ကွတ်ခိုင်၊ နိုဝင်ဘာ ၁၈
ရှမ်းပြည်နယ်မြောက်ပိုင်း ကွတ်ခိုင်မြို့မှာ စစ်ကောင်စီရဲ့ ဗုံးကြဲတိုက်ခိုက်မှုကြောင့် ကလေးငယ်တစ်ဦးအပါအဝင် ဒေသခံ သုံးဦး သေဆုံးပြီး ၁၃ ဦးထိခိုက်ဒဏ်ရာရရှိခဲ့တယ်လို့ တအာင်းအမျိုးသား လွတ်မြောက်ရေးတပ်မတော် TNLA က ဒီနေ့ မနက်ပိုင်းမှာ ထုတ်ပြန်ပါတယ်။
မနေ့ နိုဝင်ဘာ ၁၇ ရက်နေ့ ည ၁၁ နာရီခွဲအချိန်ခန့်မှာ စစ်ကောင်စီလေတပ်မှ ကွတ်ခိုင်မြို့ကို ဂျက်ဖိုက်တာ တိုက်ခိုက်ရေးလေယာဉ်နဲ့ လာရောက် ဗုံးကြဲတိုက်ခိုက်ခဲ့တာပါ။
အလားတူ နိုဝင်ဘာ ၁၇ ရက်နေ့ကလည်း မိုင်းငေါ့မြို့နဲ့ နောင်ချိုမြို့မှာ စစ်ကောင်စီရဲ့ လက်နက်ကြီး ပစ်ခတ်မှုနဲ့ လေကြောင်းဗုံးကြဲ တိုက်ခိုက်မှုတွေကြောင့် ဒေသခံ ၇ ဦး ထိခိုက်ဒဏ်ရာရရှိခဲ့တယ်လို့ TNLA က ထုတ်ပြန်ထားပါတယ်။
စစ်ကောင်စီရဲ့ ဗုံးကြဲတိုက်ခိုက်မှုကြောင့် ကလေးငယ်တစ်ဦးနဲ့ အမျိုးသမီးနှစ်ဦး သေဆုံးခဲ့ပြီး အမျိုးသား ခုနှစ်ဦးနဲ့ အမျိုးသမီး ခြောက်ဦး ဗုံးထိမှန်ဒဏ်ရာရရှိကာ နေအိမ် ရှစ်လုံး ပျက်စီးခဲ့တယ်လို့ TNLA က ဆိုပါတယ်။
စစ်ကောင်စီတပ်ရဲ့ နေ့စဉ်ရက်ဆက် လေကြောင်းအသုံးပြု ဗုံးကြဲတိုက်ခိုက်မှုဟာ အရပ်သားပြည်သူတွေကို ဦးတည်ကာ ပစ်မှတ်ထား ဗုံးကြဲတိုက်ခိုက်နေတာကြောင့် လူထိခိုက်သေဆုံးမှု ရှိတဲ့အပြင် ပြည်သူပိုင် နေအိမ်တွေလည်း ထိခိုက် ပျက်စီးဆုံးရှုံးနေတာပါ။
ဒါကြောင့် အရပ်သား ပြည်သူတွေအနေနဲ့ စစ်ကောင်စီရဲ့ လေကြောင်းတိုက်ခိုက်မှုတွေ ရှောင်ရှားနိုင်ရန် စစ်ရေးသတိရှိဖို့ လိုအပ်သလို လူစုလူဝေး မပြုလုပ်ကြဖို့ လေကြောင်းရန်ကာကွယ်မှုဆိုင်ရာ သတိပေးထုတ်ပြန်ချက်တွေကို လိုက်နာဆောင်ရွက်ဖို့ လိုအပ်တယ်လို့ အသိပေးထားပါတယ်။
ပြီးခဲ့တဲ့ နိုဝင်ဘာ ၁၄ ရက်နေ့ကလည်း နောင်ချိုမြို့မှာ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ဒေသခံ အမျိုးသား လေးဦး ထိခိုက်ဒဏ်ရာရရှိခဲ့တယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ – TNLA