ပုလော၊ ဧပြီ ၅
တနင်္သာရီတိုင်း ပုလောမြို့နယ် ဆင်ထိုးကြီးကျေးရွာအနီး ဥယျာဉ်ခြံတစ်ခုမှာ ဒေသခံအမျိုးသားတစ်ဦး မြေမြှုပ်မိုင်း နင်းမိပေါက်ကွဲမှုကြောင့် သေဆုံးခဲ့တယ်လို့ ဒေသခံတွေက သံလွင်တိုင်းမ်ကို ပြောပါတယ်။
ပြီးခဲ့တဲ့ ဧပြီ ၃ ရက်နေ့ မနက် ၁၀ နာရီအချိန်ခန့်မှာ ဆင်ထိုးကြီးကျေးရွာနေ အသက် ၆၀ ကျော်အ ရွယ် ဦးသိန်းသိန်းဟာ သူပိုင်တဲ့ဥယျာဉ်ခြံမှာ သီဟိုဠ်စေ့ဝင်ကောက်စဉ် မြေမြှုပ်မိုင်းနင်းမိခဲ့တာပါ။
မြေမြှုပ်မိုင်းကြောင့် ဦးသိန်းသိန်းဟာ ခြေကျင်းဝတ်ပြတ်တောက်ဒဏ်ရာရရှိပြီးနောက် သွေးထွက်လွန်ကာ သေဆုံးခဲ့ပါတယ်။
ဒေသခံတွေရဲ့ ပြောပြချက်အရ ဆင်ထိုးကြီးကျေးရွာအနီးပတ်ဝန်းကျင်မှာ ပြီးခဲ့တဲ့နှစ် သြဂုတ်လကနေ နိုဝင်ဘာလအထိ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA ပူးပေါင်းတပ်တို့ကြား နှစ်ဖက်တိုက်ပွဲ အပြင်းအထန် ဖြစ်ပွားခဲ့တာပါ။
အဲဒီတိုက်ပွဲပြီးနောက် ဆင်ထိုးကြီးကျေးရွာအနီး ပတ်ဝန်းကျင်မှာ မြေမြှုပ်မိုင်းကြောင့် ဒေသခံပြည်သူ သုံးဦးထက်မနည်း ထိခိုက်ဒဏ်ရာရရှိခဲ့ပြီး အခုတစ်ကြိမ်မှာ လူသေဆုံးမှုအထိ ဖြစ်ပေါ်ခဲ့ပါတယ်။
သတင်း – သံလွင်တိုင်းမ်
ဓာတ်ပုံ – Social Media