ငလျင်ကယ်ဆယ်ရေးကာလ စစ်ကောင်စီရဲ့ ယာယီအပစ်ခတ်ရပ်စဲရေး တည်နိုင်မလား

နေပြည်တော် ၊ ဧပြီ ၄

မြန်မာနိုင်ငံမှာအင်အားပြင်း လှုပ်ခတ်ခဲ့တဲ့ ငလျင်ကြောင့် ကူညီကယ်ဆယ်ရေးတွေ ထိရောက်ဖို့ လက်နက်ကိုင်တော်လှန်ရေးအဖွဲ့တွေဘက်က တစ်ဘက်သတ် အပစ်ခတ်ရပ်စဲတယ်လို့ ကြေညာပြီးနောက် စစ်ကောင်စီလည်း အပစ်ရပ်ကြေညာလာပါတယ်။

တည်ငြိမ်အေးချမ်းရေးကို ရှေးရှုကာ စစ်တပ်အနေနဲ့ ဧပြီ ၂ ရက်နေ့ကနေ ၂၂ ရက်နေ့အထိ ယာယီပစ်ခတ်တိုက်ခိုက်မှုရပ်စဲရေးကာလအဖြစ် တပ်မတော်ကာကွယ်ရေးဦးစီးချုပ်ရုံးက ဧပြီ ၂ ရက်နေ့ ညပိုင်းမှာ ထုတ်ပြန်ခဲ့တာပါ။

ဒါဟာ ငလျင်ဒဏ်ကြောင့် ထိခိုက်ခံစားနေရတဲ့ တစ်နိုင်ငံလုံးမှာရှိတဲ့ပြည်သူလူထုကို စာနာထောက် ထားပြီး ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ အရှိန်အဟုန်နဲ့ ဆောင်ရွက်နိုင်စေဖို့ ရည်ရွယ်တယ်လို့ ဆိုပါတယ်။

CDM ဗိုလ်ကြီး ဇင်ယော်က ငလျင်ကယ်ဆယ်ရေးအတွက် EAO တွေအပါအဝင် NUG ဘက်က စပြီး အပစ်ရပ်ဖို့ ကြေညာခဲ့တဲ့အပေါ် စစ်ကောင်စီက အရှက်ပြေကြေညာရတာဖြစ်လို့ တိုက်ခိုက်မှုတွေ အချိန်မရွေးလုပ်လာနိုင်တယ်လို့ သုံးသပ်ပါတယ်။

“စစ်ကောင်စီက ဒီအနေအထားမှာ တိုင်းရင်းသားတွေ ERO တွေ ရပ်တဲ့အချိန်မှာ သူတို့မရပ်ဘဲနဲ့သူတို့အခွင့်ကောင်းယူပြီး တိုက်ခိုက်လာမယ့်ပုံစံမျိုး မြင်ရတယ်။ ဘာလို့ဆို သူတို့က အထိနာနေတော့ ရှုံးမဲမဲနေတဲ့ အနေအထားမျိုး ဖြစ်ပါတယ်ခင်ဗျ။ အဲဒီတော့မြေပြင်တိုက်ခိုက်မှုတွေရော လေ ကြောင်း တိုက်ခိုက်မှုတွေရော စစ်ကောင်စီဘက်က အချိန်မရွေးလုပ်လာနိုင်ပါတယ်။ သူ စကားမတည်ပါဘူး။ ဒါက ERO တွေဘက်နဲ့ ကာကွယ်ရေး တော်လှန်ရေးအင်အားစုတွေဘက်ကနေ ဒါကို (ယာယီအပစ်ခတ်ရပ်စဲရေး) ထုတ်ပြန်လို့သာ သူကအရှက်ပြေလိုက်ပြီး ထုတ်ပြန်ရတာ ဖြစ်ပါတယ်ဗျ” လို့ ဆိုပါတယ်။

စစ်ကောင်စီကတော့ အပစ်ရပ်ထားတဲ့ကာလအတွင်း တိုင်းရင်းသားလက်နက်ကိုင်အဖွဲ့တွေနဲ့ အ ခြားလက်နက်ကိုင်အဖွဲ့တွေအနေနဲ့ ငြိမ်းချမ်းရေးကို ထိခိုက်စေမယ့် အင်အားစုဆောင်းတာ၊ ပြင် ဆင်စုဖွဲ့တာ၊ နယ်မြေချဲ့ထွင်တာတွေလုပ်လာရင် စစ်တပ်အနေနဲ့ လိုအပ်တဲ့အရေးယူ တုံ့ပြန်မှုတွေ ဆောင်ရွက်သွားမယ်လို့ ဆိုပါတယ်။

ဒါ့အပြင် အများပြည်သူ သွားလာအသုံးပြုနေတဲ့ ဆက်သွယ်ရေးလမ်းကြောင်းတွေကို နှောင့်ယှက်တိုက်ခိုက်တာနဲ့ ထိခိုက်ပျက်စီးစေတာ၊ ပြည်သူတွေရဲ့ အသက်အိုးအိမ်စည်းစိမ်ကို ထိခိုက် ပျက်စီးစေတာ၊ လုံခြုံရေးတပ်ဖွဲ့ဝင်တွေရဲ့ တပ်စခန်းတွေကို တိုက်ခိုက်တာ၊ တပ်ဌာနချုပ်တွေကို နှောင့် ယှက် တိုက်ခိုက်တာတွေ မပြုလုပ်ဖို့ အပစ်ရပ်ကြေညာချက်မှာ ဖော်ပြထားတာပါ။

လေ့လာသူတွေကတော့ ဒီသတိပေးချက်တွေဟာ အခြေအနေအပေါ်လိုက်ပြီး စစ်ရေး၊ နိုင်ငံရေးအရ အသာစီးရယူနိုင်တယ်ဆိုတဲ့ ယူဆချက်နဲ့ တုံ့ပြန်မှုဖြစ်သလို ယာယီအပစ်ရပ်ကာလအတွင်းမှာလည်း လက်နက်ခဲယမ်း၊ လူအင်အား၊ ရိက္ခာ ရွှေ့ပြောင်းဖြည့်တင်းတာတွေ လုပ်လေ့ရှိတယ်လို့ ထောက်ပြပါတယ်။

ကချင်လွတ်လပ်ရေးတပ်မတော် KIO ကလည်း ဧပြီ ၂ ရက်နေ့ကနေ ၂၂ ရက်နေ့အထိ ခုခံကာကွယ် ခြင်းကလွဲရင် ထိုးစစ်ဆင်တိုက်ခိုက်မှုတွေကို ရပ်ဆိုင်းထားမယ်လို့ ဧပြီ ၂ ရက်နေ့မှာ ကြေညာခဲ့ပြီး ကာကွယ်ရေးဦးစီးချုပ်ရုံးရဲ့ အပစ်ရပ်စဲရေးကြေညာချက်ပါ အချက်အလက်တွေကို စစ်တပ်ဘက်ကလည်းလိုက်နာဖို့ လိုအပ်တယ်လို့ ဆိုပါတယ်။

မြန်မာ့အရေးလေ့လာသုံးသပ်သူ ဒေါက်တာ စိုင်းကြည်ဇင်စိုးက စစ်တပ်ကြေညာထားတဲ့ အပစ်ရပ်ကာလအတွင်း တော်လှန်ရေးအဖွဲ့တွေကို လှုပ်ရှားမှုတစ်ခုခုနဲ့ စွပ်စွဲပြီး တိုက်ခိုက်တာတွေရှိနိုင်တယ် လို့ သုံးသပ်ပါတယ်။

“အခုရက် ၂၀ အတွင်းမှာတော့ ဖြစ်နိုင်တာ (စကစ) သူ့အနေနဲ့ လှုပ်ရှားမှုတစ်ခုခု ရှိတဲ့ဟာမျိုးတွေနဲ့ ပတ်သက်ပြီး သူစွပ်စွဲပြီးတော့ တိုက်တာခိုက်တာမျိုးတော့ ရှိကောင်းရှိနိုင်တယ်။ ဒါပေမယ့် တတ် နိုင်သလောက်တော့ ရှောင်လိမ့်မယ်လို့ ယူဆလို့ရတယ်။ အထူးသဖြင့် နိုင်ငံတကာရဲ့ ကူညီကယ် ဆယ်ရေးနဲ့ဝင်လာပြီးတော့ သူနဲ့ပူးပေါင်းဆောင်ရွက်ပြီး ကူညီကယ်ဆယ်ရေးလုပ်ဖို့ သူ့အနေနဲ့ ကြိုး စားကောင်း ကြိုးစားနေမယ်။ ဒါပေမယ့် တပ်အပ်တော့ ပြောလို့မရဘူး” လို့ ဆိုပါတယ်။

ပြီးခဲ့တဲ့ မတ် ၂၈ ရက်နေ့က လှုပ်ခတ်ခဲ့တဲ့ အင်အားပြင်းငလျင်နဲ့ နောက်ဆက်တွဲငလျင်ငယ်တွေကြောင့် ငလျင်ဘေးသင့်ဒေသတွေမှာ လမ်းတံတား၊ အဆောက်အဦတွေ ထိခိုက်ပျက်စီးခဲ့ရပြီး ပြည်သူတွေထောင်ချီ သေဆုံးခဲ့ရသလို ထိခိုက်ဒဏ်ရာရတာတွေလည်း ဖြစ်ပေါ်ခဲ့တာပါ။

ဒီအခြေအနေမှာ စစ်ကောင်စီဘက်က စစ်ရေးနဲ့ နိုင်ငံရေးအရ အသာစီးရယူနိုင်ဖို့ ကြိုးစားတာရှိနေပြီး အထူးသဖြင့် ငလျင်လှုပ်ခတ်ပြီးချိန်မှာလည်း လေယာဉ်နဲ့ ဗုံးကြဲတိုက်ခိုက်တာတွေ ပြုလုပ်ခဲ့တာလို့ လေ့လာသူတွေက ထောက်ပြပါတယ်။

လက်နက်ကိုင်တိုက်ပွဲတွေဖြစ်ပွားနေတဲ့ မြန်မာနိုင်ငံမှာ ငလျင်ဘေးသင့်ပြည်သူတွေကို ကယ်ဆယ်နိုင်ဖို့နဲ့ ပြန်လည်ထူထောင်ရေးအတွက် အမျိုးသားညီညွတ်ရေးအစိုးရ NUG ကစပြီး နှစ်ပတ်တာ တစ်ဘက်သတ် အပစ်ရပ်ကြောင်း မတ် ၃၀ ရက်နေ့မှာ ကြေညာခဲ့တာပါ။

ညီနောင်မဟာမိတ်သုံးဖွဲ့ဖြစ်တဲ့ MNDAA ၊ TNLA နဲ့ AA တို့လည်း ငလျင်ကယ်ဆယ်ရေးလုပ်ငန်းတွေ အမြန်ဆုံးထိရောက်စွာ ဆောင်ရွက်နိုင်ဖို့ ထိုးစစ်တွေကို ပြုလုပ်မှာမဟုတ်ဘဲ ဧပြီတစ်လတာ တစ်ဖက်သတ် အပစ်ရပ်ကြောင်း ဧပြီ ၁ ရက်နေ့မှာ ထုတ်ပြန်ခဲ့ပါတယ်။

စစ်ခေါင်းဆောင်ကတော့ တချို့ တိုင်းရင်းသားလက်နက်ကိုင်အဖွဲ့တွေအနေနဲ့ လက်ရှိအခြေအနေမှာ တိုက်ပွဲဖော်ဆောင်တာမရှိပေမယ့် စုဖွဲ့လေ့ကျင့်ပြင်ဆင်နေတာဟာ တိုက်ခိုက်တာဖြစ်လို့ စစ်တပ်အနေနဲ့ လိုအပ်တဲ့ ကာကွယ်ရေးလုပ်ငန်းတွေ ဆက်လုပ်သွားမယ်လို့ ဧပြီ ၁ ရက်နေ့မှာ ပြောကြားထားတာပါ။

အဲဒီနေ့ ညပိုင်းမှာ ငလျင်ထောက်ပံ့ပစ္စည်းတွေ သယ်ဆောင်လာတဲ့ တရုတ်ကြက်ခြေနီယာဉ်တန်းကို စစ်တပ်က ရှမ်းပြည်နယ်မြောက်ပိုင်း နောင်ချိုမြို့နယ် အုမ္မတီးရွာအနီးမှာ ပစ်ခတ်ခဲ့ပါတယ်။ ဒီအ ပေါ် စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက မိုးပေါ်ထောင်ပစ်ခတ်ခဲ့တယ်လို့ ဧပြီ ၂ ရက်နေ့မှာ ဝန်ခံထားတာပါ။

ဒီအပေါ် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ငလျင်ဘေးအတွက် မြန်မာနိုင်ငံကိုလာတဲ့ တရုတ်ကယ်ဆယ်ရေးအဖွဲ့တွေနဲ့ ကယ်ဆယ်ရေးပစ္စည်းတွေရဲ့ လုံခြုံရေးကို အာမခံချက်ပေးဖို့ ဧပြီ ၂ ရက်မှာ ပြောဆိုခဲ့ပါတယ်။

အဲဒီနောက် စစ်ကောင်စီဘက်က ရက်ပေါင်း ၂၀ ယာယီအပစ်ခတ်ရပ်စဲဖို့ ကြေညာခဲ့သလို စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကလည်း ၆ ကြိမ်မြောက် BIMSTEC ထိပ်သီးအစည်းအဝေးကို တက်ရောက်ဖို့ ဧပြီ ၃ ရက်နေ့မှာ ထိုင်းနိုင်ငံကို သွားရောက်မယ်ဆိုပြီး သတင်းထုတ်ပြန်ခဲ့တာပါ။

ဒေါက်တာ စိုင်းကြည်ဇင်စိုးက အစည်းအဝေးမှာ နိုင်ငံရေးကိစ္စရပ်တွေ အများကြီး ဆွေးနွေးမှာမဟုတ်ပေမယ့် တက်ရောက်လာတဲ့ နိုင်ငံတကာခေါင်းဆောင်တွေနဲ့ အလွတ်သဘော ညှိနှိုင်းတာမျိုး ရှိနိုင်တယ်လို့ သုံးသပ်ပါတယ်။

“BIMSTEC မှာတော့ တရားဝင် နိုင်ငံရေးအရ အများကြီးဆွေးနွေးမယ်လို့ ကျွန်တော့်အနေနဲ့ သိပ်မထင်ဘူး။ သူတို့ရဲ့ BIMSTEC ရည်ရွယ်ချက်နဲ့ တခြား အကြောင်းအရာတွေ ရှိတော့လေ။ ဒါပေမယ့် သူတို့အနေနဲ့ ဒီလိုမျိုး တွေ့တဲ့အချိန်မှာ နိုင်ငံတကာခေါင်းဆောင်တွေနဲ့ ထိတွေ့မှုနဲ့ ရှိမယ် BIMSTEC ခေါင်းဆောင်တွေနဲ့ တွေ့တဲ့အချိန်မှာတော့ အလွတ်တန်းသဘော သူတို့အနေနဲ့ ညှိတာ နှိုင်းတာမျိုးတော့ ရှိကောင်းရှိနိုင်ပါတယ် ခင်ဗျ” လို့ ဆိုပါတယ်။

ဧပြီ ၃ ရက်နေ့ကနေ ၄ ရက်နေ့အထိ ကျင်းပတဲ့ BIMSTEC ထိပ်သီးအစည်းအဝေးမှာ စစ်ခေါင်း ဆောင်က တက်ရောက်လာကြတဲ့ ဒေသတွင်းနိုင်င်ငံတွေရဲ့ အစိုးရအဖွဲ့တာဝန်ရှိသူတွေနဲ့ တွေ့ဆုံပြီး မြန်မာနိုင်ငံကဖြစ်ပေါ်ခဲ့တဲ့ ငလျင်အခြေအနေနဲ့ပတ်သက်ပြီး ဆွေးနွေးဖို့ ရှိနေတာပါ။

ဒါ့အပြင် ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို ထိ‌ရောက်စွာ ဆောင်ရွက်နိုင်ဖို့ နိုင်ငံတကာနဲ့ ပူးပေါင်းဆောင်ရွက်နိုင်မယ့် အခြေအနေတွေကိုလည်း ဆွေးနွေးသွားမယ်လို့ စစ်ကောင်စီက သတင်းထုတ်ပြန်ခဲ့ပါတယ်။

အဲဒီ အစည်းအဝေးဟာ ထိုင်းဝန်ကြီးချုပ် ပေသွန်ထန်က သဘာပတိအဖြစ် ပထမဦးဆုံး တာဝန်ယူကျင်းပတာဖြစ်ပြီး ဒေသတွင်းအဖွဲ့ဝင်နိုင်ငံတွေဖြစ်တဲ့ ထိုင်း၊ မြန်မာ၊ သီရိလင်္ကာ၊ ဘင်္ဂလားဒေ့ရှ်၊ အိန္ဒိယ၊ နီပေါစတဲ့ နိုင်ငံ့ခေါင်းဆောင်တွေကို ဖိတ်ကြားထားတာပါ။

ဒီအပေါ် မြန်မာနိုင်ငံကိုယ်စားပြုအနေနဲ့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင် လှိုင်ကို အစည်းအဝေးတက်ရောက်ဖို့ ဖိတ်ကြားတဲ့အပေါ် ကန့်ကွက်မှုတွေလည်း ရှိနေပါတယ်။

BIMSTEC အဖွဲ့ကို ၁၉၉၇ ခုနှစ် ထိုင်းနိုင်ငံ ဘန်ကောက်မြို့ မှာ စတင်ထူထောင်ခဲ့ပြီး ဘင်္ဂလားပင် လယ်အော်နဲ့ နယ်နိမိတ်ချင်း ဆက်စပ်နေတဲ့ နိုင်ငံတွေကြား စီးပွားရေးပူး‌ပေါင်းဆောင်ရွက်မှုတွေ မြှင့်တင်ဖို့ ရည်ရွယ်ထားတာဖြစ်ပါတယ်။

သတင်း – သံလွင်တိုင်းမ်

ဓာတ်ပုံ-The Reporter News