှတတဲ့ ပါတီစုံဒီမိုကရေစီ အထွေထွေရွေးကောက်ပွဲကို ကျင်းပပြုလုပ်သွားမယ်လို့ ဆိုပါတယ်။
ဆန္ဒမဲပေးခွင့်ရှိတဲ့ မဲဆန္ဒရှင်ပြည်သူတွေအားလုံး ဆန္ဒမဲပေးနိုင်ရေး ကြိုတင်ပြင်ဆင်ခြင်း လုပ်ငန်းတွေကို လုပ်ဆောင်နေပြီး လွတ်လပ်တရားမျှတတဲ့ ရွေးကောက်ပွဲဖြစ်စေရေး၊ မဲစာရင်းတွေ မှား ယွင်းမှုမရှိစေရေး၊ မဲမသမာမှု မဖြစ်စေရေးတို့အတွက် စနစ်တကျ ကြိုတင်ပြင်ဆင်နေတယ်လို့ ပြောပါတယ်။
ဒီအတွက် ရွေးကောက်ပွဲ အောင်မြင်စွာကျင်းပနိုင်ရေး မိတ္ထီလာခရိုင်အနေနဲ့လည်း ပူးပေါင်းပါဝင်ကြစေလိုတယ်လို့ စစ်ခေါင်းဆောင်က မြို့ခံတွေနဲ့ တွေ့ဆုံချိန်မှာ တိုက်တွန်းပြောဆိုထားတာပါ။
အီလက်ထရောနစ် မဲပေးစက်ကို အသုံးပြုပြီး ကျင်းပမယ့် အထွေထွေရွေးကောက်ပွဲကို ပြည်သူလူ ထုက စိတ်ဝင်စားမှု အလွန်အားနည်းနေပြီး တော်လှန်ရေးအင်အားစုတွေကတော့ ဆန့်ကျင်တိုက်ဖျက်သွားမယ်လို့ ထုတ်ပြောထားကြပါတယ်။
သတင်း – သံလွင်တိုင်းမ်
ဓာတ်ပုံ-MOI