ငလျင်ဘေးကြား ပြည်တွင်းရွှေဈေး သိန်း ၇၀ ကျော်အထိ မြင့်တက်လာ

မော်လမြိုင် ၊ ဧပြီ ၃

နိုင်ငံတဝန်းရှိ ဒေသ ခြောက်ခုမှာ ငလျင်ဘေးဒဏ်ကို အပြင်အထန်ခံစားရပြီး ထိခိုက်ပျက်စီးဆုံးရှုံးမှုနဲ့ လူသေဆုံးမှုမြင့်တက်နေချိန် ပြည်တွင်း မီးလင်းအခေါက်ရွှေ တစ်ကျပ်သားကို ကျပ်သိန်း ၇၀ ကျော်အထိ မြင့်တက်လာတယ်လို့ ရွှေလုပ်ငန်းရှင်တွေက သံလွင်တိုင်းမ်ကို ပြောပါတယ်။

ရွှေဈေးနှုန်းဟာ ငလျင်ဘေး မကြုံခင် ပြီးခဲ့တဲ့ မတ် ၂၇ ရက်နေ့က မီးလင်းအခေါက်ရွှေ တစ်ကျပ်သားကို ကျပ် ၆၉ သိန်း ဝန်းကျင်သာ ရှိရာမှ ဧပြီ ၂ ရက်နေ့မှာတော့ ကျပ်သိန်း ၇၀ ကျော်အထိ ဈေး နှုန်း မြင့်တက်လာတာပါ။

ပြည်တွင်းရွှေဈေး မြင့်တက်လာတာဟာ ကမ္ဘာ့ရွှေဈေးနှုန်းတွေ မြင့်တက်လာတာကြောင့် ဖြစ်သလို တဖက်မှာလည်း သဘာဝဘေးဒဏ်ကိုကြောက်ပြီး ရွှေဝယ်ယူစုဆောင်မှု များလာတာကြောင့် ဖြစ်တယ်လို့ ရွှေလုပ်ငန်းရှင်တွေက ပြောကြပါတယ်။

“အဓိက ဈေးကွက်ကြီးက နှစ်ခုရှိတာပေါ့။ ရန်ကုန်နဲ့မန္တလေးနှစ်ခု ရှိတဲ့ဟာမှာ မန္တလေး ဈေးကွက်ကြီးကလည်း လုံးဝပိတ်နေတယ်။ ဒီရန်ကုန်ဈေးကွက်ကြီးမှာကလည်း ငလျင်ထပ်လာနိုင်တယ်။ မုန်တိုင်းကလည်း ထပ်လာနိုင်တယ်လို့ ပြောတဲ့အချိန်မှာ လူတွေက သူတို့ရဲ့တိုက်ခန်းတို့ ကွန်ဒိုတို့ကို ရောင်းပြီးတော့ သူတို့ငွေကြေးအတွက် ကာဗာဖြစ်အောင် ရွှေဝယ်ထားလိုက်တယ်။ တစ်ခုခုဆို ရွှေထုပ်ကိုင်ပြီး ပြေးမယ်ဆိုတဲ့ သဘောမျိုးလို့တော့ ယူဆရတာပဲ” လို့ ရွှေလုပ်ငန်းရှင်တစ်ဦးက ပြောပါတယ်။

ကမ္ဘာ့ရွှေဈေးနှုန်းကလည်း ငလျင်ဘေး မဖြစ်ခင်အချိန်က ရွှေတစ်အောင်စကို ဒေါ်လာ ၃၀၇၀ ဝန်း ကျင်သာရှိရာကနေ ဧပြီ ၂ ရက်နေ့မှာတော့ ဒေါ်လာ ၃၁၂၀ ဝန်းကျင်ထိ မြင့်တက်လာတာကြောင့်လည်း ပြည်တွင်းရွှေဈေးနှုန်း ပိုမိုမြင့်တက်လာတာဖြစ်တယ်လို့ ရွှေလုပ်ငန်းရှင်တွေက ဆိုကြပါတယ်။

ပြည်တွင်းရွှေဈေးနှုန်း မြင့်တက်လာပေမယ့် ရွှေဈေးကွက်အတွင်းမှာတော့ လက်ထဲငွေကြေး မထားလိုသူတွေအနေနဲ့ ရွှေဝယ်စုဆောင်းမှုတွေရှိသလို စစ်ကောင်စီ ဌာနဆိုင်ရာတွေကလည်း လာရောက် စောင့်ကြည့်တာတွေရှိတယ်လို့ သိရပါတယ်။

ဧပြီ ၂ ရက်နေ့ စစ်ကောင်စီ ဓာတ်သတ္တု (ရွှေ) ရည်ညွှန်းဈေး သတ်မှတ်ရေး ကော်မတီရဲ့ ရွှေရည် ညွှန်းဈေးနှုန်း ထုတ်ပြန်ချက်အရ မီးလင်းအခေါက်ရွှေ တစ်ကျပ်သား ကျပ် ၅၆ သိန်းကျော် သတ် မှတ်ထားပြီး ပြင်ပဈေးကွက်နဲ့ နှိုင်းယှဉ်ရင် ကျပ် ၁၄ သိန်းကျော် ဈေးနှုန်းကွာဟနေတာပါ။

မြန်မာနိုင်ငံမှာတော့ ပြည်တွင်းရွှေဈေးနှုန်းဟာ အရင်အစိုးရလက်ထက်က အခေါက်ရွှေ တစ်ကျပ်သားကို ကျပ် ၁၃ သိန်း ဝန်းကျင်သာ ရှိရာမှ စစ်တပ်အာဏာသိမ်းပြီးနောက် ရွှေဈေးနှုန်း ငါးဆကျော် မြင့်တက်လာသလို ဈေးနှုန်းမတည်ငြိမ်မှုတွေလည်း နေ့စဉ်နဲ့အမျှ ဖြစ်ပေါ်နေပါတယ်။

သတင်း – သံလွင်တိုင်းမ်

ဓာတ်ပုံ-CJ