မကွေး ဇူလိုင် ၁၆
မကွေးတိုင်း ပွင့်ဖြူနဲ့ စေတုတ္တရာမြို့နယ်အစပ်ကကျေးရွာတွေကို စစ်ကောင်စီနဲ့ပျူစောထီးတွေက ဝင်ရောက်ပြီး ဒေသခံ စစ်ရှောင်ပြည်သူ ၉ ဦးကို ဖမ်းဆီးခေါ်ဆောင်သွားတယ်လို့ သိရပါတယ်။
ပြီးခဲ့တဲ့ ဇူလိုင် ၁၆ ရက် မနက်ပိုင်းက စေတုတ္တရာမြို့နယ် ခဲပစ်ကျေးရွာကိုဝင်ရောက်ပြီး စစ်ရှောင်ပြည်သူ ၉ ဦးကိုဖမ်းဆီးသွားတာလို့ ဒေသခံတွေက ပြောပါတယ်။
“ဘယ်ကနေ ဝင်လာမှန်းကို မသိလိုက်ဘူး။ ဖမ်းဆီးထားတဲ့သူတွေကို သူတို့ ဆင်လူးပျူရွာဘက်ကို ခေါ်သွားတယ်။ သေနတ်တွေနဲ့ ရမ်းပစ်လို့ထိခိုက်တာတွေလည်း ရှိတယ်” လို့ ဒေသခံတစ်ဦးက သံလွင်တိုင်းမ်ကိုပြောပါတယ်။
ဖမ်းဆီးခံရသူတွေဟာ ညောင်ကုန်းရွာ၊ ကျောက်ပုံရွာ၊ ခဲပစ်ရွာတွေကဖြစ်ပြီး အမျိုးသမီး တစ်ဦးပါ ပါဝင်တယ်လို့ ဒေသခံတွေက ပြောပါတယ်။
ခဲပစ်ကျေးရွာကို ဝင်ရောက် မွှေနှောက်ပြီး လက်နက်ငယ်တွေနဲ့ ပစ်ခတ်ခဲ့တာကြောင့် လူငယ်တစ်ဦး ခြေထောက် ကျည်ထိမှန်ခဲ့တယ်လို့ သိရပါတယ်။
ခဲပစ်ကျေးရွာဘက်ကို ဝင်လာတဲ့ စစ်ကြောင်းဟာ စလင်းမြို့နယ် ကံပြားရွာဘက်က လာတာဖြစ်ပြီး ဆင်လူးရွာက ပျူစောထီးတွေအပါအဝင် အင်အား ၁၅၀ ဝန်းကျင် ရှိတယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ – Social Media