သပိတ်ကျင်း၊ ဧပြီ ၄
ညီနောင်မဟာမိတ်သုံးဖွဲ့မှ ငလျင်ဒဏ်သင့်ပြည်သူတွေရဲ့ အခက်အခဲတွေကို စာနာထောက်ထားတဲ့အနေနဲ့ တစ်လတာ တစ်ဖက်သတ် အပစ်ရပ်ထားပေမယ့် စစ်ကောင်စီက ထိုးစစ်တွေနဲ့ စစ်အင်အားဖြည့်တင်းမှုတွေ ပြုလုပ်နေတယ်လို့ တအာင်းတပ်မတော် TNLA က ဧပြီ ၃ ရက်နေ့မှာ ထုတ်ပြန်ပါတယ်။
ညီနောင်မဟာမိတ်သုံးဖွဲ့က အပစ်ရပ်ကြေညာထားပေမယ့် စစ်ကောင်စီဟာ ဧပြီ ၃ ရက် နေ့လယ် ၁၂ နာရီအချိန်ခန့်မှာ စစ်ယာဉ်တန်း ၇ စီးနဲ့ လူအင်အားဖြည့်တင်းပြီး အင်တောမှ ကျောက်ဂူ၊ တောင်ချေ၊ အမြောက်တပ် ၉၀၂ ကို စစ်ကူအင်အား ဖြည့်တင်းနေတယ်လို့ ဆိုပါတယ်။
ဒါ့အပြင် သပိတ်ကျင်းမြို့နယ် ၇ မိုင်မှာလည်း လေကြောင်းကနေ ဂျက်ဖိုက်တာ လေယာဉ်နဲ့ လေးကြိမ် လာရောက်ပြီး ဗုံး ၈ လုံးထက်မနည်း ကြဲချတိုက်ခိုက်ခဲ့တယ်လို့ TNLA ရဲ့ ထုတ်ပြန်ချက်မှာ ဖော်ပြပါရှိပါတယ်။
စစ်ကောင်စီကလည်း ဧပြီ ၂ ရက်နေ့ကနေ ၂၀ ရက်နေ့ထိ အပစ်ရပ်တယ်လို့ ကြေညာထားပြီး နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက်လို့ ထုတ်ပြန်ကြေညာထားပေမယ့် လေကြောင်းကနေ နေ့စဉ် အသုံးပြုတိုက်ခိုက်နေတယ်လို့ ဖော်ပြထားပါတယ်။
ပြီးခဲ့တဲ့ မတ် ၂၈ ရက်နေ့က မြန်မာနိုင်ငံမှာ ဖျက်အားပြင်းလှုပ်ခတ်ခဲ့တဲ့ ငလျင်ဒဏ်ကြောင့် နိုင်ငံတဝန်းမှာ သေဆုံးသူ ၃၀၈၅ ဦး၊ ဒဏ်ရာရသူ ၄၇၁၅ ဦးနဲ့ ပျောက်ဆုံးနေသူ ၃၄၁ ဦးအထိ ရှိတယ်လို့ စစ်ကောင်စီရဲ့ ထုတ်ပြန်ချက်တွေအရ သိရပါတယ်။
သတင်း – သံလွင်တိုင်းမ်
ဓာတ်ပုံ – TNLA