ရေဖြူ၊ ဩဂုတ် ၂၀
တနင်္သာရီတိုင်း ရေဖြူမြို့နယ် ကလိန်အောင်-ကံပေါက် ပြည်ထောင်စုလမ်းကို ဩဂုတ် ၁၈ ရက်နေ့ကစတင်ပြီး ညပိုင်းသွားလာတာတွေ မပြုလုပ်ကြဖို့ တော်လှန်ရေးမဟာမိတ်တပ်ပေါင်းစုက သတိ ပေးထုတ်ပြန်ပါတယ်။
လတ်တလော နှစ်ဖက်စစ်ရေးအခြေအနေကြောင့် အများပြည်သူတွေအနေနဲ့ အဲဒီပြည်ထောင်စုလမ်းပိုင်းမှာ ည ၆ နာရီကနေ မနက် ၆ နာရီအထိ ခရီးသွားလာတာတွေ မပြုလုပ်ဖို့ သတိပေးထားတာပါ။
ဒေါနတပ်ခွဲ ၆ တာဝန်ခံ ကိုပျံလွှားကတော့ ဒီသတိပေးချက်ဟာ အများပြည်သူတွေရဲ့ လုံခြုံရေးအတွက် ရည်ရွယ်တယ်လို့ သံလွင်တိုင်းမ်ကို ပြောပါတယ်။
နှစ်ဖက်စစ်ရေးအခြေအနေအရ ခရီးသွားလာခွင့်ပြန်ပေးလို့ရတဲ့အချိန်အခါရောက်ရှိလာပါက အများပြည်သူသိအောင် ပြန်လည်ကြေညာပေးသွားမယ်လို့ ဆိုပါတယ်။
ဒါကြောင့် ပြည်သူတွေအနေနဲ့ သတိပေးထားတဲ့အတိုင်း လိုက်နာသွားလာကြဖို့နဲ့ တားမြစ်ချက်ကို ဖောက်ဖျက်ပြီး ပြဿနာတစ်စုံတစ်ရာ ပေါ်ပေါက်လာပါက ဖြစ်လာမယ့်အကျိုးဆက်ကို တာဝန်ယူမှာ မဟုတ်ဘူးလို့ သတိပေးထားပါတယ်။
တော်လှန်ရေးပူးပေါင်းတပ်တွေအနေနဲ့ အဲဒီပြည်ထောင်စုလမ်းပိုင်းမှာ နယ်မြေစိုးမိုးမှု ယူနိုင်ဖို့အတွက် ခရီးသွားကားတွေထဲမှာ စစ်ကောင်စီနဲ့ပတ်သက်သူတွေ ပါလာတာရှိ မရှိ စစ်ဆေးမှုတွေ ပြုလုပ်နေတယ်လို့ သိရပါတယ်။
အလားတူ ရေး-ထားဝယ် ပြည်ထောင်စုလမ်းပိုင်း ကော့လှိုင်းကျေးရွာအနီးမှာလည်း စစ်ကော်မရှင်တပ်နဲ့ တော်လှန်ရေးပူးပေါင်းတပ်တို့အကြား နှစ်ဖက်စစ်ရေးတင်းမားနေပြီး တိုက်ပွဲတွေလည်း ပြန် လည်ဖြစ်ပွားတာတွေ ရှိနေပါတယ်။
သတင်း – သံလွင်တိုင်းမ်
ဓာတ်ပုံ-Social Media