ကျိုက်မရော၊ ဇန်နဝါရီ(၇)
မွန်ပြည်နယ်၊ ကျိုက်မရောမြို့နယ်၊ ချောင်းနှစ်ခွကျေးရွာဘက်ကို စစ်ကောင်စီတပ်က လက်နက်ကြီးတွေနဲ့ ရမ်းသမ်းပစ်ခတ်နေတာကြောင့် ဒေသခံနေအိမ် ၂ လုံး ထိခိုက်ပျက်စီးပြီး ရွာသား ၃၀၀ ကျော်ထွက်ပြေးနေရတယ်လို့ ဒေသခံတွေက သံလွင်တိုင်းမ်ကို ပြောပါတယ်။
ချောင်းနှစ်ခွနယ်မြေရဲစခန်းနဲ့တံတားပေါ်မှာ တပ်စွဲထားတဲ့ စစ်ကောင်စီတပ်ဟာ ပြီးခဲ့တဲ့ ဇန်နဝါရီ ၅ ရက်နေ့ ညနေ ၆ နာရီကနေ ဇန်နဝါရီ ၆ ရက်နေ့ မနက် ၁ နာရီခွဲအချိန်ထိ တစ်ညလုံးနီးပါး လက်နက် ကြီး ရမ်းသမ်းပစ်ခတ်တာတွေ လုပ်ဆောင်နေတာပါ။
စစ်ကောင်စီတပ်ကပစ်ခတ်လိုက်တဲ့ လက်နက်ကြီးကျည်ဟာ ချောင်းနှစ်ခွကျေးရွာထဲ ကျရောက်ပေါက်ကွဲခဲ့တာကြောင့် ဒေသခံ နေအိမ်၂ လုံးထိခိုက်ပျက်စီးခဲ့ပါတယ်။
လက်ရှိမှာတော့ စစ်ကောင်စီတပ်က လက်နက်ကြီးရမ်းသမ်းပစ်နေတာကြောင့် ချောင်းနှစ်ခွ၊ သရက်ကုန်း၊ ကော့စပ်ကျေးရွာတွေက ဒေသခံ ၃၀၀ ကျော်ဟာ ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံတွေက ဆိုပါတယ်။
ဇန်နဝါရီ ၆ ရက်နေ့ နေ့လယ်ပိုင်းမှာလည်း စစ်ကောင်စီ ရဟတ်ယာဉ်တစ်စီးဟာ ကျိုက်မရောမြို့နယ်၊ ငပုအင်းကျေးရွာအနီးက ရော်ဘာခြံတွေထဲကို လာရောက်ပစ်ခတ်သွားသေးပေမယ့် ဒေသခံတွေ ထိခိုက်ဒဏ်ရာရတာမရှိဘူးလို့ သိရပါတယ်။
သတင်း – သံလွင်တိုင်းမ်