နောင်ချို၊ ဧပြီ ၂
တရုတ်နိုင်ငံ ကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း ၉ စီးကို စစ်ကောင်စီတပ်က အသင့်စောင့်ကြို ပစ်ခတ်တိုက်ခိုက်ခဲ့တယ်လို့ တအာင်းတပ်မတော် TNLA က ဧပြီ ၁ ရက်နေ့မှာ ထုတ်ပြန်ထားပါတယ်။
မနေ့ ဧပြီ ၁ ရက်နေ့ ည ၉ နာရီခွဲအချိန်ခန့်မှာ တရုတ်နိုင်ငံကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း ၉ စီးဟာ နောင်ချိုမြို့နယ် အုမ္မတီးကျေးရွာမှာ စစ်ကောင်စီတပ်က အသင့်စောင့်ကြို ပစ်ခတ်တိုက်ခိုက်ခဲ့တာပါ။
အဲဒီယာဉ်တန်းတွေဟာ နောင်ချိုမြို့ကနေ မန္တလေးမြို့ကို ခရီးဆက်သွားမှာဖြစ်ကြောင်း စစ်ကောင်စီထံ သတင်းပေးပို့ခဲ့ပေမယ့် အခုလို လမ်းခရီးမှာ ပစ်ခတ်ခံရတာကြောင့် နောင်ချိုမြို့ကို ပြန်လည်ဆုတ်ခွာခဲ့ရတယ်လို့ ဆိုပါတယ်။
လက်ရှိမှာ တရုတ်နိုင်ငံကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း ၉ စီးအား တအာင်းတပ်မတော် TNLA မှ ကာကွယ်စောင့်ရှောက်ပေးထားပြီး သူတို့သွားမယ့် ခရီးကို ဆက်လက်ပို့ဆောင်သွားမယ်လို့ ဆိုပါတယ်။
ဒါ့အပြင် စစ်ကောင်စီဟာ နိုင်ငံတော်အဆင့် ဝမ်းနည်းခြင်း အထိမ်းအမှတ် နေ့ရက် သတ်မှတ်ကြေညာထားပေမယ့် နောင်ချိုမြို့နယ်မှာ စစ်ကောင်စီက ဒရုန်းအပါအဝင် ဂျက်ဖိုက်တာ လေယာဉ်တွေနဲ့ လေကြောင်းကနေ လာရောက် ဗုံးကြဲတိုက်ခိုက်နေတာ ဖြစ်ပါတယ်။
တရုတ်နိုင်ငံကြက်ခြေနီအသင်းရဲ့ ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း ၉ စီး တိုက်ခိုက်ခံရတဲ့ အခြေအနေနဲ့ ပတ်သက်ပြီး စစ်ကောင်စီပြောခွင့်ရ ဗိုလ်ချူပ်ဇော်မင်းထွန်းက အဲဒီယာဉ်တန်းကို တားဆီးရာမှာ မရပ်တန့်တဲ့အတွက် မိုးပေါ်ထောင်ပြီး သေနတ် သုံးချက် ပစ်ခတ်ခဲ့တယ် ဝန်ခံ ပြောဆိုထားပါတယ်။
သတင်း – သံလွင်တိုင်းမ်
ဓာတ်ပုံ – TNLA