ဖာပွန်၊ ဒီဇင်ဘာ ၁၅
ကရင်ပြည်နယ် ဖာပွန်ဒေသမှာ စစ်ရေးဗျူဟာအရ အရေးပါတဲ့ တောင်သုံးလုံးနဲ့ ဆင်စွယ်တပ်စခန်းတို့ တိုက်ခိုက်သိမ်းပိုက်ခံလိုက်ရပြီးနောက် စစ်ကောင်စီတပ်ဟာ အနီးနားရှိ ကတိုင်တိစခန်း မကျရေးအတွက် စစ်ကူအများအပြား ပို့ဆောင်နေတယ်လို့ ဒေသတွင်းသတင်းရင်းမြစ်တွေက ပြောပါတယ်။
ဖာပွန်ခရိုင်ထဲမှာရှိတဲ့ စစ်ကောင်စီတပ်ရဲ့ ဆင်စွယ်စခန်းနဲ့ တောင်သုံးလုံးစခန် နှစ်ခုကို ပြီးခဲ့တဲ့ ဒီဇင်ဘာ ၇ ရက်နဲ့ ၁၁ ရက်နေ့တို့မှာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ ဦးဆောင်တဲ့ တော်လှန်ရေးပူးပေါင်းအဖွဲ့တွေက တိုက်ခိုက်သိမ်းပိုက်ရရှိခဲ့တာပါ။
တိုက်ပွဲအတွင်း စစ်ကောင်စီတပ်သားတွေဟာ တောင်သုံးလုံး၊ ဆင်စွယ်ကျေးရွာအောက်ဘက်က ကတိုင်တိတပ်စခန်းဆီကို ထွက်ပြေးသွားတယ်လို့ ခန့်မှန်းရပြီး ထွက်ပြေးသွားတဲ့ စစ်ကောင်စီတပ်သားတွေကို KNLA တပ်မဟာ ၅ တော်လှန်ရေးပူးပေါင်းအဖွဲ့က လိုက်လံရှင်းလင်းနေတယ်လို့ KNU တပ်မဟာ ၅ ပြောခွင့်ရသူ ဗိုလ်မှူးကြီးစောကလယ်ဒိုက သံလွင်တိုင်းမ်ကို ပြောပါတယ်။
လက်ရှိမှာတော့ စစ်ကောင်စီတပ်ရဲ့ ကတိုင်တိစခန်းကို တော်လှန်ရေးပူးပေါင်းတပ်ဖွဲ့တွေက ပစ်ခတ်တိုက်ခိုက်မှုတွေ လုပ်ဆောင်နေပြီး စစ်ကောင်စီဘက်က လေကြောင်းကနေ လာရောက်တိုက်ခိုက်တာတွေ လုပ်ဆောင်နေတယ်လို့ သတင်းတွေထွက်ပေါ်နေပေမယ့် အဲဒီသတင်းနဲ့ပတ်သက်လို့ အတည်မပြုနိုင်သေးကြောင်း ဗိုလ်မှူးကြီးစောကလယ်ဒိုက ဆိုပါတယ်။
စစ်ကောင်စီတပ်ရဲ့ ကတိုင်တိစခန်းဟာ ဖာပွန်ခရိုင် ဖာပွန်မြို့နဲ့ ကမမောင်းမြို့အကြား ကတိုင်တိကျေးရွာမှာ တည်ရှိတာဖြစ်ပြီး စစ်တပ်စခန်းတစ်ခုအပြင် နယ်ခြားစောင့်တပ် BGF ရဲ့ တပ်ရင်း ၁၀၁၃ ဌာနချုပ်စခန်းလည်း တည်ရှိတာဖြစ်ပါတယ်။
အခုရက်ပိုင်းထဲမှာ စစ်ကောင်စီတပ်က ကမမောင်းမြို့အခြေစိုက် ဗျူဟာစခန်းကနေ မိုင် ၃၀ ခန့်မှာရှိတဲ့ ကတိုင်တိကျေးရွာဘက်ကို ဦးတည်ပြီး မြေပြင်စစ်ကူတွေ ပို့ဆောင်ပေးနေတာ ဖြစ်ပါတယ်။
ကတိုင်တိဒေသအတွင်း ဖြစ်ပွားခဲ့တဲ့ စစ်ရေးအခြေအနေတွေကြောင့် ကတိုင်တိ၊ ဘောကြိုလယ် စတဲ့ ကျေးရွာတွေက ဒေသခံပြည်သူတွေဟာ ကမမောင်းကို ရွာလုံးကျွတ် ထွက်ပြေးတိမ်းရှောင်လာနေရတယ်လို့ ဒေသတွင်းသတင်းရင်းမြစ်တွေထံကနေ သိရပါတယ်။
သတင်း – သံလွင်တိုင်းမ်
ဓာတ်ပုံ-CJ