ရေး ၊ ဧပြီ ၅

မြန်မာနိုင်ငံတောင်ပိုင်းဒေသဖြစ်တဲ့ ကရင်နီအပါအဝင် မွန်၊ကရင်နဲ့ တနင်္သာရီတို့မှာ ပြီးခဲ့တဲ့ မတ်လအတွင်း အရပ်သားပြည်သူ ၂၈ ဦးထက်မနည်း သေဆုံးခဲ့ရတယ်လို့ ရာမညအင်စတီကျုသုတေသနဌာန RICE က ဧပြီ ၃ ရက်နေ့မှာ အစီရင်ခံစာ ထုတ်ပြန်ပါတယ်။

စစ်ကောင်စီနဲ့ တော်လှန်ရေးအင်အားစုတွေကြား မတ်လအတွင်း ဖြစ်ပွားခဲ့တဲ့ တိုက်ပွဲတွေအပါအ ဝင် လက်နက်ကြီးနဲ့ လေကြောင်းတိုက်ခိုက်မှုကြောင့် အိုးအိမ်ထိခိုက်ပျက်စီးမှု၊ မီးလောင်မှု၊ အရပ် သားထိခိုက်သေဆုံးမှုနဲ့ ဖမ်းဆီးခံရမှုတွေကို RICE က ဖော်ပြထားတာပါ။

အရပ်သားသေဆုံးမှုမှာတော့ ကရင်နီမှာ ၄ ဦး၊ ကရင်မှာ ၂ ဦး၊ မွန်မှာ ၈ ဦးနဲ့ တနင်္သာရီမှာ ၁၄ ဦးအထိ အများဆုံးရှိခဲ့သလို အဲဒီဒေသလေးခုစလုံးမှာ ၇၉ ဦး ထိခိုက်ဒဏ်ရာရရှိခဲ့ပြီး တနင်္သာရီက အများဆုံးဖြစ်ပါတယ်။

သေဆုံးသူနဲ့ ထိခိုက်ဒဏ်ရာရသူအများစုဟာ တိုက်ပွဲအတွင်း လက်နက်ကြီးပစ်ခတ်ခံရတာ၊ ဒရုန်းထိမှန်တာ၊ မြေမြှုပ်မိုင်းနင်းမိသေဆုံးတာကြောင့် ဖြစ်တယ်လို့ အစီရင်ခံစာက ဖော်ပြပါတယ်။

RICE ရဲ့ အချက်အလက်တွေအရ မွန်မှာ ၁၉ ဦးနဲ့ တနင်္သာရီမှာ ၅၁ ဦးအထိ အများဆုံး ဖမ်းဆီးခံခဲ့ရပြီး အများစုဟာ တော်လှန်ရေးအင်အားစုတွေနဲ့ ဆက်နွယ်တယ်လို့ စွပ်စွဲခံရသူတွေအပါအဝင် စစ်မှုထမ်းဥပဒေကြောင့် အစုလိုက်အပြုံလိုက် အတင်းအဓမ္မ ဖမ်းဆီးခံရသူလည်း ပါဝင်ပါတယ်။

တောင်ပိုင်းဒေသတွေမှာ နှစ်ဘက်ထိတွေ့တိုက်ပွဲ ၁၈ ကြိမ်ဖြစ်ပွားခဲ့တဲ့ထဲမှာ တနင်္သာရီတိုင်းက ၁၃ ကြိမ်နဲ့ အများဆုံးရှိခဲ့သလို တစ်ဘက်ပစ်ခတ်မှု ၁၃ ကြိမ်ထဲမှာလည်း တနင်္သာရီတိုင်းက ၁၀ ကြိမ်ထက်မနည်း ရှိခဲ့တာပါ။

စစ်ကောင်စီရဲ့ လက်နက်ကြီးပစ်ခတ်မှု ၇၄ ကြိမ်နဲ့ လေကြောင်းတိုက်ခိုက်မှု ၅၄ ကြိမ် ဖြစ်ပွားခဲ့ပြီး တနင်္သာရီနဲ့ ကရင်ပြည်နယ်တို့က အများဆုံးခံခဲ့ရသလို ဒရုန်းတိုက်ခိုက်မှု ၁၆ ကြိမ်ရှိတဲ့ထဲက ကရင်နီကလွဲရင် ကျန်တောင်ပိုင်းဒေသသုံးခုစလုံး တိုက်ခိုက်ခံခဲ့ရပါတယ်။

အဲဒီလက်နက်ကြီးနဲ့ လေကြောင်းတိုက်ခိုက်မှုကြောင့် ကရင်နီအပါအဝင် မွန်၊ ကရင်နဲ့ တနင်္သာရီတို့မှာ အရပ်သားနေအိမ် ၁၉ လုံး ထိခိုက်ပျက်စီးခံရပြီး ၁၂၁ လုံးအထိ မီးလောင်ပျက်စီးခဲ့ရတယ်လို့ အစီရင်ခံစာကနေ သိရပါတယ်။

ဖော်ပြထားတဲ့ အချက်အလက်တွေဟာ လက်လှမ်းမီရာ လွတ်လပ်တဲ့ သတင်းမီဒီယာတွေအပေါ်အခြေခံပြီး ပြန်လည်ပြုစုထားဖြစ်တာကြောင့် မြေပြင်အခြေအနေနဲ့ အနည်းငယ်ကွာဟမှု ရှိနိုင်တယ်လို့ RICE အဖွဲ့က ထုတ်ပြန်ထားပါတယ်။

သတင်း – သံလွင်တိုင်းမ်

ဓာတ်ပုံ – KHRG

Leave a Reply

This site uses Akismet to reduce spam. Learn how your comment data is processed.