ဝါရှင်တန်၊ ဧပြီ ၃

အမေရိကန် ကာကွယ်ရေးဝန်ကြီး ပိတ်ချ် ဟက်ဆက်ချ်က အရှေ့အလယ်ပိုင်းမှာ တိုက်လေယာဉ်တွေ ထပ်မံ ချထားလိုက်ပြီး စစ်အင်အားကို တိုးမြှင့်ထားကြောင်း ပင်တဂွန်က ဧပြီ ၂ ရက်မှာ ပြောကြားလိုက်ပါတယ်။

အီရန်နိုင်ငံနဲ့တင်းမာမှုတွေ မြင့်တက်နေပြီး ယီမင်မှာ အမေရိကန်က ဗုံးကြဲ တိုက်ခိုက်မှုတွေ လုပ်ဆောင်နေတာ သီတင်းနှစ်ပတ်ကျော်လာတဲ့ အချိန် အရှေ့အလယ်ပိုင်းမှာရှိတဲ့ အမေရိကန် စစ်အင်အားကို တိုးမြှင့်ချထားလိုက်တာ ဖြစ်ပါတယ်။

ဘယ်လို တိုက်လေယာဉ် အမျိုးအစားတွေချထားသလဲနဲ့ ဘယ်နေရာ အတိအကျသို့ ချထားသလဲ ဆိုတာကို ပင်တဂွန်ရဲ့ ကြေညာချက်မှာ ဖော်ပြထားတာ မတွေ့ရပါဘူး။

ဒါပေမဲ့ ပြီးခဲ့တဲ့ သီတင်းပတ်မှာ B-2 ဗုံးကြဲ လေယာဉ် ၆ စီးကို အိန္ဒိယ သမုဒ္ဒရာထဲက ဒီယေးဂို ဂါစီယာကျွန်းသို့ ပြောင်းရွှေ့ချထားခဲ့တယ်လို့ အမည်မဖော်လိုတဲ့ အမေရိကန်အရာရှိ တစ်ဦးက ပြောဆိုထားပါတယ်။

ကိုယ်ပျောက်နည်းပညာ သုံးထားပြီး အမေရိကန်ရဲ့ အလေးလံဆုံး ဗုံးတွေနဲ့ နျူကလီးယားလက်နက်တွေ တပ်ဆင်နိုင်တဲ့ B-2 ဗုံးကြဲ လေယာဉ်တွေ အရှေ့အလယ်ပိုင်းမှာ ကြိုတင် နေရာယူထားတာ ဖြစ်နိုင်တယ်လို့ လေ့လာသူတွေက ပြောပါတယ်။

အီရန် ဒါမှမဟုတ် သူတို့ရဲ့ ကိုယ်စားတပ်ဖွဲ့တွေက အရှေ့အလယ်ပိုင်းရှိ အမေရိကန် အကျိုးစီးပွားတွေကို တိုက်ခိုက်လာရင် အမေရိကန်က တိကျသေချာစွာ လက်တုံ့ပြန် တိုက်ခိုက်သွားမှာ ဖြစ်တယ်လို့ ပင်တဂွန် စစ်ဌာနချုပ် ပြောရေးဆိုခွင့်ရှိသူ ဆန်ပါနဲလ်က ပြောပါတယ်။

အရှေ့အလယ်ပိုင်းမှာ အမေရိကန်ရဲ့ ပစ်အား အတော်အတန် ကြီးမားနေပြီး မကြာခင်မှာ အဲဒီဒေသသို့ အမေရိကန်က လေယာဉ်တင် သင်္ဘော နှစ်စီး ချထားဦးမှာ ဖြစ်ပါတယ်။

အီရန်အနေနဲ့ နျူကလီးယား သဘောတူညီမှု အသစ် မရယူဘူးဆိုရင် ဗုံးကြဲ တိုက်ခိုက်မယ်လို့ အမေရိကန်သမ္မတ ဒေါ်နယ် ထရန့်က ခြိမ်းခြောက်ထားပါတယ်။

အီရန်သမ္မတနဲ့ ထိပ်တန်း ခေါင်းဆောင်တို့က မယုံကြည်ရတဲ့ အမေရိကန်နဲ့ တိုက်ရိုက် ဆွေးနွေးမှာ မဟုတ်ဘူးလို့ တုံ့ပြန်ထားပေမယ့် တိုက်ရိုက်မဟုတ်တဲ့ ဆွေးနွေးမှုတွေအတွက် လမ်းဖွင့်ထားဆဲ ဖြစ်တယ်လို့ ပြောပါတယ်။

အီရန်အနေနဲ့ နျူကလီးယား သဘောတူညီမှု မရယူဘူးဆိုရင် ရှောင်လွှဲမရတဲ့ စစ်ပွဲ တစ်ပွဲ ဖြစ်လာနိုင်တယ်လို့ ပြင်သစ်က သတိပေးထားပါတယ်။

ကမ္ဘာ့အင်အားကြီးနိုင်ငံတွေနဲ့အီရန်ကြား နျူကလီးယား သဘောတူညီမှုကနေ အမေရိကန်ကို ထရန့်က သူ့ရဲ့ ပထမသမ္မတ သက်တမ်း အတွင်း နုတ်ထွက်စေခဲ့ပါတယ်။

အဲဒီနောက် အီရန်က ယူရေနီယံသန့်စင်မှုကို တားမြစ်ထားတဲ့ အဆင့်ထက် အများကြီးပိုပြီး သန့်စင် ထုတ်လုပ်နေပါတယ်။

အီရန်က နျူကလီးယား လက်နက် ထုတ်လုပ်ဖို့ ကြိုးပမ်းနေတယ်လို့ အနောက်နိုင်ငံတွေက သံသယ ရှိနေပေမယ့် အီရန်က မိမိတို့ နျူကလီးယား စီမံကိန်းဟာ ငြိမ်းချမ်းရေးအတွက် ဖြစ်တယ်လို့ ပြောဆိုထားတာဖြစ်ပါတယ်။

Ref:Reuters

အမေရိကန်သမ္မတ ဒေါ်နယ်ထရန့် ပြဌာန်းထားတဲ့ အခွန်အတုပ်တွေကို စည်းစည်းလုံးလုံးနဲ့ တုံ့ပြန်သွားမယ်လို့ ဥရောပသမဂ္ဂ(အီးယူ) က ပြောကြားထားချိန်မှာ တရုတ်က အမေရိကန်ရဲ့ အခွန်တွေကို ချက်ချင်း ရုတ်သိမ်းရေး တိုက်တွန်းထားပြီး မရုတ်သိမ်းရင် လက်တုံ့ပြန်မယ်လို့ ကြွေးကြော်ထားပါတယ်။

အမေရိကန်ကို တင်သွင်းလာတဲ့ ကုန်စည်အားလုံးအပေါ် အခွန် ၁၀ ရာခိုင်နှုန်း ကောက်မယ်ဆိုတဲ့ သမ္မတ ထရန့်ရဲ့ ကြေညာချက်ဟာ ဧပြီ ၅ ရက်နေ့မှာ အသက်ဝင်လာမှာ ဖြစ်ပြီး ကမ္ဘာတဝန်း ရင်းနှီးမြှုပ်နှံသူတွေ စိုးရိမ်တကြီး စောင့်ကြည့်နေကြတာ ဖြစ်ပါတယ်။

ကုန်သွယ်ရေးစစ်ပွဲ ဖြစ်ပွားလာနိုင်တယ်ဆိုတဲ့ စိုးရိမ်မှုတွေ မြင့်တက်နေချိန်မှာ ဧပြီ ၃ ရက် အာရှ စတော့ရှယ်ယာစျေးကွက် ဖွင့်လှစ်ချိန် စျေးလျော့နည်းခဲ့တာ တွေ့ရပါတယ်။

ထရန့်ရဲ့ အခွန်တွေကို မိမိတို့အနေနဲ့ စည်းစည်းလုံးလုံး တုံ့ပြန်သွားမှာ ဖြစ်ကြောင်း ဥရောပကော်မရှင် အကြီးအကဲ ဗွန်ဒါ လေယာက ဧပြီ ၂ ရက်မှာ ပြောကြားထားပါတယ်။

အမေရိကန်ရဲ့ အခွန်တွေကြောင့် ကမ္ဘာလုံးဆိုင်ရာ စီးပွားရေးနဲ့ ကမ္ဘာကြီးရဲ့ ထိခိုက်အလွယ်ဆုံး နိုင်ငံ တချို့ ထိခိုက်မှုရှိမှာ ဖြစ်ကြောင်း အကြီးအကဲဗွန်ဒါလေယာက သတိပေးထားတာပါ။

ထရန့် ကုန်သွယ်ရေးမူဝါဒကြောင့် အများဆုံး ထိခိုက်မယ့် တရုတ်က လက်တုံ့ပြန်ရေး အစီအစဉ်တွေ ချမှတ်သွားမှာ ဖြစ်ပြီး အမေရိကန်ဟာ အခွန်တွေ ပြဌာန်းပြီးတော့ အကြပ်ကိုင်နေတယ်လို့ ပြောထားတာပါ။

ဧပြီ ၉ ရက်နေ့ကနေ စတင်ပြီး နိုင်ငံ တချို့ အပေါ် အမြင့်မားဆုံး အခွန်တွေ ပြဌာန်းသွားမှာ ဖြစ်ကြောင်း ထရန့်က သတိပေးထားပါတယ်။

ထရန့်က နိုင်ငံခြားဖြစ် မော်တော်ကား အားလုံးအပေါ်လည်း အခွန် ၂၅ ရာခိုင်နှုန်း ကောက်ခံမှာ ဖြစ်ကြောင်း ကြေညာထားပါတယ်။

ထရန့်ရဲ့ အခွန်ပြဌာန်းမှုကြောင့် အမေရိကန် စားသုံးသူ အားလုံးအပေါ် ရိုက်ခတ်မှု ရှိမှာ ဖြစ်ပြီး ကမ္ဘာ့စီးပွားရေး ဆုတ်ယုတ်နိုင်တဲ့ အန္တရာယ်ရှိတယ်လို့ စီးပွားရေးပညာရှင်တွေက သတိပေးထားပါတယ်။

Ref:BBC

Leave a Reply

This site uses Akismet to reduce spam. Learn how your comment data is processed.