နေပြည်တော် ၊ ဧပြီ ၃
မြန်မာနိုင်ငံမှာ အင်အားပြင်း ငလျင်လှုပ်ခတ်ခဲ့မှုကြောင့် အကျပ်အတည်းတွေနဲ့ ရင်ဆိုင်နေရချိန်မှာ တိုက်ခိုက်မှုတွေ ချက်ခြင်းရပ်တန့်ဖို့ နိုင်ငံတကာက တိုက်တွန်းနေချိန်မှာ စစ်ခေါင်းဆောင်ကတော့ စစ်ဆင်ရေးဆက်လုပ်သွားမယ်လို့ တုံ့ပြန်ပါတယ်။
တချို့ တိုင်းရင်းသားလက်နက်ကိုင်အဖွဲ့တွေအနေနဲ့ လက်ရှိအခြေအနေမှာ တိုက်ပွဲဖော်ဆောင်တာမရှိပေမယ့် တိုက်ခိုက်မှုတွေ လုပ်ဆောင်ဖို့ စုဖွဲ့ခြင်း လေ့ကျင့်ပြင်ဆင်ခြင်းတွေ လုပ်ဆောင်ကြတာရှိတယ်လို့ ဧပြီ ၁ ရက်နေ့က ပြောပါတယ်။
အဲဒီလို လုပ်ဆောင်နေတာဟာ တိုက်ခိုက်ခြင်းသာဖြစ်တဲ့အတွက် စစ်တပ်အနေနဲ့ လိုအပ်တဲ့ ကာ ကွယ်ရေးဆိုင်ရာ လုပ်ငန်းတွေကို ဆက်လက်ဆောင်ရွက်သွားမယ်လို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်တာပါ။
ညီနောင်မဟာမိတ်သုံးဖွဲ့ဖြစ်တဲ့ MNDAA ၊ TNLA နဲ့ AA တို့က ငလျင်ကယ်ဆယ်ရေးလုပ်ငန်းတွေ အမြန်ဆုံး ထိရောက်စွာ ဆောင်ရွက်နိုင်ဖို့ တိုက်ပွဲဖြစ်ပွားနေတဲ့နေရာတွေမှာ ထိုးစစ်တွေကို ပြုလုပ်မှာမဟုတ်ဘဲ ဧပြီတစ်လအတွင်း တစ်ဘက်သတ် အပစ်ရပ်ကြောင်း ဧပြီ ၁ ရက်နေ့ ညပိုင်းမှာ ကြေညာခဲ့တာပါ။
အလားတူ အမျိုးသားညီညွတ်ရေးအစိုးရ NUG ကလည်း နှစ်ပတ်အပစ်ခတ်ရပ်စဲတယ်လို့ ကြေညာထားတဲ့အပေါ် စစ်ခေါင်းဆောင်ကတော့ နိုင်ငံရေးပြဿနာတွေကို အကြမ်းဖက်နည်းလမ်းနဲ့ ဖြေရှင်းဖို့ ရွေးချယ်ခဲ့တာမို့လို့ စစ်တပ်အနေနဲ့ ချမှတ်တဲ့ လုပ်ငန်းစဉ်တွေအတိုင်း ဆက်လုပ်သွားမယ်လို့ ဆိုပါတယ်။
ဒါဟာ ငလျင်သင့်ပြည်သူတွေ အတိဒုက္ခရောက်နေချိန်မှာ ငြိမ်းချမ်းရေးတက်ကြွသူတွေအပါအဝင် နိုင်ငံတကာအစိုးရအဖွဲ့ ကိုယ်စားလှယ်တွေက မြန်မာနိုင်ငံမှာ အပစ်ခတ်ရပ်စဲပြီး ကယ်ဆယ်ရေးလုပ်ငန်းတွေကို အာရုံစိုက်ဖို့နဲ့ ငြိမ်းချမ်းရေးအထိ လုပ်ဆောင်ဖို့ မျှော်လင့်တောင်းဆိုမှုတွေအပေါ် စစ်ခေါင်းဆောင်က ပယ်ချလိုက်တာပါ။
လွတ်လပ်တဲ့ သုတေသနအဖွဲ့အစည်းဖြစ်တဲ့ ဉာဏ်လင်းသစ်သုတေသနအဖွဲ့ရဲ့ အချက်အလက်တွေအရ အင်အားပြင်း ငလျင်လှုပ်ခတ်ခဲ့တဲ့ မတ် ၂၈ ရက်နေ့မှာပဲ စစ်ကောင်စီက အရပ်သားတွေကို ပစ်မှတ်ထားတဲ့ စစ်ရေးလှုပ်ရှားမှုတွေ ပြုလုပ်ခဲ့တယ်လို့ ဆိုပါတယ်။
မတ် ၂၈ ရက်နေ့ကနေ ၃၁ ရက်နေ့အထိ စာရင်းတွေအရ အင်ဂျင်တပ်လေထီးအပါအဝင် လက် နက်ကြီးနဲ့ လေကြောင်းတိုက်ခိုက်မှုတွေကြောင့် အရပ်သား လေဦး သေဆုံးခဲ့ရပြီး ၁၂ ဦး ထိခိုက်ဒဏ်ရာရရှိခဲ့တယ်လို့ အချက်အလက်တွေအရ သိရပါတယ်။
ဧပြီ ၁ ရက်နေ့ကလည်း ငလျင်သင့်ပြည်သူတွေအတွက် တရုတ်နိုင်ငံကြက်ခြေနီအသင်းကနေ ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း ၉ စီးကို စစ်ကောင်စီတပ်က နောင်ချိုမြို့နယ် အုမ္မတီးကျေးရွာမှာ ပစ်ခတ်ခဲ့သေးတာပါ။
ဒီအပေါ် စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက အဲဒီယာဉ်တန်းကို တားဆီးတဲ့အခါ မရပ်တန့်တဲ့အတွက် သေနတ်သုံးချက် မိုးပေါ်ထောင် ပစ်ခတ်ခဲ့တယ်လို့ ဧပြီ ၂ ရက်နေ့မှာ ဝန်ခံပြောဆိုထားပါတယ်။
သတင်း – သံလွင်တိုင်းမ်
ဓာတ်ပုံ-MRTV