မော်လမြိုင် ၊ ဧပြီ ၂
ငလျင်ဒဏ်သင့်ပြည်သူတွေကို ထိရောက်စွာ အကူအညီပေးအပ်နိုင်ရေး စစ်ကောင်စီရဲ့လေကြောင်း တိုက်ခိုက်နေမှုတွေ ရပ်တန့်ဖို့ လိုအပ်ပြီး နိုင်ငံတကာအဖွဲ့အစည်းတွေအနေနဲ့ စစ်ကောင်စီကို ဖိအားပေးဖို့ မွန်ပြည်သစ်ပါတီ AD က တိုက်တွန်းလိုက်ပါတယ်။
အထူးသဖြင့် ကုလသမဂ္ဂအပါအဝင် အိမ်နီးချင်းနိုင်ငံတွေနဲ့ အာဆီယံနိုင်ငံတွေက စစ်ကောင်စီကို ဖိအားပေးဖို့ မွန်ပြည်သစ်ပါတီ စစ်အာဏာရှင်တိုက်ဖျက်ရေးအဖွဲ့ (NMSP-AD) က ဧပြီ ၁ ရက်နေ့ ထုတ်ပြန်ချက်မှာ ထည့်သွင်းတောင်းဆိုတာပါ။
အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ လိုအပ်တဲ့ ကာကွယ်ရေးလုပ်ငန်းတွေ ဆက်လုပ်မယ်လို့ ဧပြီ ၁ ရက်နေ့က ငလျင်ဘေးသင့်ဒေသတွေအတွက် အလှူငွေပေးအပ်လှူဒါန်းပွဲမှာ ထုတ်ပြောခဲ့ပါတယ်။
ပြီးခဲ့တဲ့ မတ် ၂၈ ရက်နေ့မှာ ပြင်းအား ၇ ဒသမ ၇ အဆင့်ရှိတဲ့ မြေငလျင်လှုပ်ခတ်ခဲ့မှုကြောင့် စကိုင်းတိုင်း၊ မန္တလေးတိုင်း၊ ပဲခူးတိုင်း၊ ရှမ်းပြည်နယ်နဲ့ အခြားဒေသအချို့ရှိ ပြည်သူများစွာ ထိခိုက်သေကြေကြရပြီး နေအိမ်အဆောက်အအုံတွေ ထိခိုက်ပျက်စီးဆုံးရှုံးခဲ့တဲ့အပေါ် မွန်ပြည်သစ်ပါတီ AD က ဝမ်းနည်းကြောင်း ထုတ်ပြန်ချက်မှာ ဖော်ပြပါတယ်။
လက်ရှိအချိန်မှာ အဆောက်အအုံတွေထဲ ပိတ်မိနေဆဲ ပြည်သူတွေအတွက် လွန်စွာစိုးရိမ်ပူပန်မိပြီး ငလျင်ဒဏ်သင့်ဒေသတွေမှာ စစ်ကောင်စီက လေကြောင်းတိုက်ခိုက်မှုတွေ ဆက်တိုက်ပြုလုပ်နေတာကြောင့် ပြည်သူတွေ ထပ်ဆင့်ဒုက္ခ ကြုံတွေ့နေရတဲ့အပေါ် လွန်စွာ ဝမ်းနည်းကြေကွဲရတယ်လို့ ဆိုပါတယ်။
မြေပြင်မှာ ကယ်ဆယ်ရေးအကူအညီ လုပ်ဆောင်နေတဲ့ အဖွဲ့အစည်းတွေကတစ်ဆင့် ငလျင်ဒဏ်သင့်ပြည်သူတွေထံ ကယ်ဆယ်ရေးအကူအညီတွေ အမှန်တစ်ကယ်ရောက်ရှိနိုင်အောင် ဆောင်ရွက်ဖို့ကိုလည်း နိုင်ငံတကာအဖွဲ့အစည်းတွေကို တိုက်တွန်းတောင်းဆိုတာပါ။
မွန်ပြည်သစ်ပါတီ AD အနေနဲ့ ငလျင်သင့်ပြည်သူတွေအတွက် အရေးပေါ်ကူညီကယ်ဆယ်ရေးအပါအဝင် ပြန်လည်ထူထောင်ရေးလုပ်ငန်းစဉ်တွေမှာ တတ်နိုင်တဲ့ဘက်က ကူညီသွားမှာဖြစ်ပြီး မွန်ပြည်သူတွေအနေနဲ့လည်း တတ်နိုင်တဲ့ဘက်က ဝိုင်းဝန်းကူညီပေးကြဖို့ တိုက်တွန်းပါသေးတယ်။
ငလျင်ဒဏ်သင့်ပြည်သူတွေကို ကယ်ဆယ်ရေးလုပ်ငန်းတွေအတွက် နိုင်ငံတကာ အစိုးအရတွေ နိုင်ငံတကာကယ်ဆယ်ရေးအဖွဲ့အစည်းတွေနဲ့ လက်ရှိ ဆောင်ရွက်နေကြတဲ့ ပြည်တွင်းနဲ့ ဒေသခံလူမှုအဖွဲ့အစည်းတွေအားလုံးကို ကျေးဇူးတင်ရှိပြီး အခြားနိုင်ငံတွေလည်း ပါဝင်ကူညီပေးကြဖို့ မွန်ပြည်သစ်ပါတီ AD က မေတ္တာရပ်ခံထားပါတယ်။
သတင်း – သံလွင်တိုင်းမ်
ဓာတ်ပုံ – Social Media