ဘန်ကောက် ဧပြီ ၅
ထိုင်းနိုင်ငံ ချင်းမိုင်နဲ့ ချင်းရိုင်ပြည်နယ်တွေကို ဖြတ်သန်းစီးဆင်းနေတဲ့ ကော့မြစ် တလျှောက်မှာ နေထိုင်ကြသူတွေအနေနဲ့ မြစ်ရေထဲမှာ အာဆင်းနစ်အဆိပ်ဓာတ်တွေ လွန်လွန်ကဲကဲရှိနေလို့ သုံးစွဲခြင်းမပြုကြဖို့ တိုက်တွန်းထားတယ်လို့ သိရပါတယ်။
အဲဒီအဆိပ်ဓာတ်ဟာ မြန်မာနိုင်ငံ ရှမ်းပြည်နယ်ရှိ မုံဆိုင်းမြို့က ကျယ်ပြန့်တဲ့ ရွှေမိုင်းတွင်း လုပ်ငန်းတွေကနေ ရောက်လာတာလို့ Thai PBS သတင်းမှာ ရေးပါတယ်။
မယ့်အိုင်ခရိုင်မှာရှိတဲ့ ကော့မြစ်ထဲက ရေနမူနာတွေကို စစ်ဆေးခဲ့ရာမှာတော့ အာဆင်းနစ်ပါဝင်မှုဟာ ဘေးကင်းစေတဲ့အဆင့်ထက် နှစ်ဆမြင့်တက်နေတာ တွေ့ရှိခဲ့ရတဲ့အကြောင်း ပြီးခဲ့တဲ့ မတ် ၁၉ ရက်မှာ ချင်းမိုင်အခြေစိုက် သဘာဝပတ်ဝန်းကျင်နဲ့ လေထုညစ်ညမ်းမှု ထိန်းချုပ်ရေးရုံး ညွှန်ကြားရေးမှူး အာဝီရ ပီကာမတ်က ပြောပါတယ်။
သဘာဝရေကြောမှာ ပါဝင်တဲ့ အာဆင်းနစ် စံအဆင့်ဟာ ရေတစ်လီတာမှာ ၀ ဒသမ ၀၁ မီလီဂရမ် ရှိပေမယ့် ကော့မြစ်ရေ နမူနာထဲမှာတော့ ကျန်းမာရေးကို ထိခိုက်စေနိုင်တဲ့ အာဆင်းနစ် ပါဝင်မှုမှာ ရေတစ်လီတာကို ၀ ဒသမ ၀၂၆ မီလီဂရမ်ရှိနေတဲ့အပြင် မြစ်ထဲကရေဟာ ပုံမှန်ထက် ကိုးဆလောက် နောက်ကျိနေတယ်လို့ ပြောပါတယ်။
ကဒီယမ်နဲ့ ခဲဓာတ်လိုမျိုး သတ္ထုမာတွေကိုလည်း ရေနမူနာတွေထဲမှာ တွေ့ရှိခဲ့ရတယ်လို့ ညွှန်ကြားရေးမှူး အာဝီရ ကဆိုပါတယ်။
အာဆင်းနစ်ဓာတ်ပါဝင်နေတဲ့ ရေကို သောက်သုံးမယ်ဆိုရင် အစာအိမ် ထိခိုက်မှုရှိနိုင်ပြီး အဲဒီအဆိပ်ရေကို ပုံမှန်သောက်သုံးမယ်ဆိုရင်တော့ ခန္ဓာကိုယ်ထဲ အာဆင်းနစ် ဓာတ်တွေ စုပုံလာပြီး ကင်ဆာအထိ ဖြစ်နိုင်တယ်လို့ အာဝီရက သတိပေးပါတယ်။ အာဆင်းနစ် ဓာတ်နဲ့ ထိတွေ့ခြင်းဟာလည်း အရေပြား ယားယံခြင်းကို ဖြစ်ပေါ်စေနိုင်ပါတယ်။
ချင်းရိုင်ပြည်နယ် မူအန်းခရိုင်မှာရှိတဲ့ မြစ်ထဲကနေ ရယူထားတဲ့ ရေနမူနာရဲ့ စမ်းသပ်ချက်ရလဒ်တွေကိုတော့ လာမယ့်ရက်အနည်းငယ်အတွင်း ရရှိနိုင်မယ်လို့ သတင်းမှာ ဖော်ပြပါတယ်။
မြန်မာနိုင်ငံရှိ လူ့အခွင့်အရေးအဖွဲ့တွေရဲ့ အဆိုအရ ရွှေရာဖို့ တရုတ်ကုမ္ပဏီတွေ ရောက်ရှိလာခဲ့တဲ့ ၂၀၂၀ ပြည့်နှစ်အထိ ရှမ်းပြည်နယ်မှာ ရွှေသတ္ထုတွင်းလုပ်ငန်း လုပ်ကိုင်တာမျိုး မရှိခဲ့ဘူးလို့ သိရပါတယ်။
လက်ရှိမှာတော့ တရုတ်ကုမ္ပဏီ ၄ ခုက မုံဆိုင်းမြို့ရှိ ကော့မြစ်နဲ့ နီးတဲ့ ရွှေသတ္ထုတွင်းလုပ်ငန်းတွေမှာ လုပ်ကိုင်နေကြပါတယ်။ အချိန်ပြည့် ရွှေတွင်းမှာ လုပ်ကိုင်နေကြတဲ့ တရုတ်နိုင်ငံသား ၃၀၀ ကျော်အထိ ရှိတယ်လို့လည်း ဆိုပါတယ်။
ရွှေတူးဖော်ရေးလုပ်ငန်းစဉ်မှာ အသုံးပြုတဲ့ရေကို ကော့မြစ်ကနေ ထုတ်ယူပြီး အသုံးပြီးနောက် ပြန်လည်သန့်စင်ခြင်းမရှိဘဲ မြစ်ထဲကို တိုက်ရိုက် စီးဆင်းစေတာဖြစ်တယ်လို့ လူ့အခွင့်အရေးအဖွဲ့တွေက ပြောဆိုထားပါတယ်။
Ref:ThaiPBS