မကွေး၊ ဇွန် ၁၀
မကွေးတိုင်းအတွင်း ဌာနဆိုင်ရာ ဝန်ထမ်းတွေအနေနဲ့ ကိုယ်ရေးကိုယ်တာကိစ္စနဲ့ သွားလာရာမှာ စစ်ကောင်စီတပ်သားတွေရဲ့ဖမ်းဆီးခြင်းခံရပါက သက်ဆိုင်ရာဌာနက တာဝန်မယူဘူးလို့ Non-CDM တွေနဲ့ နီးစပ်သူတွေကပြောပါတယ်။
မကွေးတိုင်းအတွင်း စစ်မှုထမ်းဖို့အတွက် စစ်ကောင်စီက ပေါ်တာဆွဲတာ၊ ရှောင်တခင်ဖမ်းဆီးတာတွေ လုပ်ဆောင်နေချိန်မှာ ရုံးလုပ်ငန်းဆိုင်ရာခရီးသွားလာခြင်းမဟုတ်ဘဲ ဖမ်းဆီးခံရပါက သက်ဆိုင်ရာဌာနက တာဝန်မယူဘူးလို့ ပြောကြားထားတာလည်းဖြစ်ပါတယ်။
“အဲဒီလို တာဝန်နဲ့မဟုတ်ဘဲ သွားလို့ ဖမ်းဆီးခံရရင် ကိုယ့်ဘာကိုယ်ဖြေရှင်းရဖို့ လက်မှတ်ထိုးထားရတယ်။ ဒီတလျှောက်မှာလည်း ဖမ်းဆီးခံရတဲ့အထဲ ဝန်ထမ်းတွေလည်းပါတယ်။” လို့ Non-CDM ဝန်ထမ်းတွေနဲ့ နီးစပ်သူတစ်ဦးက သံလွင်တိုင်းမ်ကိုပြောပါတယ်။
ဇွန်လ ပထမပတ်အတွင်း စလင်းနဲ့ ပွင့်ဖြူမြို့နယ်တွေမှာ စစ်မှုထမ်းဥပဒေနဲ့ VPN ကိုအကြောင်းပြုပြီး လူဦးရေ ၈၀ နီးပါးဖမ်းဆီးခံခဲ့ရကာ ဖမ်းဆီးခံရသူတွေထဲမှာ Non-CDM ဝန်ထမ်း ငါးဦးထက်မနည်းပါရှိတယ်လို့ ဆိုပါတယ်။
ဖမ်းဆီးခံရတဲ့ သူတွေထဲက လူဦးရေ ၄၀ ဝန်းကျင် ပြန်လည်လွတ်မြောက်လာပြီးတော့ သူတို့အထဲက တချို့ကို ငွေကျပ် ငါးသိန်းကနေ ၁၅ သိန်းဝန်းကျင်၊ တချို့က လိုအပ်ရင်စစ်မှုထမ်းရမယ်ဆိုတဲ့ ခံဝန်တွေထိုးခဲ့ရတယ်လို့ သိရပါတယ်။
စစ်ကောင်စီက မကွေးတိုင်းအတွင်း စစ်မှုထမ်းမဲပေါက်သူတွေရဲ့နေအိမ်ကို အတင်းအကြပ်လာရောက်ဖမ်းဆီးခေါ်ဆောင်တာ မဲပေါက်သူမတွေ့ရင် မိသားစုတွေကိုဖမ်းဆီးတာတွေဆက်တိုက်လုပ်ဆောင်နေပါတယ်။
ဒါ့အပြင် နှာခေါင်းစည်း မတပ်ရ၊ ဘေးလွယ်အိတ်မလွယ်ရ၊ ဆိုင်ကယ်နှစ်ယောက်မစီးရအမိန့်တွေကိုလည်း ထုတ်ပြန်ထားပြီး မလိုက်နာပါက ပစ်သတ်မယ်လို့ခြိမ်းခြောက်ထားသလို ဖမ်းဆီးခံရပါကလည်း စစ်မှုထမ်းဖို့ လက်မှတ်ထိုးရကာ ငွေကျပ် သိန်းဆယ်ဂဏန်းပေးမှပြန်လည်လွှတ်ပေးတာတွေလုပ်ဆောင်နေတာပါ။
သတင်း-သံလွင်တိုင်းမ်
ဓါတ်ပုံ – Social Media
All reactions:
134134