မန္တလေး၊ ဧပြီ ၅
မန္တလေးတိုင်း အိုးဘိုအကျဉ်းထောင်မှာ ငလျင်လှုပ်ခတ်မှုကြောင့် လူ ၁၂ ဦး သေဆုံးခဲ့ပြီး အဲဒီထဲမှာ နိုင်ငံရေးအကျဉ်းသူခြောက်ဦး ပါဝင်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန် ရက် PPNM က အတည်ပြုထုတ်ပြန်ပါတယ်။
နိုင်ငံရေးအကျဉ်းသူ ခြောက်ဦးဟာ မတ်လ ၂၈ ရက်နေ့က လှုပ်ခတ်ခဲ့တဲ့ အင်အားပြင်းငလျင်ကြောင့် အိုးဘိုထောင်ရှိ အမျိုးသမီးအဆောင် ၁ နဲ့ အဆောင် ၂ ပြိုကျပျက်စီးမှုမှာ သေဆုံးခဲ့တာ ဖြစ်ပါတယ်။
သေဆုံးသွားတဲ့ နိုင်ငံရေးအကျဉ်းသူ ခြောက်ဦးမှာ မစိုးသူဇာခိုင်၊ ဒေါ်လဲ့လဲ့စိုး၊ ဒေါ်ခင်အုန်းရွှေ၊ မကေကေဝင်း၊ မပပဝင်းနဲ့ မဖူးဝေဝေတို့ ဖြစ်တယ်လို့ PPNM က အတည်ပြုထားပါတယ်။
ငလျင်လှုပ်ခတ်မှုကြောင့် အိုးဘိုထောင်ရှိ အဆောင်လေးဆောင် ပြိုကျပျက်စီးခဲ့ပြီး အဲဒီဖြစ်စဉ်အတွင်း ထိခိုက်ဒဏ်ရာရတဲ့ လူပေါင်း၄၀ ကျော်ဟာ ဆေးဝါးကုသခွင့်မရတဲ့ အခြေအနေနဲ့ ကြုံနေရတယ်လို့ PPNM က ထုတ်ပြန်ထားပါတယ်။
စစ်ကောင်စီရဲ့ အချက်အလက်တွေအရ ဧပြီ ၄ ရက် ညနေပိုင်းအထိ ငလျင်ဒဏ်ကြောင့် နိုင်ငံတဝန်းမှာ သေဆုံးသူ ၃၃၅၄ ဦး၊ ဒဏ်ရာရသူ ၄၅၀၈ ဦးနဲ့ ပျောက်ဆုံးသူ ၂၂၀ ရှိတယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ – Social Media