နေပြည်တော် ၊ ဧပြီ ၅
ငလျင်ကယ်ဆယ်ရေးလုပ်ငန်းတွေအတွက် တည်ငြိမ်ရေးကို ရှေးရှုကာ ယာယီအပစ်ခတ်ရပ်စဲတယ်လို့ ကြေညာထားတဲ့ စစ်ကောင်စီက ၂၄ နာရီ မပြည့်မီမှာဘဲ တိုက်ခိုက်မှုတွေ လုပ်ဆောင်ခဲ့တယ်လို့ ဒေသခံတွေနဲ့ တော်လှန်ရေးအဖွဲ့တွေက ပြောပါတယ်။
တည်ငြိမ်အေးချမ်းရေးကို ရှေးရှုကာ ဧပြီ ၂ ရက်နေ့ကနေ ၂၂ ရက်နေ့အထိ သုံးပတ်အကြာ ယာယီပစ်ခတ် တိုက်ခိုက်မှုရပ်စဲရေးကာလအဖြစ် စစ်ကောင်စီတပ်က ဧပြီ ၂ ရက်နေ့ ညပိုင်းမှာ ထုတ်ပြန်ခဲ့တာပါ။
ဒါပေမယ့် ဧပြီ ၃ ရက်နေ့ မနက်ပိုင်းမှာတော့ ကချင်ပြည်နယ်ရှိ ဝိုင်းမော်မြို့ကို စစ်ကောင်စီတပ်က စစ်ကြောင်းထိုးလာသလို ဗန်းမော်မြို့မှာလည်း လေကြောင်းကနေ ဗုံးကြဲတိုက်ခိုက်မှုတွေ လုပ်နေတယ်လို့ KIO ပြောခွင့်ရ ဗိုလ်မှူးကြီးနော်ဘူက သတင်းမီဒီယာတွေကို ပြောပါတယ်။
အလားတူ ရခိုင်ပြည်နယ်မှာလည်း စစ်တွေနဲ့ ကျောက်ဖြူမြို့နယ်က ကျေးရွာတချို့ကို စစ်ကောင်စီက တိုက်လေယာဉ်၊ လက်နက်ကြီး၊ ဒရုန်းနဲ့ စက်တပ်လေထီးတွေ အသုံးပြုပြီး ဗုံးကြဲတိုက်ခိုက်ခဲ့တယ်လို့ ဒေသခံတွေရဲ့ ပြောဆိုချက်ကို ကိုးကားပြီး ဒေသတွင်းသတင်းတွေက ဖော်ပြပါတယ်။
မွန်ပြည်တော်လှန်ရေးတပ် MSRF ပြောခွင့်ရ နိုင်နဂါးက အပြောနဲ့အလုပ်မညီတဲ့ စစ်ကောင်စီဟာ လူတွေရဲ့ အသက်ကို တန်ဖိုးမထားသလို ငြိမ်းချမ်းရေးကို မလိုလားဘဲ အာဏာတည်မြဲဖို့ လုပ်နေ ကျအတိုင်းပဲလို့ သံလွင်တိုင်းမ်ကို ပြောပါတယ်။
“စစ်ကောင်စီက သူတို့ရဲ့ သန္ဓေမမှန်တဲ့ စရိုက်အတိုင်းပဲ အပြောတစ်မျိုး အလုပ်တစ်မျိုးပေါ့။ ပါးစပ်ကဘုရား လက်ကကားယား ဒီအတိုင်းပဲ လုပ်နေကျပါ။ အခုလို အပစ်ခတ်ရပ်စဲရေး ကြေညာရတဲ့အကြောင်းကလည်း ငလျင်ဒဏ်ကြောင့် ဘေးဒုက္ခရောက်နေတဲ့ ပြည်သူတွေကို ကူညီဖို့ဆိုပြီး နိုင်ငံ တကာအဖွဲ့အစည်းတွေ ရောက်ရှိနေချိန်မှာ အခုလို စစ်သွေးကြွပုံစံကို သူတို့က ဖုံးကွယ်ချင်ပြီး အခုလို ထုတ်ပြန်တာဖြစ်တယ်။ စေတနာရှိလို့မှ မဟုတ်တာ” လို့ ဆိုပါတယ်။
စစ်ကောင်စီရဲ့ အပစ်ရပ်ကြေညာချက်မှာတော့ ငလျင်ဒဏ်ကြောင့် ထိခိုက်ခံစားနေရတဲ့ တစ်နိုင်ငံလုံးမှာရှိတဲ့ ပြည်သူလူထုကို စာနာထောက်ထားပြီး ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ အရှိန်အဟုန်နဲ့ ဆောင်ရွက်နိုင်စေဖို့ ရည်ရွယ်ထားတာပါ။
အမျိုးသားညီညွတ်ရေးအစိုးရ NUG ကတော့ အပစ်ရပ်တယ်လို့ စစ်ကောင်စီရဲ့ ကြေညာချက်ဟာ လီဆယ်လှည့်ဖြားမှုသာဖြစ်တယ်လို့ တုံ့ပြန်ပါတယ်။ လက်တွေ့မှာ စစ်ကောင်စီက လေကြောင်းတိုက်ခိုက်တာနဲ့ မြေပြင်စစ်ကြောင်းထိုးတာတွေ အဆက်မပြတ် လုပ်ဆောင်နေတာလို့ ဆိုပါတယ်။
ဧပြီ ၃ ရက်နေ့ မနက်ပိုင်းကနေ နေ့လယ်ပိုင်းအထိ စစ်ကိုင်းတိုင်းနဲ့ မန္တလေးတိုင်းက မြို့နယ်လေးခုမှာ လေကြောင်းတိုက်ခိုက်ခဲ့သလို စစ်ကြောင်းထိုးနေတယ်လို့ NUG ရဲ့ ကာကွယ်ရေးဝန်ကြီးဌာနက သတင်းထုတ်ပြန်ထားတာပါ။
မန္တလေးတိုင်း မြင်းခြံခရိုင်၊ တောင်သာမြို့နယ်က သဲတောကျေးရွာနဲ့ အရှေ့ဘက်ရေကျော် အလယ် တန်းကျောင်းကို ဧပြီ ၃ ရက်နေ့ မနက် ၂ နာရီမှာ စက်တပ်လေထီး သုံးစီးနဲ့ ၁၂၀ မမ ဗုံးသီး ရှစ်လုံး ကြဲချတိုက်ခိုက်ခဲ့ပါတယ်။
ဒါ့အပြင် မနက် ၆ နာရီမှာလည်း ညောင်ဦးမြို့နယ်၊ ငါ့သလောက်ရဲစခန်းကနေ တင့်ကား ၂ စီးနဲ့ စစ်ကောင်စီ တပ်တွေ စစ်ကြောင်းထိုးပြီး လမ်းတလျှောက်ရှိ ကျေးရွာအတွင်းက ပြည်သူပိုင်နေအိမ်တွေကို စက်သေနတ်ကြီးအပါအဝင် လက်နက်မျိုးစုံ ပစ်ခတ်ခဲ့တာပါ။
မနက် ၉ နာရီခွဲမှာလည်း စစ်ကိုင်းတိုင်းရှိ ဟုမ္မလင်းလေတပ်စခန်းဌာနချုပ်ကနေ တက်လာတဲ့ ရဟတ်ယာဉ်ဟာ ဟုမ္မလင်းမြို့နယ်ရှိ ကျေးရွာတချို့မှာ တိုက်ပွဲဖြစ်ပွားခြင်းမရှိဘဲ ဗုံးသီး ၁၃ လုံး ကြဲချတိုက်ခိုက်ခဲ့တယ်လို့ NUG က ဆိုပါတယ်။
နေ့လယ်ပိုင်းမှာတော့ ကနီမြို့နယ်က မုဌောရွာနဲ့ နတ်ကြီးရွာကို အနောက်မြောက်တိုင်းစစ်ဌာနချုပ်ကနေ တက်လာတဲ့ စက်တပ်လေထီး နှစ်စီးနဲ့ ဗုံးသီးကြဲချတိုက်ခိုက်ခဲ့ပြီး တောင်ပျောက်ရွာကိုလည်း စက်သေနတ်နဲ့ ပစ်ခတ်ခဲ့တယ်လို့ ထုတ်ပြန်ထားတာပါ။
မွန်ပြည်နယ်မှာတော့ စစ်ကောင်စီအပစ်ခတ်ရပ်စဲရေးကြေညာပြီးနောက်ပိုင်း ထိတွေ့တိုက်ပွဲတွေနဲ့ ဗုံးကြဲတိုက်ခိုက်တာမရှိပေမယ့် စစ်ရေးလှုပ်ရှားမှုတွေ ပုံမှန်အတိုင်း ဆက်လက်လုပ်ဆောင်နေတယ်လို့ နိုင်နဂါးက ပြောပါတယ်။
“ရေးလမ်းကနေတဆင့် အစင်ကနေ ရေးမြို့နယ်ကို အင်အားတွေထပ်ဖြည့်တာတွေ ရှိတယ်။ အဲဒါအပြင် မုဒုံမြို့နယ်က အဘစ်အမြောက်တပ်တွေမှာလည်း အင်အားတွေ ထပ်ဖြည့်တာတွေရှိသလို တခြားသော သံဖြူဇရပ်ကနေပြီးတော့ အနန်းကွင်းဘက်ကို အင်အားတွေ ထပ်ဖြည့်တာတွေ လှုပ် ရှားမှုတွေ ရှိတယ်။ အဲဒါအပြင် မုဒုံမြို့ထဲမှာကိုက စစ်ရေးပြပုံစံအနေနဲ့ကားတွေ လှုပ်ရှားနေတာတွေ ရှိတယ်ဗျ” လို့ ဆိုပါတယ်။
အပစ်ရပ်ထားတဲ့ကာလအတွင်း လက်နက်ကိုင်အဖွဲ့တွေအနေနဲ့ အင်အားစုဆောင်းတာ၊ နယ်မြေချဲ့ထွင်တာ၊ အများပြည်သူသွားလာအသုံးပြုနေတဲ့ ဆက်သွယ်ရေးလမ်းကြောင်းတွေကို နှောင့်ယှက်တိုက်ခိုက် ဖျက်ဆီးတာတွေလုပ်ရင်တော့ လိုအပ်တဲ့တုံ့ပြန်မှုတွေ လုပ်သွားမယ်လို့ စစ်ကောင်စီက ကြေညာထားတာပါ။
ဒါဟာ အခြေအနေအပေါ်လိုက်ပြီး စစ်ရေးအရ အသာစီးရယူနိုင်တယ်ဆိုတဲ့ ယူဆချက်နဲ့ တုံ့ပြန်မှုဖြစ်သလို အပစ်ရပ်ကာလအတွင်းမှာလည်း စစ်ကောင်စီက လက်နက်ခဲယမ်း၊ လူအင်အား၊ ရိက္ခာ ရွှေ့ပြောင်း ဖြည့်တင်းတာတွေ လုပ်လေ့ရှိတယ်လို့ လေ့လာသူတွေက ထောက်ပြထားပါတယ်။
မတ် ၂၈ ရက်နေ့မှာ အင်အားပြင်းလှုပ်ခတ်ခဲ့တဲ့ ငလျင်ကြောင့် ကယ်ဆယ်ရေးတွေလုပ်ဖို့ အမျိုး သားညီ ညွတ်ရေးအစိုးရ NUG က ငလျင်ဖြစ်ပွားရာဒေသတွေမှာ ထိုးစစ်နှစ်ပတ်ရပ်နားမယ်လို့ ကြေညာထာားတာပါ။
အဲဒီနောက်ပိုင်း ညီနောင်မဟာမိတ်သုံးဖွဲ့အပါအဝင် စစ်ကောင်စီနဲ့ ကချင်လွတ်လပ်ရေးတပ်မတော် KIO တို့ ရှေ့ဆင့်နောက်ဆင့် တစ်ဘက်သတ်အပစ်ခတ်ရပ်စဲကြောင်း ကြေညာချက်ကိုယ်စီ ထုတ်ပြန်ခဲ့ကြပါတယ်။
ဒါပေမယ့် အာဏာသိမ်း စစ်ကောင်စီကတော့ မြို့ရွာတွေကို လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးပစ်ခတ်တာ၊ စစ်ကြောင်းထိုးတာတွေနဲ့ စစ်မှုထမ်းစုဆောင်းတာတွေကို ဆက် လက်လုပ်ဆောင်ဆဲ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-Social Media