ဘားအံ၊ နိုဝင်ဘာ ၃
ကရင်အမျိုးသားအစည်းအရုံး KNU တောင်ငူခရိုင်နဲ့ ဒူးပလာယာခရိုင်နယ်မြေတွေထဲမှာ စစ်ကောင် စီတပ်ရဲ့ လက်နက်ကြီးပစ်ခတ်မှုကြောင့် အရပ်သားပြည်သူနှစ်ဦး သေဆုံးခဲ့ရပြီး လူပေါင်း ၃၀၀၀ ကျော် ထွက်ပြေးတိမ်းရှောင်နေရတယ်လို့ KNU ဗဟိုနဲ့ ဒေသတွင်းသတင်းရင်းမြစ်ရဲ့ သတင်းထုတ်ပြန်ချက်အရ သိရပါတယ်။
ပြီးခဲ့တဲ့ အောက်တိုဘာ ၃၀ ရက်နေ့က KNU တောင်ငူခရိုင် ၇ မိုင်ရွာနဲ့ပျားစခန်းရွာထဲကို တိုက်ပွဲဖြစ်ပွားမှုမရှိဘဲ ရည်ရွယ်ချက်ရှိရှိနဲ့ စစ်ကောင်စီတပ်က လက်နက်ကြီး ၁၂၀ မမ ပစ်ခတ်ခဲ့ရာ ကျေး ရွာအတွင်းက နေအိမ်သုံးလုံး ထိမှန်ပျက်စီးသွားခဲ့ပြီး အမျိုးသမီးတစ်ဦး ထိမှန်သေဆုံးခဲ့ပါတယ်။
စစ်ကောင်စီတပ်ရဲ့ လက်နက်ကြီးပစ်ခတ်မှုကြောင့် ပြည်သူ နှစ်ဦးလည်း ထိမှန်ဒဏ်ရာရခဲ့ပြီး သေ ဆုံးသွားတဲ့ အမျိုးသမီးမှာ အရွယ်မရောက်သေးတဲ့ ကလေး ၃ ဦး ကျန်ရစ်ခဲ့တယ်လို့ သိရပါတယ်။
KNU တောင်ငူခရိုင်နယ်မြေထဲမှာ စစ်ကောင်စီတပ်က တိုက်ပွဲဖြစ်ပွားမှုမရှိဘဲ ရည်ရွယ်ချက်ရှိရှိနဲ့ လက်နက်ကြီး မကြာခဏပစ်ခတ်လျက်ရှိနေပြီး စစ်ကောင်စီတပ်ရဲ့ ပစ်ခတ်မှုကြောင့် အရပ်သားထိခိုက်မှုတွေ နေအိမ်ထိမှန်ပျက်စီးမှုတွေ ဖြစ်ပေါ်လျက်ရှိနေတာပါ။
ဒါ့အပြင် KNU ဒူးပလာယာခရိုင် ကျုံဒိုးမြို့နယ်ထဲမှာလည်း အောက်တိုဘာ ၂၈ ရက်နေ့ကနေ ၃၀ ရက်နေ့အတွင်း စစ်ကောင်စီ ခမရ ၂၃၁ လက်အောက်ခံ တပ်သစ်အမြောက်ကုန်းက ရေပူကြီးကျေး ရွာထဲ လက်နက်ကြီးပစ်ခတ်မှုကြောင့် ကော့ဝါးလဲ၊ နောင်တမံ၊ ဝင်းပြကျေးရွာအပြင်ဘက်တွေထဲ လက်နက်ကြီး ကျရောက်ပေါက်ကွဲခဲ့တယ်လို့ KNU ဗဟိုက ဆိုပါတယ်။
ကော့ကရိတ်-ကျုံဒိုး ကားလမ်းပေါ်မှာရှိတဲ့ ရေပူကြီးကျေးရွာထဲ စစ်ကောင်စီတပ်ရဲ့ လက်နက်ကြီကျည် ကျရောက်ပေါက်ကွဲမှုကြောင့် ရေပူကြီးရွာ ဒေသခံအမျိုးသားတစ်ဦးသေဆုံးခဲ့ပြီး နေအိမ်အ ဆောက်အဦးတွေ ထိခိုက်ပျက်စီးခဲ့ရသလို ရေပူကြီးရွာ ဒေသခံပြည်သူ ၃၇၄၀ ဦး ထွက်ပြေးတိမ်း ရှောင်နေရတယ်လို့ KNU ဗဟိုက ထုတ်ပြန်ပါတယ်။
စစ်ကောင်စီတပ်ဟာ KNU အုပ်ချုပ်နယ်မြေထဲမှာ အရပ်သားပြည်သူလူထုအပေါ် ပစ်မှတ်ထားပြီး လက်နက်ကြီးနဲ့ လေကြောင်းတိုက်ခိုက်မှုတွေ ပြုလုပ်နေတဲ့အတွက် ပြည်သူ့အိုးအိမ် အသက်တွေ ထိခိုက်ပျက်စီး ဆုံးရှုံးခဲ့ရကာ ထွက်ပြေးတိမ်းရှောင်နေရတာတွေကြောင့် အခက်အခဲများစွာ ကြုံနေရတယ်လို့ ကရင်လူမှုအဖွဲ့အစည်းတွေကနေ သိရပါတယ်။
သတင်း – သံလွင်တိုင်းမ်
ဓာတ်ပုံ-KNU