စင်ကာပူ၊ ဧပြီ ၅
မတ် ၂၈ ရက်မှာ ရစ်ချ်တာစကေး ၇ ဒသမ ၇ အဆင့်ရှိ ငလျင်ကြီး လှုပ်ခတ်ခဲ့ပြီးနောက် မြန်မာနိုင်ငံမှာ ကယ်ဆယ် ရှာဖွေရေး လုပ်ငန်းစဉ်တွေမှာ ပါဝင်ကူညီဖို့ စင်ကာပူက ပိုးဟပ်စက်ရုပ် စုစုပေါင်း ၁၀ ရုပ်ကို စေလွှတ်ပေးခဲ့ပါတယ်။
စင်ကာပူ ကာကွယ်ရေးတပ်ဖွဲ့ရဲ့ ခြင်္သေ့နှလုံးသား အော်ပရေးရှင်းမှာ ပါဝင် ကူညီဖို့ အဲဒီ ပိုးဟပ် စက်ရုပ်တွေဟာ မတ် ၃၀ ရက်မှာကတည်းက မြန်မာနိုင်ငံသို့ ရောက်ရှိလာခဲ့တာ ဖြစ်ပါတယ်။
လူသားချင်း စာနာထောက်ထားရေး အော်ပရေးရှင်း တစ်ခုမှာ အခုလို ပိုးဟပ် စက်ရုပ်တွေ အသုံးပြုတာဟာ ကမ္ဘာမှာ ပထမဆုံးအကြိမ် ဖြစ်ပါတယ်။
နန့်ယန်းနည်းပညာ တက္ကသိုလ်၊ ကလက်စ် အင်ဂျင်နီယာလုပ်ငန်းတို့နဲ့ အတူ စင်ကာပူ သိပ္ပံနဲ့ နည်းပညာအဖွဲ့တို့က အဲဒီ ပိုးဟပ်စက်ရုပ်တွေကို တီထွင်ထားတာ ဖြစ်ပါတယ်။
အဲဒီ ပိုးဟပ် စက်ရုပ်တွေကို မတ် ၃၁ ရက်က နေပြည်တော်မှာ ပထမဆုံး အသုံးပြုခဲ့ပြီး ဧပြီ ၃ ရက်က နှစ်ကြိမ် အသုံးပြုထားပါတယ်။
ပိုးဟပ်စက်ရုပ်တွေဟာ အသက်ရှင်သူတွေကို မရှာဖွေပေးနိုင်ခဲ့ပေမယ့် အဆိုးရွားဆုံး ထိခိုက်တဲ့ နေရာတွေမှာ ကယ်ဆယ်ရေးလုပ်သားတွေကို အများကြီး အထောက်အကူ ပေးနိုင်ခဲ့ပါတယ်။
စင်ကာပူ ကာကွယ်ရေးတပ်ဖွဲ့က လူအင်အား ၈၀ နဲ့အနံ့ခံရှာဖွေရေး ခွေး လေးကောင် ပါဝင်တဲ့ အဖွဲ့ကို မတ် ၂၉ ရက်မှာ မြန်မာနိုင်ငံသို့ စေလွှတ်ပေးခဲ့တာ ဖြစ်ပါတယ်။
အဲဒီနောက် စင်ကာပူ အင်ဂျင်နီယာ လေးဦးနဲ့ ပိုးဟပ်စက်ရုပ်တွေကို စေလွှတ်ပြီး ရှာဖွေ ကယ်ဆယ်ရေး အားဖြည့်ပေးခဲ့တာပါ။
အနီအောင်ရောင်ခြည်သုံး ကင်မရာတွေ၊ အာရုံခံကိရိယာတွေ တပ်ဆင်ထားတဲ့ ပိုးဟပ်စက်ရုပ်တွေဟာ အပျက်အစီးတွေကြား ပိတ်မိနေတဲ့ သက်ရှိ မှန်သမျှကို ရှာဖွေပေးနိုင်ပါတယ်။
သက်ရှိတွေ ရှာတွေရင် ပိုးဟပ်စက်ရုပ်တွေက အင်ဂျင်နီယာတွေဆီ ကြိုးမဲ့စနစ်နဲ့ အသိပေးပြီး ကယ်ဆယ်ပေးဖို့ အချက်ပြပေးနိုင်ပါတယ်။
Ref:Strait Times