အင်းစိန်၊ ဖေဖော်ဝါရီ ၁၇
ရန်ကုန်တိုင်း အင်းစိန်မြို့နယ် အင်းစိန်အကျဉ်းထောင်မှာ လွတ်ရက်စေ့ပြီးဖြစ်တဲ့ ရိုဟင်ဂျာလူမျိုး ၉၀၀ ကျော်ကို မလွှတ်ပေးဘဲ စစ်ကောင်စီတပ်နဲ့ ရဲတပ်ဖွဲ့တွေက ခေါ်ထုတ်သွားပြီး စစ်တွေမြို့ကို ပို့ဆောင်ခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် PPNM က ထုတ်ပြန်ပါတယ်။
ဖေဖော်ဝါရီ ၁၆ ရက်နေ့ မနက်ပိုင်းအစောပိုင်းမှာ လွတ်ရက်စေ့ ရိုဟင်ဂျာ ကလေးသူငယ်တွေ အပါအဝင် အမျိုးသား အမျိုးသမီး ၉၀၀ ဦးကျော်ကို စစ်ကောင်စီတပ်နဲ့ ရဲတပ်ဖွဲ့ဝင်တွေက အင်းစိန်ထောင်ကနေ ခရီးသည်တင်ကားတွေနဲ့ လာရောက်ခေါ်ဆောင်သွားခဲ့တာပါ။
အဲဒီထဲက ရိုဟင်ဂျာအမျိုးသား ၁၈ ဦးကလွဲပြီး ကျန်တဲ့ အမျိုးသား ၅၈၄ ဦး၊ အမျိုးသမီး ၂၆၇ ဦးနဲ့ ကလေး ၆၇ ဦးကို အင်းစိန်ထောင်မှ ခေါ်ထုတ်ခဲ့ပြီး ရခိုင်ပြည်နယ် စစ်တွေမြို့ကို ရေကြောင်းအသုံးပြုပြီး ပို့ဆောင်သွားမယ်လို့ ဆိုပါတယ်။
အဲဒီမတိုင်ခင် ဖေဖော်ဝါရီ ၁၅ ရက်နေ့ကလည်း ရုံးပိတ်ရက်ဖြစ်တဲ့ စနေနေ့မှာ လူဝင်မှုကြီးကြပ်ရေးဦးစီးဌာနက ဝန်ထမ်း ၅၀ ဦးဟာ အင်းစိန်ထောင်မှာ ရိုဟင်ဂျာလူမျိုး ၉၃၆ ဦးကို အထောက်အထားကဒ်တွေ လာရောက်လုပ်ဆောင်ပေးခဲ့တာဖြစ်ပြီး ဘာကဒ် အမျိုးအစားဆိုတာကိုတော့ အတည်မပြုနိုင်သေးဘူးလို့ ဆိုပါတယ်။
အင်းစိန်ထောင်က ခေါ်ထုတ်သွားတဲ့ ရိုဟင်ဂျလူမျိုး ၉၀၀ ကျော်ဟာ အင်းစိန်ထောင် တစ်ခုတည်းက မဟုတ်ဘဲ စစ်ကောင်စီလက်အောက်ခံ အကျဉ်းထောင်အသီးသီးမှာ ဖမ်းဆီးချုပ်နှောင်ထားတဲ့ ရိုဟင်ဂျာလူမျိုးတွေဖြစ်ပြီး ပြီးခဲ့တဲ့ ရက်ပိုင်းအတွင်း အခြားအကျဉ်းထောင်မှတစ်ဆင့် အင်းစိန်ထောင်ကို ပို့ဆောင်ခံထားရသူတွေ ဖြစ်ပါတယ်။
PPNM ရဲ့ အချက်အလက်တွေအရ အချို့ ရိုဟင်ဂျာလူမျိုးတွေဟာ လွတ်ရက်စေ့ကာလ ကြာပြီးဖြစ်ပေမယ့် မလွှတ်ပေးခဲ့တဲ့အပြင် အချို့ရိုဟင်ဂျာတွေဟာ တစ်နှစ်ခွဲကျော်တဲ့အထိ အကျဉ်းထောင်တွေမှာ ထပ်မံချုပ်နှောင်ခံထားရပါတယ်။
သတင်း – သံလွင်တိုင်းမ်
ဓာတ်ပုံ – PPNM