သပိတ်ကျင်း၊ သြဂုတ် ၁၂
မန္တလေးတိုင်း သပိတ်ကျင်းမြို့နယ် စစ်ဆင်ရေးအတွင်း စစ်တပ်စခန်း ကိုးခုအထိ သိမ်းပိုက်ရရှိထားတယ်လို့ ပြည်သူ့ကာကွယ်ရေးတပ်မတော် (မန္တလေး) စစ်ဦးစီးအဖွဲ့က သြဂုတ် ၁၂ ရက်နေ့မှာ ထုတ်ပြန်ပါတယ်။
အဲ့ဒီထဲက သပိတ်ကျင်းမြို့နယ် ဇရပ်ကွင်းတပ်စခန်းကို သြဂုတ် ၁၁ ရက်နေ့မှာ အပြီးသတ်သိမ်းပိုက်နိုင်ခဲ့တာ ဖြစ်တယ်လို့ ဆိုပါတယ်။
မန္တလေး PDF ဟာ သပိတ်ကျင်းမြို့နယ်အခြေစိုက် စစ်ကောင်စီရဲ့ အမှတ် ၁၄၈ ခြေလျင်တပ်ရင်း၊ ကျောက်ဖြူရွာတပ်စခန်း၊ လိပ်ကျရွာတပ်စခန်း၊ ဇရပ်ကွင်းတပ်စခန်းအပါအဝင် တပ်စခန်း ကိုးခုအထိ သိမ်းပိုက်ရရှိထားပါတယ်။
ဒါ့အပြင် သပိတ်ကျင်းမြို့နယ်အတွင်းရှိ သတ်မှတ်ထားတဲ့ စစ်ရေးပစ်မှတ်တွေကို ဆက်လက်ထိုးစစ်ဆင်လျက်ရှိတယ်လို့ အသိပေးထုတ်ပြန်ထားပါတယ်။
မန္တလေး PDF အဖွဲ့ဟာ ၁၀၂၇ စစ်ဆင်ရေး ဒုတိယအပိုင်းမှာ တအောင်းတပ်တော် TNLA နဲ့အတူ မိုးကုတ်၊ စဉ့်ကူး၊မိုးမိတ်အပါအဝင် မြို့ခြောက်မြို့ထက်မနည်း သိမ်းပိုက်ရရှိထားပါတယ်။
သတင်း – သံလွင်တိုင်းမ်
ဓာတ်ပုံ – MDY PDF