ဖာပွန်၊ ဧပြီ ၄
စစ်ကောင်စီက ယာယီပစ်ခတ်တိုက်ခိုက်မှု ရပ်စဲမယ်လို့ ကြေညာထားပေမယ့် ကရင်အမျိုးသားအစည်းအရုံး KNU ဖာပွန်ခရိုင် ထိန်းချုပ်နယ်မြေမှာ လေယာဉ်နဲ့ဗုံးကြဲခံရတာကြောင့် လသားအ ရွယ် ကလေးတစ်ဦးအပါအဝင် ကလေးငယ်နှစ်ဦး သေဆုံးခဲ့တယ်လို့ KNU တပ်မဟာ ၅ ပြောခွင့်ရ ဗိုလ်မှူးကြီးစောကလယ်ဒိုက သံလွင်တိုင်းမ်ကို ပြောပါတယ်။
ငလျင်ဒဏ်ကြောင့် ထိခိုက်ခံစားနေရတဲ့ ပြည်သူလူထုတွေကို စာနာထောက်ထားမှုအပါအဝင် ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို အရှိန်အဟုန်နဲ့ ဆောင်ရွက်နိုင်စေဖို့အ တွက် ဧပြီ ၂ ရက်နေ့ကနေ ၂၂ ရက်နေ့အထိ အပစ်ရပ်ကြောင်း စစ်ကောင်စီက ကြေညာထားပါတယ်။
ဒါပေမယ့် စစ်ကောင်စီဟာ ယာယီပစ်ခတ်တိုက်ခိုက်မှု ရပ်စဲရေးကာလအဖြစ် ထုတ်ပြန်ထားပေမယ့် ဧပြီ ၂ ရက်နေ့က KNU ဖာပွန်ခရိုင် တပ်မဟာ ၅ နယ်မြေ လေးဖိုးထအုပ်စု နေကာကျေးရွာထဲကို လေယာဉ်နဲ့ ဗုံးတွေ လာရောက်ကြဲချတိုက်ခိုက်ခဲ့တာ ဖြစ်ပါတယ်။
ဗုံးကြဲမှုကြောင့် ၃ လသားအရွယ်ကလေး တစ်ဦး၊ ၁၂ နှစ်အရွယ် ကလေးတစ်ဦး၊ စုစုပေါင်း ကလေး ၂ ဦး သေဆုံးခဲ့ပြီး အသက် ၁၀ နှစ်အရွယ် ကလေးတစ်ဦးအပါအဝင် အသက် ၅၀ အရွယ် အမျိုး သားတစ်ဦးနဲ့ အမျိုးသမီးတစ်ဦး စုစုပေါင်း ၃ ဦး ထိခိုက်ဒဏ်ရာရရှိခဲ့တာပါ။
နှစ်ဖက်တိုက်ပွဲတွေမရှိဘဲ ဒီဗုံးကြဲတိုက်ခိုက်မှုဟာ အရပ်သားပြည်သူတွေကို တမင်သက်သက် ရည်ရွယ်တိုက်ခိုက်ခဲ့တာဖြစ်တယ်လို့ ဗိုလ်မှူးကြီးစောကလယ်ဒိုက ပြောပါတယ်။
ဒါ့အပြင် စစ်ကောင်စီရဲ့ အပစ်အခတ်ရပ်စဲရေးဆိုတာဟာ မြေပြင်မှာ စစ်ရေးမလှုပ်ရှားနိုင်တဲ့ ခြေ လျင်တပ်ပဲ စစ်ရေးရပ်စဲပြီး လှုပ်ရှားနိုင်တဲ့ လေယာဉ်ပျံကတော့ မရပ်စဲဘူးလို့ အဓိပ္ပါယ်သက် ရောက်သွားကြောင်း ဗိုလ်မှူးကြီးစောကလယ်ဒိုက ရှုမြင်ထားပါတယ်။
KNU ဖာပွန်ခရိုင် တပ်မဟာ ၅ နယ်မြေထဲမှာ ပြီးခဲ့တဲ့ မတ်လကုန်ပိုင်းက စစ်ကောင်စီတပ်နဲ့ KNLA တပ်တို့အကြား နှစ်ဖက်စစ်ရေးတိုက်ပွဲတွေ ဖြစ်ပွားတာသိပ်မရှိဘဲ ငြိမ်သက်နေပေမယ့် စစ်ကောင် စီတပ်က ဖာပွန်ခရိုင်ထဲက ကျန်ရှိနေတဲ့ သူတို့စခန်းတွေထဲကို လက်နက်ခဲယမ်း ရိက္ခာတွေ လာရောက်ပို့ဆောင်ထားတယ်လို့လည်း သိရပါတယ်။
သတင်း – သံလွင်တိုင်းမ်
ဓာတ်ပုံ-KHRG