မော်လမြိုင် ၊ ဧပြီ ၂
နိုင်ငံတဝန်းမှာ ငလျင်ဘေးဒဏ်ကို အပြင်အထန်ခံစားရပြီး လူသေဆုံးမှုနဲ့ ထိခိုက်ပျက်စီးဆုံးရှုံးမှု မြင့်တက်နေချိန် မွန်ပြည်နယ်မှာတော့ စစ်ကောင်စီက စစ်မှုထမ်းသင်တန်း အပတ်စဉ် ၁၂ အတွက် လူသစ်စုဆောင်းမှုတွေ လုပ်ဆောင်နေတယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကောင်စီ အုပ်ချုပ်ရေးအဖွဲ့ဝင်တွေဟာ စစ်မှုထမ်းသင်တန်း အပတ်စဉ် ၁၂ အတွက် လူစားထိုး အငှားခေါ်ယူဖို့ဆိုကာ နေအိမ်တွေမှာ ငွေကြေးတောင်းခံတာရှိသလို အတင်းအဓမ္မဖမ်းဆီးပြီး စစ် သားစုဆောင်းတာတွေ လုပ်ဆောင်နေတာ ဖြစ်ပါတယ်။
နိုင်ငံအနှံ့ ဖြစ်ပွားနေတဲ့ တိုက်ပွဲတွေမှာ စစ်ရှုံးနေတဲ့ စစ်ကောင်စီဟာ ပြည်သူ့စစ်မှုထမ်းဥပဒေ အ သက်သွင်းပြီးနောက် မွန်ပြည်နယ်မှာ လစဉ်စစ်မှုထမ်း သင်တန်းတွေ ဖွင့်လှစ်နေပြီး ပြီးခဲ့တဲ့ မတ် ၁၇ ရက်နေ့မှာလည်း စစ်မှုထမ်းသင်တန်း အပတ်စဉ် ၁၁ ကို ဖွင့်လှစ်ခဲ့တာ ဖြစ်ပါတယ်။
အမည်မဖော်လိုတဲ့ ဒေသခံလူငယ် တစ်ဦးကတော့ သဘာဝဘေးဖြစ်နေချိန် လူ့စွမ်းအားအရင်းအ မြစ်ဖြစ်တဲ့ လူငယ်တွေကို ပြည်တွင်းစစ်ထဲ ထည့်သွင်းတာ လုံးဝမကြိုက်သလို နိုင်ငံတော်အဆင့် ဝမ်းနည်းခြင်း အထိမ်းအမှတ်လုပ်တဲ့အပြင် ကမ္ဘာကတောင် လာကူညီနေရချိန်မှာ စစ်မှုထမ်းကိစ္စကို တစ်ချက်ဘေးဖယ်သင့်တယ်လို့ သူ့အမြင်ကို ပြောပါတယ်။
“တိုင်းပြည်ရဲ့ လူ့စွမ်းအား အရင်းအမြစ်တွေရော တကယ်လိုအပ်နေတဲ့ လူငယ်ကို ဒီဘာမဟုတ်တဲ့ ပြည်တွင်းစစ်ထဲမှာ သွားပြီးတော့ မြေစာပင်အဖြစ်ခံပြီးတော့ ထည့်မှာကို ကျွန်တော်တို့ လုံးဝကို မကြိုက်ဘူး။ နိုင်ငံတော်အဆင့် ဝမ်းနည်းခြင်း အထိမ်းအမှတ်တောင် လုပ်နေရတဲ့ ကမ္ဘာကတောင် လာပြီးတော့ ကိုယ်ချင်းစာနာမှုနဲ့ လုပ်နေတဲ့အချိန်မှာ ကျွန်တော်နိုင်ငံကို လက်ရှိအုပ်ချုပ်နေတယ်ဆိုတဲ့ လူကြီးတွေကလည်း ဒါကို နားလည်ပြီးတော့ ဒီစစ်မှုထမ်းကိစ္စကို တစ်ချက်ဘေးဖယ် ပြီးတော့ ဒီသဘာဝဘေးအန္တရာယ်ကို ဝိုင်းဝန်းတွန်းလှန်ဖို့အတွက် ပြည်သူကိုစည်းရုံးပါလို့ ကျွန်တော် တိုက် တွန်းတယ်”လို့ ဆိုပါတယ်။
ဒါ့အပြင် စစ်ကောင်စီရဲ့ စစ်မှုထမ်းကိစ္စကြောင့် လူငယ်အများစု ပြည်တွင်းမှာ မနေနိုင်ကြတော့တဲ့အတွက် သဘာဝဘေးကို အရင်လိုချက်ချင်း တုံ့ပြန်နိုင်စွမ်း မရှိတာကို သင်ခန်းစာယူရမှာ ဖြစ်သလို ပြည်သူတွေ ဒုက္ခအတိတွေ့ချိန်မှာ စစ်မှုထမ်းကိစ္စက မဖြစ်သင့်ဘူးလို့ သူက ဆက်ပြောပါတယ်။
အမည်မဖော်လိုတဲ့ ဒေသခံ တစ်ဦးကလည်း ပြည်သူတွေ ငလျင်ဒဏ်ခံနေရချိန်မှာ စစ်ကောင်စီက စစ်မှုထမ်း အပတ်စဉ် ၁၂ အတွက် လူစုတာဟာ အကျိုးစီးပွားအတွက် ပြည်သူတွေကို အသုံးချတာ ဖြစ်သလို ပြည်သူတွေဟာ ငလျင်ဒဏ်အပြင် စစ်မှုထမ်းကိစ္စကိုပါ ကြောက်နေရပြီး ကျီးလန့်စာစားနေရတဲ့ အခြေအနေမျိုး ဖြစ်နေတယ်လို့ ပြောပါတယ်။
“အပတ်စဉ် ၁၂ အတွက် စစ်မှုထမ်းဖို့ လူစုနေတာကတော့ သူ့အကျိုး စီးပွားအတွက် ပြည်သူလူထုကို အသုံးချနေတာပဲ။ ပြီးတော့ အခုဆို ကျွန်တော်တို့ ရပ်ကွက်တွေထဲမှာဆို ယောကျာ်းသားဆို တွေ့ကို မတွေ့ ရတော့ဘူး။ တော်ကြာနေ အလုပ်ကပြန်လာရင် ပေါ်တာဆွဲ ဖမ်းသွားလိုက်။ တော်ကြာနေ ဧည့်စာရင်း ဝင်စစ်သွားလိုက်။ ဖမ်းသွားလိုက်နဲ့ အခုက မန္တလေးမှာ အကြီးအကျယ် လှုပ်သွားပြီးတဲ့အပြင် နောက်ငလျင် အသေးလေးတွေ နေ့တိုင်းလိုလို လှုပ်နေတာ။ အခုက ပြည်သူလူထုတွေက ငလျင်ဒဏ်ပဲ ကြောက်ရမလား။ ဒီစစ်မှုထမ်းကိုပဲ ကြောက်ရမလား။ ကျီးလန့်စာ စားနေရတဲ့ အခြေ အနေမျိုး ဖြစ်နေတယ်” လို့ ဆိုပါတယ်။
တဖက်မှာ စစ်ကောင်စီ အုပ်ချုပ်ရေးအဖွဲ့ဝင်တွေဟာ စစ်မှုထမ်းသင်တန်း အပတ်စဉ် ၁၂ အတွက် လူစားထိုး အငှားခေါ်ယူဖို့ ငွေကြေးလိုက်လံ ကောက်ခံနေတဲ့အပြင် အငှားခေါ်ယူလို့မရပါက မဲနှိုက်ရမှာ ဖြစ်တယ်ဆိုပြီး ပြောဆိုသွားကြောင်း ဒေသခံတွေက ပြောကြပါတယ်။
ဒါ့အပြင် အမျိုးသား နှစ်ယောက် ဆိုင်ကယ်မစီးရ ဒေသန္တရအမိန့်ထုတ်ထားတဲ့ ဒေသတွေမှာ အမျိုးသားနှစ်ယောက် ဆိုင်ကယ်အတူစီးနင်းပါက စစ်သားစုဆောင်းခံရသလို ညဘက် အပြင်ထွက်တဲ့ လူငယ်တွေကိုလည်း ဖမ်းဆီးပြီး စစ်မှုထမ်းသင်တန်း ပို့ဆောင်တာတွေ ရှိနေတာပါ။
သံလွင်တိုင်းမ်က ပြုစုထားတဲ့ အချက်အလက်တွေအရ မွန်ပြည်နယ်မှာ ပြည်သူ့စစ်မှုထမ်း သင် တန်း အပတ်စဉ် ၁ ကနေ အပတ်စဉ် ၁၁ အထိ စစ်မှုထမ်း စစ်သား စုဆောင်းခံရသူ ၂၀၀၀ ကျော်အထိ ရှိလာပြီး ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-SAC Telegram