မော်လမြိုင် ၊ ဧပြီ ၃

စစ်ကောင်စီအပြည့်အဝထိန်းချုပ်ထားတဲ့ မော်လမြိုင်မြို့မှာ လက်ရှိကျင်းပနေတဲ့ မွန်အမျိုးသားညီလာခံနဲ့ စစ်ကောင်စီကျင်းပမယ့် ရွေးကောက်ပွဲအပေါ် မွန်ပြည်ဖက်ဒရယ်ကောင်စီအနေနဲ့ လက်မခံဘူးလို့ ဧပြီ ၁ ရက်နေ့မှာ သဘောထားထုတ်ပြန်ပါတယ်။

အမျိုးသားရေးဆိုင်ရာ မူဝါဒတွေအပါအဝင် မွန်ပြည်ဖွဲ့စည်းပုံအခြေခံဥပဒေကို အတည်ပြုသုံးသပ်ဖို့ ရည်ရွယ်ချက်နဲ့ ၂၀၂၅ မွန်အမျိုးသားညီလာခံကို မွန်ပြည်သစ်ပါတီ ဗဟိုကနေ ဦးဆောင်ပြီး ဧပြီ ၂ ရက်နေ့ကစပြီး ကျင်းပနေတာပါ။

လက်ရှိအချိန်မှာ မွန်လူမျိုးတို့ရဲ့ နွေဦးတော်လှန်ရေးအပေါ် အမြင်နှစ်ဘက် ကွဲပြားနေခြင်းကြောင့် မွန်အမျိုးသားညီလာခံဆိုတဲ့ အမည်နာမနဲ့ ကျင်းပဖို့ မသင့်တော်ဘူးလို့ ယူဆတာကြောင့် လက်မခံနိုင်ဘူးလို့ မွန်ပြည်ဖက်ဒရယ်ကောင်စီက ပြောပါတယ်။

ညီလာခံမှာ စစ်အာဏာရှင်နဲ့ ပူးပေါင်းထားတဲ့ မွန်ညီညွတ်ရေးပါတီ ပါဝင်ဖို့ ခေါ်ယူထည့်သွင်းထားတာကြောင့် စစ်အာဏာရှင်ရဲ့ ခြေဖဝါးအောက်သို့ မိမိတို့လူမျိုးကို ဆွဲသွင်းသွားမယ့် ရည်ရွယ်ချက်ရှိတယ်လို့ ယူဆတာကြောင့် အပြည့်အဝဆန့်ကျင်သွားမယ်လို့ ဆိုပါတယ်။

မွန်ညီညွတ်ရေးပါတီဟာ မွန်လူမျိုးကိုယ်စားပြု တိုင်းရင်းသားနိုင်ငံရေးပါတီဖြစ်ပြီး အာဏာသိမ်းပြီးနောက်ပိုင်း စစ်ကောင်စီနဲ့ပူးပေါင်းဖို့ ကမ်းလှမ်းမှုအပေါ် ပါတီက လက်ခံခဲ့ပြီး လက်ရှိအချိန်အထိ ပြည်နယ်နဲ့ ဗဟိုအဆင့်မှာ ကိုယ်စားလှယ်နှစ်ဦး ပါဝင်နေတာပါ။

စစ်အာဏာရှင်စနစ်အောက်မှာ မွန်အမျိုးသားရေးဆွေးနွေးခြင်းဟာ အပြောသက်သက်သာဖြစ်ပြီး တိုက်ပွဲဖြစ်ပွားခြင်းမရှိတဲ့ နေရာတွေကိုတောင် စစ်ကောင်စီကဗုံးကြဲ ရွာတွေကို မီးရှို့နေတာကို ကြည့်ရင် ဘယ်အခွင့်အရေးမှ မရနိုင်တာ ထင်ရှားတယ်လို့ မွန်ပြည်ဖက်ဒရယ်ကောင်စီက ထောက်ပြပါတယ်။

တစ်ဘက်မှာ စစ်အာဏာရှင် သက်ဆိုးရှည်ရေးအတွက် ငြိမ်းချမ်းရေးဆွေးနွေးပွဲတွေ ပြုလုပ်ပြီး ရွေးကောက်ပွဲကျင်းပဖို့ ကြိုးပမ်းနေတဲ့အပေါ် မွန်နိုင်ငံရေးပါတီတွေ မွန်ပြည်သူတွေ မပါဝင်ဖို့ ထုတ်ပြန်ချက်မှာ ဖော်ပြပါတယ်။

မွန်ပြည်ဖက်ဒရယ်ကောင်စီရဲ့ ကောင်စီဝင်တစ်ဦးဖြစ်တဲ့ မိကွန်းချမ်းနွန်က ရွေးကောက်ပွဲကျင်းပလိုက်ရင် စစ်ကောင်စီကို တရားဝင်မှုဖြစ်အောင် လုပ်ဆောင်တာလို့ သံလွင်တိုင်းမ်ကို ပြောပါတယ်။

“စစ်ကောင်စီအနေနဲ့ ရွေး‌ကောက်ပွဲကျင်းပဖို့ ဘယ်လိုမှ အာဏာမရှိပါဘူး။ ရွေးကောက်ပွဲ ကျင်းပခြင်းအားဖြင့် စစ်ကောင်စီကို Legitimize တရားဝင်မှုဖြစ်အောင် လုပ်ဆောင်တယ်လို့ပဲ မြင်တယ်။ ဘာကြောင့် စစ်ကောင်စီက ရွေးကောက်ပွဲလုပ်လို့ မရသလဲဆိုတော့ အာဏာကို သိမ်းထားတာဖြစ်တယ်။ ပြီးတဲ့အခါကျတော့ ပြည်သူလူထုတွေရဲ့ လူ့အခွင့်အရေးကိုလည်း ချိုးဖောက်နေတာ‌ပေါ့” လို့ ဆိုပါတယ်။

တကယ်လို့ စစ်ကောင်စီကျင်းပတဲ့ ငြိမ်းချမ်းရေးဆွေးနွေးပွဲတွေမှာ မွန်နိုင်ငံရေးပါတီတွေ မွန်ပြည်သူတွေပါဝင်နေရင် စစ်ကောင်စီ သက်ဆိုးရှည်အောင် အားပေးတာဖြစ်သလို ၂၀၀၈ အခြေခံဥပဒေကို အသိအမှတ်ပြုတာဖြစ်တယ်လို့ ထောက်ပြပါတယ်။

စစ်အာဏာရှင်ကျင်းပမယ့် အတုအယောင် ရွေးကောက်ပွဲဟာ မသမာတဲ့ ရွေးကောက်ပွဲဖြစ်ပြီး သူတို့ စစ်တပ်ရဲ့ပါတီ အာဏာရရှိရေးအတွက် ကျင်းပခြင်းသာဖြစ်တာကြောင့် ပါဝင်အားပေးခြင်း မပြုဘဲ ရှောင်ရှားကြဖို့ကိုလည်း တောင်းဆိုထားတာပါ။

မိကွန်းချမ်းနွန်က စစ်ကောင်စီကျင်းပမယ့် ရွေးကောက်ပွဲမဖြစ်ရေး နိုင်ငံတကာကို ချဉ်းကပ်ပြောဆိုနေသလို ပြည်သူတွေကိုလည်း ဆန့်ကျင်ကြဖို့ လုပ်ဆောင်နေတယ်လို့ ပြောပါတယ်။

“စစ်ကောင်စီရဲ့ မတရားမှုတွေကို လက်ခံပြီးတော့ ကျင်းပမယ့် ရွေးကောက်ပွဲကို ပြည်သူတွေအနေနဲ့ ဆန့်ကျင်ရမယ်လို့ ကျွန်မတို့အနေနဲ့ မြင်ပါတယ်။ နောက်ပြီး ကျွန်မတို့ မွန်ပြည်ဖက်ဒရယ်ကောင် စီအနေနဲ့ စစ်ကောင်စီကလုပ်တဲ့ ရွေးကောက်ပွဲကို လုံးဝလက်မခံပါဘူး။ ရွေးကောက်ပွဲမဖြစ်အောင်လည်း ကျွန်မတို့က နိုင်ငံတကာကို ချဉ်းကပ်ပြီးတော့ ပြောဆိုတဲ့အပြင် ပြည်သူတွေကိုလည်း အသိအဉာဏ်ဖွင့်ပြီး ရွေးကောက်ပွဲမှာမပါဝင်ဖို့ ဆန့်ကျင်ဖို့ လုပ်ဆောင်နေတာရှိပါတယ်” လို့ ဆိုပါတယ်။

မွန်အမျိုးသားလုံခြုံရေး၊ လွတ်မြောက်ရေးနဲ့ပတ်သက်ပြီးတော့လည်း ရာမညမွန်ပြည်ဖွဲ့စည်းပုံ (မူကြမ်း) နဲ့အညီ မွန်လူငယ်တွေ တော်လှန်ရေးမှာပါဝင်ကာ မွန်အမျိုးသားထုကို ကာကွယ်ပေးကြဖို့ မွန်ပြည်ဖက်ဒရယ်ကောင်စီက တိုက်တွန်းပါသေးတယ်။

မွန်လူငယ်တွေကို အတင်းအဓမ္မ စစ်မှုထမ်းဖို့အတွက် ဖမ်းဆီးခေါ်ဆောင်နေတဲ့ စစ်ကောင်စီနဲ့ အ ပေါင်းအပါတွေကို အပြင်းအထန် ဆန့်ကျင်ကန့်ကွက်ကြဖို့ကိုလည်း မွန်ရဟန်းရှင်လူ ပြည်သူတွေနဲ့ ရပ်ရွာအကြီးအကဲတွေကို တိုက်တွန်းထားပါတယ်။

အာဏာသိမ်းမှုအလွန် လက်ရှိ မွန်နိုင်ငံရေးအခင်းအကျင်းဟာ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းဖို့ စစ်ကောင်စီနဲ့ ဆွေးနွေးညှိနှိုင်းနေတဲ့ အုပ်စုနဲ့ စစ်အာဏာရှင်စနစ်ကို ဆန့်ကျင်တော်လှန်တိုက်ပွဲဝင်နေကြတဲ့ အုပ်စုတို့ ရှိနေတာပါ။

အပစ်ခတ်ရပ်စဲရေးစာချုပ် NCA ရေးထိုးထားတဲ့ သက်တမ်းရင့် မွန်ပြည်သစ်ပါတီ ဗဟိုနဲ့ စစ်ကောင်စီခန့် ရွေးကောက်ပွဲကော်မရှင်ကနေ ပါတီမှတ်ပုံတင်ခွင့်ရထားကြတဲ့ မွန်ညီညွတ်ရေးပါတီအပါအဝင် မွန်နိုင်ငံရေးပါတီတွေဟာ ပထမအုပ်စုမှာ ပါဝင်ပါတယ်။

ဒုတိယအုပ်စုမှာတော့ နွေဦးတော်လှန်ရေးကနေ ပေါက်ဖွားလာကြတဲ့ မွန်ပြည်ဖက်ဒရယ်ကောင်စီအပါအဝင် မွန်ပြည်သစ်ပါတီ AD ၊ မွန်ဒေသနဲ့ မွန်လူမျိုးအခြေပြု လက်နက်ကိုင်အဖွဲ့တွေနဲ့ ဒေသတွင်း နိုင်ငံရေးအဖွဲ့တွေ ပါဝင်နေကြပါတယ်။

သတင်း – သံလွင်တိုင်းမ်

ဓာတ်ပုံ-CJ

Leave a Reply

This site uses Akismet to reduce spam. Learn how your comment data is processed.