ကော့ကရိတ်၊ ဇူလိုင် ၁၂
ကရင်ပြည်နယ် ကော့ကရိတ်-ကျုံဒိုးလမ်းပိုင်းကို ပြန်လည်ထိန်းချုပ်နိုင်ဖို့အတွက် အခုလ ဇူလိုင်လအစောပိုင်းရက်တွေမှာ စစ်ကောင်စီတပ်က စစ်ကြောင်းထပ်မံထိုးလာတဲ့အတွက် KNLA တော် လှန်ရေးပူးပေါင်းတပ်တို့နဲ့ ထိတွေ့တိုက်ပွဲတွေ နေ့စဉ်ဖြစ်ပွားလျက်ရှိနေတယ်လို့ နယ်မြေခံသတင်းရင်း မြစ်တွေက သံလွင်တိုင်းမ်ကို ပြောပါတယ်။
ကော့ကရိတ်မြို့အခြေစိုက် စစ်ကောင်စီတပ်ရဲ့ စကခ ၁၂ ဌာနချုပ်ကနေ ထွက်လာတဲ့ စစ်ကြောင်းတစ် ကြောင်းနဲ့ ကျုံဒိုးမြို့အခြေစိုက် ခမရ ၅၄၆ တပ်ရင်းဌာနချုပ်ကနေ ထွက်လာတဲ့ စစ်ကောင်စီတပ်စစ်ကြောင်း ၂ ကြောင်းတို့ဟာ ဇူလိုင်လအစောပိုင်းရက်တွေမှာ ထိုးစစ်ဆင်လာတာကြောင့် ထိတွေ့တိုက်ပွဲတွေ နေ့စဉ်ဆို သလို ဖြစ်ပွားနေတာပါ။
ကရင်အမျိုးသားလွတ်မြောက်ရေးတပ်မတော် KNLA ဦးဆောင်တဲ့ တော်လှန်ရေးပူးပေါင်းတပ်တွေ စိုးမိုးထိန်းချုပ်ထားတဲ့ ကော့ကရိတ်-ကျုံဒိုးလမ်းပိုင်းနေရာတွေအားလုံးကို စစ်ကောင်စီတပ်က အ ပြည့်အ၀ ပြန်လည်စိုးမိုးထိန်းချုပ်သိမ်းပိုက်နိုင်ဖို့အတွက် လက်နက်ကြီးပစ်ကူအသုံးပြုပြီး ထိုးစစ်ဆင်တိုက်ခိုက်လာခဲ့ရာ နှစ်ဖက်တိုက် ပွဲအပြင်းအထန် ဖြစ်ပွားနေတာဖြစ်ပါတယ်။
ကျုံဒိုး-ကော့ကရိတ်လမ်းပိုင်း တိုက်ပွဲအတွင်း စစ်ကောင်စီတပ်ဘက်က သေဆုံးထိခိုက်ဒဏ်ရာရရှိမှု များပြားခဲ့သလို KNLA ဦးဆောင်တဲ့ တော်လှန်ရေးပူးပေါင်းတပ်တွေဘက်ကလည်း ထိခိုက်ကျ ဆုံးမှုအချို့ ရှိခဲ့ပြီး စစ်ကောင်စီတပ်ဟာ ကျုံဒိုး-ကော့ကရိတ်လမ်းပိုင်းကို ပြန်လည်သိမ်းယူနိုင်ဖို့ စစ်ကြောင်းထိုးစစ်ဆင်လာတာဟာ ၃ ကြိမ်ရှိပြီဖြစ်ပါတယ်။
ကော့ကရိတ်-ကျုံဒိုးလမ်းပိုင်းမှာ စစ်ကောင်စီတပ်နဲ့ လက်တွဲပူးပေါင်းနေရာယူထားတဲ့ ဗိုလ်ဘိဦးဆောင်တဲ့ ခွဲထွက် DKBA တပ်ဖွဲ့လည်းရှိနေပြီး ကျုံဒိုးမြို့နေတစ်ဆင့် စစ်ကြောင်းထိုးလာတဲ့ စစ်ကောင်စီတပ်စစ်ကြောင်းနဲ့အတူ ဗိုလ်ဘိရဲ့ ခွဲထွက် DKBA တပ်ဖွဲ့ဝင်တွေလည်း ပူးပေါင်းပါဝင်တိုက် ခိုက်နေတယ်လို့ နယ်မြေခံသတင်းရင်းမြစ်တွေက ဆိုပါတယ်။
ဗိုလ်ဘိဦးဆောင်တဲ့ ခွဲထွက် DKBA တပ်ဖွဲ့ဟာ အခုလက်ရှိမှာ KNU တပ်မဟာ ၁ နယ်မြေ ဘားအံမြို့နယ် ကြာအင်းပေါ်တော်မူဒေသဘက်မှာ အခြေစိုက်တပ်စွဲနေထိုင်ပြီး KNU တပ်မဟာ ၁ လက် အောက်ခံ တပ်ရင်း ၁ နဲ့လည်း ထိတွေ့ပစ်ခတ်မှုတွေ မကြာခဏဖြစ်ပွားလျက်ရှိနေတာဖြစ်ပါတယ်။
ဗိုလ်ဘိဦးဆောင်တဲ့ ခွဲထွက် DKBA တပ်ဖွဲ့ဟာ ဘားအံမြို့နယ် ကြာအင်းပေါ်တော်မူဒေသဘက်မှာ အခြေချပြီး အဲဒီဒေသအတွင်းမှာ နယ်မြေချဲ့ထွင်တာတွေ၊ ဂိတ်စခန်းတိုးချဲ့ဆောက်လုပ်တာတွေအပြင် တပ်အင်အားသစ် စုဆောင်းတာတွေ လုပ်ဆောင်နေပြီး စစ်ကောင်စီတပ်က စစ်လက်နက်ခဲယမ်းတွေကို ပံ့ပိုးထောက်ပံ့ပေးနေခဲ့တာဖြစ်ပါတယ်။
၃ လတာကြာမြင့်လာတဲ့ ကော့ကရိတ်-ကျုံဒိုးတိုက်ပွဲဟာ ဒီကနေ့အချိန်အထိ ဆက်လက်ပြင်းထန်ဆဲဖြစ်ပြီး တိုက်ပွဲကြောင့် လနဲ့ချီကြာ ထွက်ပြေးတိမ်းရှောင်နေခဲ့ရတဲ့ ဒေသခံပြည်သူတွေအများစုဟာ စစ်ကောင်စီတပ်ရဲ့ လက်နက်ကြီးနဲ့ လေကြောင်းရန်တွေကြောင့် နေရပ်ကို မပြန်နိုင်သေးပဲ အခြားဒေသတွေမှာ ဆက်လက်နေထိုင်နေရဆဲပဲဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ