ဝါရှင်တန်၊ ဧပြီ ၅
သမ္မတ ဒေါ်နယ် ထရန့်အစိုးရက အမေရိကန်ရဲ့ နိုင်ငံတကာ အကူအညီ ပေးရေး အေဂျင်စီကို ပိတ်သိမ်းလိုက်တာကြောင့် အမေရိကန်အနေနဲ့ မြန်မာ့ငလျင်ဘေးကို မကူညီနိုင်ဖြစ်သွားခဲ့တယ်ဆိုတဲ့ စွပ်စွဲမှုတွေကို နိုင်ငံခြားရေးဝန်ကြီး မာကို ရူဘီယိုက ပယ်ချလိုက်ပါတယ်။
အလားတူ သဘာဝဘေးအန္တရာယ်မျိုးတွေကို အရင်က တုံ့ပြန်သလို မဟုတ်ဘဲ အမေရိကန်က ဘာကြောင့် အဓိပ္ပါယ်ပြည့်ပြည့်ဝဝနဲ့ မကူညီခဲ့ရတာလဲလို့ ဘီဘီစီသတင်းဌာနက မေးမြန်းရာမှာ ဝန်ကြီး ရူဘီယိုက အမေရိကန်ဟာ ကမ္ဘာကြီးရဲ့ အစိုးရ မဟုတ်ဘူးလို့ တုံ့ပြန် ပြောဆိုထားပါတယ်။
နိုင်ငံတကာဖွံ့ဖြိုးတိုးတက်ရေး အမေရိကန် အေဂျင်စီ USAID အရာရှိဟောင်းတွေက အေဂျင်စီကို ဖျက်သိမ်းလိုက်တဲ့အတွက် အမေရိကန်ဟာ မြန်မာနိုင်ငံသို့ ကယ်ဆယ်ရေးလုပ်သားတွေနဲ့ခွေးတွေ မပို့ဆောင်နိုင် ဖြစ်ခဲ့ရတယ်လို့ အခုသီတင်းပတ် စောစောပိုင်းမှာ ပြောကြားခဲ့ပါတယ်။
အမေရိကန်အနေနဲ့ နိုင်ငံ့အကျိုးစီးပွားတွေ ရှိနေတဲ့ တခြား လိုအပ်နေတဲ့ နေရာတွေ၊ တခြား ဦးစားပေးရမယ့်နေရာတွေမှာ လူသားချင်း စာနာထောက်ထား ကယ်ဆယ်ရေး နိုင်ငံတကာလိုအပ်ချက်တွေကို ဟန်ချက်ညှိနေရတယ်လို့ ဝန်ကြီး ရူဘီယိုက ပြောပါတယ်။
ကမ္ဘာပေါ်မှာ ချမ်းသာတဲ့ တခြားနိုင်ငံတွေ အများကြီး ရှိပြီး သူတို့ အားလုံး နည်းနည်းစီ ပါဝင်သင့်တယ်လို့ ဝန်ကြီး ရူဘီယိုက ပြောဆိုလာတာပါ။
မိမိတို့အနေနဲ့ မိမိတို့အပိုင်းကို ဆောင်ရွက်နေတာ ဖြစ်ပြီး မြန်မာနိုင်ငံမှာ မိမိတို့ကို သဘောမကျတဲ့ စစ်အစိုးရ ရှိနေတယ်လို့လည်း သူက ပြောပါတယ်။
မြန်မာနိုင်ငံမှာ လှုပ်ခတ်သွားတဲ့ ငလျင်လို ကြီးမားတဲ့ သဘာဝဘေးအန္တရာယ်တွေနဲ့ ကြုံရင် အမေရိကန်က ကယ်ဆယ်ရေး လုပ်သား၊အနံ့ခံခွေး ၂၀၀ လောက်နဲ့ အကူအညီပစ္စည်းတွေ ပေးပို့လေ့ ရှိခဲ့ပါတယ်။
အမေရိကန်ဟာ မြန်မာနိုင်ငံသို့ ဒေသတွင်း အခြေစိုက် အကြံပေး သုံးဦးနဲ့ အကူအညီ ပစ္စည်းတွေကိုပဲ ပေးပို့ခဲ့တာ ဖြစ်ပါတယ်။
အခုသီတင်းပတ် စောစောပိုင်းက အမေရိကန် နိုင်ငံခြားရေးဝန်ကြီးဌာနက တရားဝင် ပန်ကြားခဲ့ပေမယ့် စစ်ကောင်စီက ဝင်ရောက်ခွင့် မပေးဘူးလို့ ဝန်ကြီး ရူဘီယိုက ပြစ်တင် ပြောဆိုထားတာ ဖြစ်ပါတယ်။
Ref:BBC