မော်လမြိုင်၊ ဖေဖော်ဝါရီ ၁၃
မြန်မာနိုင်ငံမှာ အမြစ်တွယ်ပေါက်ဖွားလာတဲ့ တရားမဝင် ကာစီနိုလောင်းကစားလုပ်ငန်းတွေနဲ့ ငွေလိမ်ဂိုဏ်းတွေကို ဆန့်ကျင်တိုက်ဖျက်သွားမယ်လို့ ကရင်အမျိုးသားအစည်းအရုံး KNU က ထုတ်ပြန်ကြေညာလိုက်ပါတယ်။
ကရင်ပြည်နယ် နယ်စပ်တစ်လျှောက်ရှိ ငွေလိမ်ဂိုဏ်းနဲ့ တရားမဝင် ကာစီနိုလောင်းကစား လုပ်ငန်းတွေအပေါ် နိုင်ငံတကာရဲ့ စိုးရိမ်မှု၊ တိုက်ဖျက်လိုမှု လုပ်ငန်းတွေနဲ့ ပတ်သက်ပြီး ကရင်အမျိုးသားအစည်းအရုံး KNU ရဲ့ ရပ်တည်ချက်ကို ဖေဖော်ဝါရီ ၁၃ ရက်နေ့ ရက်စွဲနဲ့ ထုတ်ပြန်လိုက်တာပါ။
တရားမဝင် ကာစီနိုလောင်းကစားလုပ်ငန်းတွေနဲ့ ငွေလိမ်ဂိုဏ်းတွေဟာ မြန်မာနိုင်ငံရဲ့ အစိုးရ အဆက်ဆက်က ကျင့်သုံးခဲ့တဲ့ စနစ်ဆိုးတွေနဲ့ အဂတိလိုက်စားမှုတွေကနေ အမြစ်တွယ်ပေါက် ဖွားလာတာဖြစ်ပြီး အစိုးရအဆက်ဆက်ရဲ့ အဂတိလိုက်စားမှု၊ တာဝန်ယူမှု၊ တာဝန်ခံမှုမရှိခြင်းနဲ့ တရားဥပဒေစိုးမိုးမှု မရှိခြင်းတို့ကြောင့် ဖြစ်တယ်လို့ ထုတ်ပြန်ချက်မှာ ပါရှိပါတယ်။
ဒါ့အပြင် စစ်ကောင်စီဟာ ငွေလိမ်ဂိုဏ်းတွေနဲ့ ပတ်သက်တဲ့ တရားမဝင် ကာစီနိုလောင်းကစား လုပ်ငန်းတွေကို တိုက်ရိုက်အကျိုးခံစားခွင့် ရရှိနေခြင်းကြောင့် နောက်ကွယ်ကနေ အကာအကွယ် ပေးတာ၊ ထောက်ခံနေတာတွေ ပြုလုပ်နေတယ်လို့ KNU က ဆိုထားပါတယ်။
ကရင်ပြည်နယ်အတွင်းရှိ ပြည်သူတွေကိုသာမက ပါဝင်ပတ်သက်နေသူတွေအားလုံးအတွက် လူမှုဒုက္ခမျိုးစုံနဲ့ ဒေသတွင်း မတည်ငြိမ်မှုအပြင် ကမ္ဘာ့နိုင်ငံတွေရဲ့ ငွေကြေးဆိုင်ရာ လုံခြုံနေရးနဲ့ စီးပွားရေးဆိုင်ရာ တည်ငြိမ်မှုကိုပါ ခြိမ်းခြောက်နေတယ်လို့ KNU က ထုတ်ပြန်မှာ ဖော်ပြပါရှိပါ တယ်။
ကရင်အမျိုးသားအစည်းအရုံး KNU ဟာ ငွေလိမ်ဂိုဏ်းတွေနဲ့ တရားမဝင် ကာစီနိုလောင်း ကစားလုပ်ငန်းတွေကို အကြွင်းမဲ့ဆန့်ကျင်ပြီး တိုက်ဖျက်သွားမှာဖြစ်သလို ဒီလုပ်ငန်းတွေ ရှင်းလင်းသန့်စင်မယ့် အိမ်နီးနားချင်းနိုင်ငံတွေ၊ နိုင်ငံတကာအဖွဲ့အစည်းတွေနဲ့ ပူးပေါင်း ဆောင်ရွက်သွားမယ်လို့ ထုတ်ပြန်ချက်အရ သိရပါတယ်။
သတင်း – သံလွင်တိုင်းမ်
ဓာတ်ပုံ – KNU