မြိတ်၊ နိုဝင်ဘာလ ၈
တနင်္သာရီတိုင်းဒေသကြီး၊ မြိတ်မြို့ ထုံးဖိုလမ်းရှိ စည်ပင်ဥက္ကဟောင်းနေအိမ်ကို နိုဝင်ဘာလ ၈ ရက်နေ့မှာ စစ်ကောင်စီက ချိတ်ပိတ် သိမ်းဆည်းလိုက်တယ်လို့ သိရပါတယ်။
ယနေ့ နေ့လည်ပိုင်းမှာ စစ်ကောင်စီတပ်ဖွဲ့ဝင်တွေက ဦးမြတ်ကိုကိုနေအိမ်ကို ရောက်ရှိလာပြီး ဗီနိုင်းကပ် ချိတ်ပိတ်သွားတာ ဖြစ်ပါတယ်။
မြိတ်မြို့ စည်ပင်ဥက္ကဌဟောင်း ဦးမြတ်ကိုကိုဟာ PDF အဖွဲ့များနဲ့ဆက်နွယ်ပတ်သက်နေတယ်လို့ဆိုကာ နေအိမ်နဲ့ပိုင်ဆိုင်မှုတွေကို ချိတ်ပိတ်သိမ်းဆည်းလိုက်တယ်လို့
ဒေသခံတွေက ဆိုပါတယ်။
“နေအိမ်ချိတ်ပိတ်ခံရတာဟုတ်တယ်။ စကစ ဘက်ကတော့ သူတို့တပ်ချင်တဲ့ ပုဒ်မတပ် သူတို့လုပ်ချင်သလိုလုပ်နေတာပါဘဲ။ ခုလဲ PDF နဲ့ဆက်သွယ်လို့ဆိုပြီး အိမ်ကို ချိတ်ပိတ်သွားတယ်။ ဦးမြတ်ကိုက ရှောင်နေတာ ကြာပြီလို့တော့ သိရတယ်။”လို့ ဒေသခံတစ်ဦးက သံလွင်တိုင်းမ်ကို ပြောပါတယ်။
ဦးမြတ်ကိုကိုဟာ စစ်ကောင်စီအာဏာသိမ်းပြီးနောက်ပိုင်း စစ်ကောင်စီတပ်ဖွဲ့ဝင်တွေ လိုက်လံဖမ်းဆီးတာကြောင့် ထွက်ပြေးတိမ်းရှောင်နေရသူဖြစ်ပါတယ်။
ချိတ်ပိတ်ထားသည့် ဦးမြတ်ကိုကိုနေအိမ်ကို နိုင်ငံတော်ပိုင်သိမ်းဆည်းမည်ဖြစ်တာကြောင့် မကျူးကျော် မရောင်းဝယ်ရဆိုပြီး သတိပေးစာ လာကပ်သွားတယ်လို့ သိရပါတယ်။
သတင်း- သံလွင်တိုင်းမ်