နေပြည်တော်၊ ဧပြီ ၃
ငလျင်ဘေးကယ်ဆယ်ရေးနဲ့ ပြန်လည်ထူထောင်ရေးလုပ်ဖို့အတွက် ၂၁ ရက်ကြာ ယာယီပစ်ခတ်မှုရပ်စဲထားမယ်လို့ တပ်မတော်ကာကွယ်ရေးဦးစီးချုပ်ရုံးက ဧပြီ ၂ ရက်နေ့မှာ ထုတ်ပြန်လာပါတယ်။
ငလျင်ဒဏ်သင့်ပြည်သူတွေကို ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ အရှိန်အ ဟုန်နဲ့လုပ်နိုင်စေဖို့ ရည်ရွယ်ပြီး ဧပြီ ၂ ရက်ကနေ ၂၂ ရက်အထိကို ယာယီပစ်ခတ်တိုက်ခိုက်မှုရပ် စဲရေးကာလအဖြစ် ထုတ်ပြန်လိုက်တယ်လို့ ဆိုပါတယ်။
ဒါပေမယ့် တော်လှန်ရေးတပ်တွေအနေနဲ့ အများပြည်သူသွားလာအသုံးပြုနေတဲ့ ဆက်သွယ်ရေး လမ်းကြောင်းတွေကို နှောင့်ယှက်တိုက်ခိုက်ဖျက်စီးတာလုပ်ရင်တော့ လိုအပ်သလိုတုံ့ပြန်မှုတွေလုပ်မယ်လို့တော့ ပြောဆိုထားပါတယ်။
စစ်ကောင်စီအနေနဲ့ ဒီလိုထုတ်ပြန်ထားပေမယ့် တစ်ဖက်မှာတော့ မြို့ရွာတွေကိုဗုံးကြဲမှုတာ၊ တရုတ် ကြက်ခြေနီကယ်ဆယ်ရေးယာဉ်တန်းကို နောင်ချိုမြို့နယ်မှာ ပစ်ခတ်တိုက်ခိုက်ခဲ့မှုနဲ့ မြို့ရွာအချို့မှာ စစ်မှုထမ်းစုဆောင်းတာတွေ ဆက်လက်လုပ်ဆောင်နေဆဲဖြစ်ပါတယ်။
မတ် ၂၈ ရက်နေ့မှာ အင်အားပြင်းလှုပ်ခတ်ခဲ့တဲ့ ငလျင်ကြီးတစ်ခုနဲ့ နောက်ဆက်တွဲ ငလျင်တွေကြောင့် စစ်ကိုင်းတိုင်း၊ မန္တလေးတိုင်း၊ ရှမ်းပြည်နယ်၊ ပဲခူးတိုင်းနဲ့ နေပြည်တော်အပါအဝင် မြန်မာ နိုင်ငံအတွင်းရှိ ဒေသအများအပြားမှာ လူထုတွေရဲ့ အသက်အိုးအိမ်စည်းစိမ်တွေ စာသင်ကျောင်းတွေ ဆေးရုံဆေးခန်းတွေ ပြိုကျပျက်စီးခဲ့ရတာပါ။
ငလျင်ကယ်ဆယ်ရေးလုပ်ငန်းတွေ အမြန်ဆုံးထိရောက်စွာ ဆောင်ရွက်နိုင်ဖို့ ထိုးစစ်တွေကို ပြုလုပ်မှာမဟုတ်ဘဲ ဧပြီတစ်လတာ တစ်ဖက်သတ် အပစ်ရပ်ကြောင်း MNDAA ၊ TNLA နဲ့ AA ညီနောင်မဟာမိတ် ၃ ဖွဲ့က ဧပြီ၁ရက်နေ့မှာ ထုတ်ပြန်ကြေညာထားပါတယ်။
အမျိုးသားညီညွတ်ရေးအစိုးရ NUG ကလည်း ငလျင်ဖြစ်ပွားရာဒေသတွေမှာ ထိုးစစ်နှစ်ပတ်ရပ်နားမယ်လို့ ကြေညာထားတာပါ။
စစ်ကောင်စီရဲ့ ပစ်ခတ်တိုက်ခိုက်မှုရပ်စဲကြောင်း ကြေညာထားတာနဲ့ ပတ်သက်ပြီး KIO ကလည်း ယာယီအပစ်ခတ်ရပ်စဲရေး ဧပြီ၂ရက်နေ့ညပိုင်းမှာ ပြန်လည်ထုတ်ပြန်ခဲ့သလို စစ်တပ်ဘက်က လည်း လိုက်နာဖို့လိုအပ်တယ်လို့ ထည့်သွင်းပြောဆိုထားပါတယ်။
သတင်း – သံလွင်တိုင်းမ်
ဓာတ်ပုံ-MOI