ကျုံဒိုး၊ ဧပြီ ၃

စစ်ဘေးနဲ့ ငလျင်ဘေးဒဏ်တွေကြောင့် ဒုက္ခရောက်နေကြရတဲ့ ပြည်သူတွေအပေါ် စစ်ကောင်စီတပ်က ငဲ့ညာမှုမရှိဘဲ ပြည်သူနေထိုင်ရာ ကျေးရွာတွေထဲကို ဧပြီလ ၁ ရက်နေ့က လက်နက်ကြီးတွေနဲ့ ပစ်ခတ်ခဲ့ရာ အမျိုးသမီးတစ်ဦး သေဆုံးသွားခဲ့တယ်လို့ KNU ဒူးပလာယာခရိုင်က သတင်းထုတ်ပြန်ပါတယ်။

ဧပြီ ၁ ရက်နေ့ ညနေ ၅ နာရီခွဲအချိန်က KNU ဒူးပလာယာခရိုင် တပ်မဟာ ၆ ကျုံဒိုးမြို့နယ် မြောက်ကြာ အင်းကျေးရွာအုပ်စု ဝိဇ္ဇာကုန်းကျေးရွာထဲကို စစ်ကောင်စီတပ် စကခ ၁၂ လက်အောက်ခံ တပ်သစ်အ မြောက်ကုန်းကနေ ၁၂၀ မမ လက်နက်ကြီးနဲ့ ၅ လုံး လှမ်းပစ်ခတ်ခဲ့တယ်လို့ ထုတ်ပြန်ချက်မှာ ဆိုထားပါတယ်။

စစ်ကောင်စီတပ်ရဲ့ လက်နက်ကြီးပစ်ခတ်မှုကြောင့် ဝိဇ္ဇာကုန်းကျေးရွာနေ အသက် ၅၇ နှစ်အရွယ်ရှိ အမျိုးသမီးတစ်ဦး နှလုံးဖောက်ကာ နောက်ပြန်လှဲကျသွားပြီး အုပ်ခုံနဲ့ ထိခိုက်မိတဲ့ ဒဏ်ရာကြောင့် သေဆုံးသွားခဲ့တယ်လို့ ထုတ်ပြန်ချက်မှာ ပါရှိပါတယ်။

တစ်နိုင်ငံလုံးမှာရှိတဲ့ ပြည်သူလူထုတွေဟာ စစ်ဘေးစစ်ဒဏ်တွေနဲ့ သဘာဝဘေးဒဏ်တွေကြောင့် အသက်အိုးအိမ်ပစ္စည်းတွေ ဆုံးရှုံးခဲ့ရပြီး ဒုက္ခရောက်နေရချိန်မှာ စစ်ကောင်စီတပ်က လူသားခြင်းစာနာထောက်ထားမှုမရှိဘဲ စစ်ရေးပစ်မှတ်မဟုတ်တဲ့ ဘာသာရေးအဆောက်အဦးတွေ ပြည်သူ့ဆေးရုံဆေးခန်းတွေ စာသင်ကျောင်းတွေနဲ့ အရပ်သားနေထိုင်ရာနေရာတွေကို ပစ်မှတ်ထားပြီး ရည်ရွယ်ချက်ရှိရှိနဲ့ ပစ်ခတ်တိုက်ခိုက်လျက်ရှိနေတယ်လို့ KNU ဒူးပလာယာခရိုင်က ဆိုပါတယ်။

KNU တပ်မဟာ ၁ နယ်မြေ ကျိုက်ထိုမြို့နယ် ခရွဲကျေးရွာထဲကိုလည်း စစ်ကောင်စီတပ်က ပြီးခဲ့တဲ့ မတ်လ ၂၉ ရက်နေ့က လက်နက်ကြီးနဲ့ ပစ်ခတ်ခဲ့တဲ့အတွက် ဒေသခံ ရွာသားတစ်ဦး ထိမှန်ဒဏ်ရာရရှိခဲ့သလို ဧပြီ ၁ ရက်နေ့ကလည်း KNU တပ်မဟာ ၆ နယ်မြေ ကော့ကရိတ်တောင်ပိုင်းကို စစ်ကောင်စီတပ်က လေယာဉ်နဲ့ ဗုံး ၂ လုံး လာရောက်ကြဲချခဲ့တယ်လို့ ဒေသတွင်း သတင်းရင်းမြစ်တွေကနေ သိရပါတယ်။

ငလျင်ဘေးအန္တရာယ်ကြောင့် ပြည်သူအများ ဒုက္ခများစွာ ကြုံနေရတဲ့အချိန် စစ်ကောင်စီတပ်က တော်လှန်ရေးတပ်ဖွဲ့တွေ ထိန်းချုပ်ထားတဲ့ နေရာဒေသတွေထဲကို လေကြောင်းတိုက်ခိုက်တာ လက် နက်ကြီးနဲ့ ပစ်ခတ်တာတွေ အဆက်မပြတ်ပြုလုပ်နေပြီး KNU ထိန်းချုပ်နယ်မြေထဲကိုလည်း ပစ် ခတ်တိုက်ခိုက်တာတွေ ပြုလုပ်လျက်ရှိနေတယ်လို့ သိရပါတယ်။

သတင်း – သံလွင်တိုင်းမ်

ဓာတ်ပုံ-KNU

Leave a Reply

This site uses Akismet to reduce spam. Learn how your comment data is processed.