ထီးလင်း၊ စက်တင်ဘာ (၂၀)
မကွေးတိုင်းဒေသကြီး၊ ထီးလင်းမြို့နယ်ထဲ စစ်ကြောင်းထိုးလာတဲ့ အာဏာသိမ်း စစ်ကောင်စီတပ်က အရပ်သားပြည်သူ ၆ ဦးထက်မနည်းကို လူသားဒိုင်းကာအဖြစ် ဖမ်းဆီးခေါ်ဆောင်သွားတယ်လို့ ဒေသခံတွေက သံလွင်တိုင်မ်းကို ပြောပါတယ်။
စစ်ကြောင်းထိုးလာတဲ့ စစ်ကောင်စီတပ်ဟာ ပြီးခဲ့တဲ့ စက်တင်ဘာ ၁၈ ရက်နေ့မှာ ဂန့်ဂေါမြို့နယ် ခေါင်းတုံရွာက ဒေသခံ ၂ ဦး ၊ ညောင်လယ်ကျေးရွာက ဒေသခံ ၄ ဦး၊ စုစုပေါင်း ၆ ဦးကို ထီးလင်းမြို့နယ် အညာတောကျေးရွာသို့ လူသားဒိုင်းကာအဖြစ် ဖမ်းဆီး ခေါ်ဆောင်လာတာ ဖြစ်ပါတယ်။
စစ်ကောင်စီတပ်ဖွဲ့ဝင်တွေ ဖမ်းဆီးပြီး လူသားဒိုင်းကာပြုလုပ်လာတဲ့ ပြည်သူ(၆) ဦးမှာ ညောင်လယ်ရွာသားတွေဖြစ်တဲ့ ကိုမောင်မြင့်၊ကိုမောင်မောင်လှိုင်နဲ့ ကိုဖိုးသားတို့(၃) ဦးကိုသာ အတည်ပြုနိုင်သေးပြီး ကျန်တဲ့သူတွေကိုတော့ လက်ရှိအချိန်ထိအတည်ပြုလို့မရသေးပါဘူး။
လက်ရှိမှာတော့ စစ်ကောင်စီတပ် လူသားဒိုင်းကာအဖြစ် ဖမ်းဆီးထားတဲ့ ဒေသခံပြည်သူတွေကို ပြန်လွှတ်ပေးတာ မရှိသေးပါဘူး။
စစ်ကောင်စီတပ်ဟာ ပြီးခဲ့တဲ့ စက်တင်ဘာ (၁၆) ရက်နေ့ကလည်း ဂန့်ဂေါမြို့နယ်တောင်ပိုင်း မြေနီကျေးရွာသား(၄)ဦး ကိုဖမ်းဆီးခေါ်ဆောင်သွားပြီး စစ်လက်နက်ပစ္စည်းတွေ သယ်ယူခိုင်းပြီးနောက် စက်တင်ဘာ ၁၈ ရက်နေ့မှာ ပြန်လွှတ်ပေးခဲ့တာပါ။
ချင်း- မကွေးနယ်စပ်တစ်လျှောက်မှာရှိတဲ့ ထီးလင်း၊ဂန့်ဂေါနဲ့ယောဒေသတွေမှာတော့ စစ်ကောင်စီတပ်နဲ့ ဒေသကာကွယ်ရေးတပ်တို့ကြား ထိတွေ့တိုက်ပွဲတွေ ဆက်လက် ဖြစ်ပွားနေပြီး အဲဒီတိုက်ပွဲအတွင်း စစ်ကောင်စီတပ်ဟာ ဒေသခံ နေအိမ်တွေကို မီးရှို့ဖျက်ဆီးတာ၊ ဒေသခံတွေကို ဖမ်းဆီးသတ်ဖြတ်တာတွေ ဆက်တိုက်လုပ်ဆောင်နေတာပါ။
သတင်း – သံလွင်တိုင်းမ်