မော်လမြိုင်၊ ဖေဖော်ဝါရီ ၃
မြေပြင်စစ်ပွဲတွေမှာ ရှုံးနိမ့်မှုတွေများလာတာကြောင့် စစ်ကောင်စီတပ်ကနေ ဘက်ပြောင်းသူတွေ ပိုများလာနိုင်ပြီး အဲဒီထဲမှာ ရာထူးအမြင့်ပိုင်းတွေလည်း ပါဝင်လာနိုင်တယ်လို့ CDM အသိုင်းအဝိုင်းက ပြောပါတယ်။
စစ်တပ်အာဏာသိမ်းတဲ့ သုံးနှစ်တာကာလအတွင်း စစ်ကောင်စီတပ်ဟာ နယ်မြေအများစုကို လက် လွှတ်ထားရပြီး စစ်ရေးအရ အရေးနိမ့်နေတာတွေကို တပ်တွင်းတပ်ပြင် မဖုံးနိုင်မဖိနိုင် အခြေအနေနဲ့ ရင်ဆိုင်နေရတာပါ။
ညီနောင်မဟာမိတ် ၃ ဖွဲ့ဖော်ဆောင်နေတဲ့ ၁၀၂၇ စစ်ဆင်ရေးနောက်ပိုင်း စစ်ကောင်စီတပ်ထဲက ရာ ထူးအကြီးပိုင်းတချို့ ဘက်ပြောင်းလာဖို့ စုံစမ်းတာနဲ့ ဆက်သွယ်လာတာတွေ ရှိတယ်လို့ CDM အ ရေးကူညီပေးနေတဲ့ အဖွဲ့တွေထံက သိရပါတယ်။
စစ်ကောင်စီတပ်သားတွေ ဘက်ပြောင်းနိုင်ရေး ကူညီပေးနေတဲ့ ဗိုလ်ကြီးဟောင်းနေမျိုးဇင်ကတော့ တပ်အရာရှိအကြီးပိုင်းတချို့ ဘက်ပြောင်းဖို့ တိုက်ရိုက်ချိတ်ဆက်တာတွေ ရှိလာတယ်လို့ သံလွင်တိုင်းမ်ကို ပြောပါတယ်။
“အမြင့်ဆုံးကတော့ အခုကျွန်တော်နဲ့ချိတ်ဆက်ပြီး အပြင်ထွက်လာတာကတော့ ဒုဗိုလ်မှူးကြီးအဆင့်က အနိမ့်ဆုံးပါပဲ။ ဗိုလ်မှူးကြီးနဲ့ ဗိုလ်မှူးချုပ်အဆင့်ကတော့ စကားပြောတာပဲရှိသေးတယ်။ သူတို့ကိုတော့ ဆွဲထုတ်ဖို့ အဆင်မပြေသေးဘူး။ ဒါပေမယ့် သူတို့နဲ့ ကျွန်တော် ဆက်တိုက်ညှိနှိုင်းထားတာတွေရှိနေပြီ”လို့ သူက ဆိုပါ တယ်။
ဗိုလ်ကြီးဟောင်း နေမျိုးဇင်ဟာ ကရင်နီပြည်နယ်ကြားကာလအုပ်ချုပ်ရေးကောင်စီ IEC ရဲ့ စစ်ကောင်စီတပ်သားတွေ ဘက်ပြောင်းရေးအစီအမံ စီမံကြီးကြပ်ရေးကော်မတီမှာ ညွှန်ကြားရေးမှူးအဖြစ် တာဝန်ထမ်းဆောင်နေတာပါ။
စစ်ကောင်စီတပ်ရဲ့ တပ်တွင်းဖိနှိပ်ခံရမှုတွေနဲ့ အကျပ်အတည်းတွေကြောင့် လာမယ့်ကာလတွေမှာလည်း ဘက်ပြောင်းသူတွေ ပိုမိုများပြားနိုင်တယ်လို့ လေ့လာသူတွေနဲ့ CDM အသိုင်းအဝိုင်းက သုံး သပ်ပါတယ်။
NUG လက်အောက်ခံ CDM ကူညီရေးအဖွဲ့တစ်ခုဖြစ်တဲ့ မေမေ့ရင်ခွင်အဖွဲ့တာဝန်ရှိသူတစ်ဦးက တော့ စစ်သားတွေကို ခရီးမထွက်နိုင်အောင် ပိုမိုတင်းကျပ်ထားသလို တချို့တပ်တွေမှာ ဖုန်းသုံးတာကိုပါ ကန့်သတ်လာတယ်လို့ သံလွင်တိုင်းမ်ကို ပြောပါတယ်။
“အဓိကကတော့ စစ်ရေးဖိအားပေါ့နော်၊ စစ်ရေးဖိအားများလာတွေရှိတယ်။ မင်းအောင်လှိုင်ကလည်း သူ့ရဲ့ ရပ်တည်ရေးအတွက် အောက်ခြေကိုမကြည့်ဘဲ အတင်းထိုးကျွေးနေတဲ့ ကိစ္စမျိုးတွေရှိတယ်။ နောက်တခုက လေကြောင်းပစ်ကူတောင်းတယ်။ တောင်းတဲ့အခါမျိုးမှာ ပေးတာတွေပေါ့ဗျာ။ တခါတလေကျရင်လည်း လေကြောင်းပစ်ကူက ကိုယ့်လူတွေအပေါ်ကို ကြဲချတဲ့အခြေအနေတွေနဲ့ သူတို့ရင်ဆိုင်နေရတယ်”လို့ သူက ဆိုပါတယ်။
ဒါ့အပြင် ရှေ့တန်းတပ်စခန်းတွေမှာလည်း တော်လှန်ရေးတပ်တွေရဲ့ ဒရုန်းရန်ကြောက်နေရတဲ့အ တွက် ဂျန်မာတွေတပ်ထားတာကြောင့် ဆက်သွယ်ရေးလိုင်းအခက်အခဲတွေဖြစ်နေပြီး သတင်းအ ချက်အလက်အမှန်သိရဖို့ CDM ဝင်ဖို့ ဆက်သွယ်ရာမှာ အခက်အခဲတွေရှိနေတယ်လို့ သိရပါတယ်။
လက်ရှိမှာတော့ စစ်ကောင်စီတပ်ရဲ့ထောက်တိုင် ဗိုလ်မှူးနဲ့ ဗိုလ်ကြီးအဆင့်တွေဟာ CDM လုပ်ခွင့်ရဖို့ သက်ဆိုင်ရာအဖွဲ့အစည်းတွေနဲ့ဆက်သွယ်လာကြသလို ပြီးခဲ့တဲ့ ရက်အပတ်ကလည်း ဗိုလ်မှူးတစ်ဦးဟာ မေမေ့ရင်ခွင်အဖွဲ့နဲ့ချိတ်ဆက်ပြီး လွတ်မြောက်နယ်မြေကို အောင်မြင်စွာဘက်ပြောင်းလာနိုင်ခဲ့တယ်လို့ သိရပါတယ်။
တော်လှန်ရေးအစိုးရနဲ့ အဖွဲ့အစည်းတော်တော်များများဟာ စစ်ကောင်စီတပ်က အရာရှိတွေအပါ အဝင် တပ်သားတွေ ဘက်ပြောင်းနိုင်ရေး ကူညီပေးနေကြသလို ထိုင်းနိုင်ငံဘက်ခြမ်းမှာလည်း အ ရေးပေါ်နေထိုင်ဖို့ နေစရာတွေစီစဉ်ပေးကာ လစဉ်ထောက်ပံ့ငွေကို မိသားစုဝင်တွေကိုပါ ပေးအပ်နေတာဖြစ်ပါတယ်။
စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ နိုင်ငံဝန်ထမ်းတွေနဲ့ လုံခြုံရေးဝန်ထမ်းတွေကို ဘက်ပြောင်းလာအောင် အသည်းအသန်စည်းရုံးခြိမ်းခြောက်တာတွေ တွေ့နေရတယ်လို့ စစ်တပ်ထိန်းချုပ်ထားတဲ့ နိုင်ငံပိုင်မီဒီယာတွေကတဆင့် တုံ့ပြန်ထားပါတယ်။
မြန်မာနိုင်ငံမှာ စစ်တပ်အာဏာသိမ်းပြီးနောက်ပိုင်း စစ်သားနဲ့ရဲ စုစုပေါင်း ၂၀၀၀၀ နီးပါးအထိ အ လင်းဝင်လာတာရှိတယ်လို့ အမျိုးသားညီညွတ်ရေးအစိုးရ NUG ရဲ့ အချက်အလက်တွေအရ သိရပါတယ်။
သတင်း – သံလွင်တိုင်းမ်
ဓာတ်ပုံ-MOI