လှိုင်းဘွဲ၊ ဖေဖော်ဝါရီ ၂၈

ထိုင်း-မြန်မာနယ်စပ်အနီးက ကျေးရွာတွေမှာ ဖြစ်ပွားနေတဲ့ တိုက်ပွဲတွေအပြင် စစ်ကောင်စီရဲ့ လေ ကြောင်း တိုက်ခိုက်မှုကြောင့် ဒေသခံပြည်သူ ရာနဲ့ချီ ထိုင်းနိုင်ငံဘက်ကို ထွက်ပြေးရောက်ရှိလာတယ်လို့ နယ်စပ်သတင်းရင်းမြစ်တွေဆီကနေ သိရပါတယ်။

ကရင်ပြည်နယ် လှိုင်းဘွဲမြို့နယ် ထိုင်း-မြန်မာနယ်စပ်နားမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA တို့အကြား ဖေဖော်ဝါရီ ၂၇ ရက်နေ့ မနက် ၄ နာရီခွဲအချိန်ခန့်ကစပြီး နှစ်ဖက်တိုက်ပွဲ အပြင်းအထန်ဖြစ်ပွားနေတာပါ။

အဲဒီတိုက်ပွဲအတွင်း စစ်ကောင်စီတပ်က တိုက်လေယာဉ်နဲ့ သုံးကြိမ် လာရောက်ပစ်ခတ်ခဲ့တယ်လို့ နယ်စပ်သတင်းရင်းမြစ်တွေက ဆိုပါတယ်။

အဲဒီတိုက်ပွဲကြောင့် နှစ်ဖက်ပစ်ခတ်သံတွေဟာ ထိုင်းနိုင်ငံဘက်ခြမ်းက ကျေးရွာတွေအထိပါ ကြားနေရသလို ထိုင်းစစ်တပ်ကလည်းနယ်စပ်နားမှာ လေကြောင်းကင်းလှည့်ပျံသန်းတာတွေ လုပ် ဆောင်နေတာ ဖြစ်ပါတယ်။

စစ်ကောင်စီတပ်ရဲ့ လေကြောင်းတိုက်ခိုက်တာတွေကြောင့် ဒေသခံပြည်သူ ၁၀၀ ဝန်းကျင်ဟာ ထိုင်းနိုင်ငံဘက်ခြမ်း တာ့ခ်ခရိုင်၊ ထာ့ဆောင့်ယာန်းမြို့နယ်ထဲကို ထွက်ပြေးရောက်ရှိလာပြီး ထိုင်းအာဏာ ပိုင်တွေက လက်ခံထားရှိထားတယ်လို့ နယ်စပ်သတင်းရင်းမြစ်တွေက ဆိုထားပါတယ်။

စစ်ကောင်စီတပ်ဟာ KNU တပ်မဟာ ၇ နယ်မြေထဲက ဌာနချုပ်အပါအဝင် နေရာအချို့ကို ဒရုန်းနဲ့ ကင်းထောက်ပြီး ဗုံးကြဲတိုက်ခိုက်တာတွေ မကြာခဏ လုပ်ဆောင်လျက်ရှိတဲ့အပြင် အခုအခါမှာတော့ လေယာဉ်နဲ့ လာရောက်ဗုံးကြဲတိုက်ခိုက်မှုတွေ စတင်လုပ်ဆောင်လာနေခြင်းလည်း ဖြစ်ပါတယ်။

KNU တပ်မဟာ ၇ နယ်မြေထဲက KNU ဗဟိုဌာနချုပ်ဟောင်းဖြစ်ခဲ့ဖူးတဲ့ မာနယ်ပလောဒေသထဲက စစ်ကောင်စီတပ်စခန်းတွေအားလုံးကို ပြီးခဲ့တဲ့နှစ်ပိုင်းကုန်ပိုင်းမှာ KNU လက်အောက်ခံပူးပေါင်းတပ်ဖွဲ့တွေဘက်က ပြန်လည်သိမ်းပိုက်ရရှိခဲ့ပြီးတဲ့နောက်ပိုင်း တပ်မဟာ ၇ နယ်မြေထဲမှာ နှစ်ဖက်စစ်ရေးအခြေအနေ ဆက်လက်တင်းမာလာပါတယ်။

သတင်း – သံလွင်တိုင်းမ်

ဓာတ်ပုံ-CJ

Leave a Reply

This site uses Akismet to reduce spam. Learn how your comment data is processed.