မော်လမြိုင် ၊ ဧပြီ ၆
မွန်ပြည်နယ်မှာ မူးယစ်ဆေးဝါးသုံးစွဲမှုကြောင့် ဖမ်းဆီးခံရတဲ့ လူငယ်တွေကို စစ်ကောင်စီက စစ်မှု ထမ်းသင်တန်းတွေထံ ချက်ချင်းပို့ဆောင်တာတွေ ရှိနေတယ်လို့ စစ်ကောင်စီနဲ့ နီးစပ်သူတွေက သံ လွင်တိုင်းမ်ကို ပြောပါတယ်။
စစ်ကောင်စီ ရဲတပ်ဖွဲ့နဲ့အုပ်ချုပ်ရေးအဖွဲ့ဝင်တွေဟာ လူငယ်တွေကို မူးယစ်ဆေးဝါးသတင်းအရ ရှာ ဖွေဖမ်းဆီးတာတွေရှိသလို လူစည်ကားရာနေရာတွေမှာ ပိတ်ဆို့စစ်ဆေးပြီးနောက် မူးယစ်ဆေးဝါး တွေ့ရှိတဲ့ လူငယ်တွေကို စစ်မှုထမ်းသင်တန်းတွေထံ ပို့ဆောင်နေတာပါ။
အရင်က မူးယစ်ဆေးဝါးတွေ့ရှိလို့ ဖမ်းဆီးခံရတဲ့ လူငယ်တွေကိုတော့ မူးယစ်ပုဒ်မတစ်မျိုးမျိုးနဲ့ အမှုဖွင့်အရေးယူတာတွေ လုပ်ဆောင်ခဲ့ရာမှ လက်ရှိမှာတော့ စစ်မှုထမ်းသင်တန်းအတွက် လူလို အပ်ချက်အရ စစ်မှုထမ်းသင်တန်းတွေထံ ပို့ဆောင်နေတာ ဖြစ်ပါတယ်။
အမည်မဖော်လိုတဲ့ ဒေသခံလူငယ်တစ်ဦးကတော့ မူးယစ်ဆေးဝါးသုံးစွဲတဲ့ လူငယ်တွေဟာ နဂိုက တည်းက စိတ်ပိုင်းဆိုင်ရာကြံ့ခိုင်မှု မရှိတဲ့အတွက် စစ်မှုထမ်းထဲထည့်တာကြောင့် နောက်ဆက်တွဲ ဆိုးကျိုးကို ပြည်သူတွေပဲခံစားရမှာဖြစ်သလို ဒီစနစ်ဆိုးကြီးထဲမှာ လူငယ်တွေရဲ့ အနာဂတ်ဟာ လုံးဝ ပျောက်ဆုံးနေတယ်လို့ ပြောပါတယ်။
“နဂိုကတည်းက စိတ်ပိုင်းဆိုင်ရာ ကြံ့ခိုင်မှုမရှိတဲ့လူတွေကို သွားထည့်ထားရင်တော့ ပိုပြီးတော့ ဆိုး ရွားတဲ့ နောက်ဆက်တွဲ ဆိုးကျိုးတွေကို အားလုံးပြည်သူတွေပဲ ခံစားရမယ်လို့ မြင်တာပေါ့နော်။ ခေတ်ပျက်ကြီးထဲမှာ စနစ်ဆိုးကြီးကို အမြန်ဆုံးလွတ်မြောက်အောင် မလုပ်နိုင်သရွေ့ကတော့ ဒီထက်တခြားအကြောင်းအရာတွေလည်း ထပ်ပေါ်လာနိုင်တာပဲ။ မူးယစ်ဆေးဝါးပြန်လည်ထူထောင် ရေးကိုလည်း ကောင်းကောင်းလုပ်နိုင်တာ မဟုတ်ဘူး။ ပညာသင်ဖို့ အခွင့်အလမ်းရှိတဲ့ လူငယ်တွေကလည်း ပညာကောင်းကောင်း သင်ကြားရမှာ မဟုတ်ဘူးပေါ့နော်။ ဘယ်ပြည်နယ်ပဲဖြစ်ဖြစ် လူ ငယ်တွေရဲ့ အနာဂတ်က ဒီစနစ်ဆိုးကြီးထဲမှာ လုံးဝပျောက်ဆုံးနေတာပေါ့နော်” လို့ ဆိုပါတယ်။
ဒါ့အပြင် အရင်ကမူးယစ်ဆေးဝါးသုံးစွဲတဲ့ လူငယ်တွေအနေနဲ့ မူးယစ်ဆေးဝါးဖြတ်လိုပါက ပြန် လည် ထူထောင်ရေးလုပ်ငန်းတွေ လုပ်ဆောင်ပေးတာရှိခဲ့ပြီး အခုလိုစစ်ကောင်စီက စစ်ထဲအတင်းထိုးသွင်းတာဟာ လူငယ်တွေကို သူတို့အကျိုးစီးပွားအတွက် အသုံးချတာဖြစ်တယ်လို့ သူက ဆက်ပြောပါတယ်။
မွန်ပြည်ကာကွယ်ရေးတပ် MSDF ပြောခွင့်ရ ဒေါက်တာ သီရိမွန်ချမ်းကတော့ မူးယစ်ဆေးဝါး သုံးစွဲတဲ့ လူငယ်တွေကို စစ်မှုထမ်းသင်တန်းပို့တာဟာ တပ်သားသစ်စုဆောင်းရာမှာ အခက်အခဲ အကြီး အကျယ် ကြုံတွေ့နေတာကိုပြသတာဖြစ်သလို သူတို့ရဲ့ စစ်တပ်အင်အား ဖြည့်ဆည်းနိုင်ဖို့ ကြိုးပမ်းမှုလို့ ဝေဖန်ပါတယ်။
“မွန်ပြည်နယ်အတွင်းက မူးယစ်ဆေးဝါးသုံးစွဲတဲ့ လူငယ်တွေကို စစ်ကောင်စီက စစ်မှုထမ်းသင်တန်း တန်းပို့နေရတာက စစ်ကောင်စီမှာ တပ်အင်အား ပြတ်တောက်နေပြီး တပ်သားသစ် စုဆောင်းရေးမှာလည်း အခက်အခဲ အကြီးအကျယ် ကြုံတွေ့နေရတာကို ထင်ထင်ရှားရှား ပြသနေတာပါ။ အရည် အချင်းပြည့်ဝတဲ့ တပ်တွေဖြစ်ဖို့ ကိုယ်ကာယကျန်းမာပြီး စိတ်ဓာတ်လည်းခိုင်မာတဲ့ တပ်သားသစ်တွေ စုဆောင်းမွေးမြူကြရတယ်။ သို့သော်ငြားလည်း စစ်ကောင်စီမှာ ဒီလိုစုဆောင်းရွေးချယ်စရာ လမ်းမရှိလို့ မူးယစ်ဆေးဝါးသုံးစွဲတဲ့ လူငယ်တွေ ကာယဉာဏ ဖွံ့ဖြိုးမှုမရှိတဲ့ လူငယ်တွေကို အကြီး အကျယ် လိုအပ်ပြတ်တောက်နေတဲ့ သူ့ရဲ့ စစ်တပ်အင်အားကို ဖြည့်ဆည်းနိုင်ဖို့ စစ်သင်တန်းတွေ တန်းပို့နေရတယ်လို့ သုံးသပ်ရမှာပါ” လို့ ဆိုပါတယ်။
လက်ရှိ နိုင်ငံအနှံ့ ဖြစ်ပွားနေတဲ့ တိုက်ပွဲတွေမှာ စစ်ရှုံးနေတဲ့ စစ်ကောင်စီဟာ စစ်အင်အား လိုအပ် ချက်အရ လူငယ်တွေကို နည်းအမျိုးမျိုးနဲ့ဖမ်းဆီးပြီး အတင်းအဓမ္မ စစ်သားစုဆောင်းနေတာကြောင့် လူငယ်တွေအနေနဲ့ သတိထားသွားလာကြဖို့ သူက တိုက်တွန်းပါတယ်။
တဖက်မှာ စစ်ကောင်စီကတော့ မူးယစ်ဆေးဝါးတွေကို သူတို့ လက်အောက်ခံ သတင်းပေးတွေကတဆင့် လူငယ်တွေကြားထဲ ဖြန့်ဝေခိုင်းတာရှိသလို လူငယ်တွေကို မူးယစ်ဆေးဝါးနဲ့ မျှားကာ ထောင်ဖမ်းပြီး စစ်သားသစ် စုဆောင်းမှုတွေလည်းရှိတယ်လို့ ဒေသခံတွေက ပြောကြပါတယ်။
မွန်ပြည်နယ်မှာတော့ စစ်ကောင်စီဟာ စစ်မှုထမ်းဥပဒေကို အသက်သွင်းပြီးနောက် လစဉ်စစ်မှု ထမ်း သင်တန်းတွေပေးနေပြီး ပြီးခဲ့တဲ့ မတ်လ ၁၇ ရက်နေ့ကလည်း စစ်မှုထမ်းသင်တန်း အပတ်စဉ် ၁၁ ကို ဖွင့်လှစ်ခဲ့သလို လက်ရှိမှာလည်း စစ်မှုထမ်းသင်တန်း အပတ်စဉ် ၁၂ အတွက် လူသစ်စု ဆောင်းမှုတွေ လုပ်ဆောင်နေတာပါ။
သံလွင်တိုင်းမ်က ပြုစုထားတဲ့ အချက်အလက်တွေအရ မွန်ပြည်နယ်မှာ စစ်ကောင်စီ ဖွင့်လှစ်ထားတဲ့ စစ်မှုထမ်းသင်တန်း အပတ်စဉ် ၁ ကနေ အပတ်စဉ် ၁၁ အထိ စစ်မှုထမ်းစစ်သားစုဆောင်းခံရသူ ၂၀၀၀ ကျော်အထိ ရှိလာပြီးဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ