မော်လမြိုင် ၊ ဧပြီ ၃
လက်ရှိ နိုင်ငံရေးအမြင်ကွဲပြားမှုတွေအပေါ် ကိုယ်စားပြုမှု စုံလင်စွာမပါဝင်နိုင်တဲ့အပေါ် မွန်တော် လှန်ရေး အင်အားစုတွေ ကန့်ကွက်ခဲ့ကြပေမယ့် မွန်အမျိုးသားရေးလုပ်ငန်းတွေ အကောင်အထည် ဖော်ဖို့ မွန်အမျိုးသားညီလာခံကို မော်လမြိုင်မြို့မှာ ဆက်လက်ကျင်းပနေပါတယ်။
ညီစားစခန်းမှာကျင်းပခဲ့တဲ့ မွန်အမျိုးသားညီလာခံကနေ ချမှတ်ခဲ့တဲ့ ဆုံးဖြတ်ချက် ၃ ရပ်ကို ချက် ချင်း အကောင်အထည်ဖော်ဖို့ လက်ရှိမွန်အမျိုးသားညီလာခံ ခေါ်ယူတာလို့ မွန်ပြည်သစ်ပါတီ ဗဟိုအလုပ်အမှု ဆောင်ကော်မတီဝင်လည်းဖြစ် ညီလာခံကျင်းပရေးကော်မတီဝင် နိုင်အောင်မငေးက ပြောပါတယ်။
ဧပြီ ၂ ရက်နေ့က စတင်ကျင်းပနေတဲ့ ၂၀၂၅ မွန်အမျိုးသားညီလာခံဟာ ၂၀၂၂ ခုနှစ် မေလအတွင်း ရေးချောင်း ဖျားဒေသရှိ ညီစားစခန်းမှာ သုံးရက်တာကျင်းပခဲ့တဲ့ ညီလာခံကနေ ဆုံးဖြတ်ချက် ၇ ချက်ရရှိထားပြီး အဲဒါကို ချက်ခြင်းအကောင်အထည်ဖော်ဖို့ အချက် ၃ ချက် ရှိတယ်လို့ ဆိုပါတယ်။
အဲဒီထဲမှာ မွန်ပြည်ဖွဲ့စည်းပုံအခြေခံဥပဒေ ရေးဆွဲရေး၊ အမျိုးသားရေးလှုပ်ရှားမှုတွေကို အကောင် အထည်ဖော်ဖို့ မွန်အမျိုးသားပေါင်းစည်းညှိနှိုင်းရေးအဖွဲ့ကို တည်ထောင်ဖို့နဲ့ မွန်နိုင်ငံရေးအခြေအ နေအရပ်ရပ်နဲ့ ကိုက်ညီတဲ့ မွန်ပြည်တည်ဆောက်ရေး ဖက်ဒရယ်အခြေခံမူကို သုံးသပ်ဖို့ ဖြစ်ပါတယ်။
မွန်ပြည်သစ်ပါတီ ဗဟို ဥက္ကဌ နိုင်ဟံသာက မွန်အမျိုးသားညီလာခံဟာ မွန်အမျိုးသားထုတွေကြား အမြင်သဘောထားတွေ စေ့စပ်ညှိနှိုင်းတဲ့နေရာလို့ ညီလာခံဖွင့်ပွဲအခမ်းအနားမိန့်ခွန်းမှာ ထည့်သွင်းပြောဆိုခဲ့ပါတယ်။
ညီလာခံ ပထမရက်မှာ မွန်သံဃာတော်တွေ မွန်ပြည်သစ်ပါတီ မွန်ညီညွတ်ရေးပါတီ ပြည်နယ်အ ဆင့် မြို့နယ်အဆင့် ဖိတ်ကြားသင့်တဲ့ အဖွဲ့အစည်းတွေနဲ့ ပုဂ္ဂိုလ်တွေ အရပ်ဘက်အဖွဲ့တွေစတဲ့ ကိုယ်စားလှယ်ပေါင်း ၂၄၆ ဦး တက်ရောက်ကြတယ်လို့ ညီလာခံကို ဦးဆောင်တဲ့ မွန်ပြည်သစ်ပါတီ ဗဟိုက ထုတ်ပြန်ထားပါတယ်။
အမျိုးသားရေးဆိုင်ရာ မူဝါဒတွေ၊ အခြေခံမူတွေကို အတည်ပြုသုံးသပ်ဖို့ ရည်ရွယ်ချက်တွေနဲ့ ၂၀၂၅ မွန်အမျိုးသားညီလာခံကို မွန်ပြည်သစ်ပါတီ ဗဟိုကနေ ဦးဆောင်ပြီး ဧပြီ ၂ ရက်နေ့ကနေ ၅ ရက်နေ့အထိ ကျင်းပသွားမှာ ဖြစ်ပါတယ်။
မွန်တော်လှန်ရေးအင်အားစုတွေကတော့ မူဝါဒတွေကို သုံးသပ်အတည်ပြုဖို့ လက်ရှိ အခြေအနေဟာ မသင့်တော်သလို တစ်ဘက်တည်းအမြင်နဲ့ ဆုံးဖြတ်လုပ်ဆောင်နေတာဟာ အမျိုးသားညီညွတ် ရေးကို ပိုမိုပျက်ပြားစေနိုင်တယ်လို့ ကြေညာထားပါတယ်။
သတင်း – သံလွင်တိုင်းမ်
ဓာတ်ပုံ-CJ