ဘီးလင်း ၊ သြဂုတ် (၂၅)
မွန်ပြည်နယ်၊ ဘီးလင်းမြို့၊ ဆရာစံရပ်ကွက်ရှိ စစ်ကောင်စီ ဘီးလင်းမြို့မရဲစခန်းဟာ သြဂုတ် ၂၅ ရက်နေ့ မနက် ၉ နာရီလောက်မှာ ဒရုန်းနဲ့ တိုက်ခိုက်ခံခဲ့ရတယ်လို့ ဒေသခံတွေက သံလွင်တိုင်းမ်ကို ပြောပါတယ်။
အဲဒီမြို့မရဲစခန်းကို အမည်မသိအဖွဲ့တစ်ခုက ဒရုန်းနဲ့ လာရောက် တိုက်ခိုက်ခဲ့တာ ဖြစ်ပါတယ်။ ဒရုန်းနဲ့ တိုက်ခိုက်ခံရတာကြောင့် ရဲစခန်းအတွင်း ပေါက်ကွဲမှု ဖြစ်ပေါ်ခဲ့တာပါ။
အဲဒီနောက်မှာတော့ ရဲတပ်ဖွဲ့ဝင်တွေက ဒရုန်းလာရာ လမ်းကြောင်းကို သေနတ်ပစ်ခတ်တာတွေ လုပ်ဆောင်ခဲ့ပါတယ်။
ဒေသခံ တစ်ဦးကတော့“ရဲစခန်းအတွင်း ပေါက်ကွဲမှုသံကြားပြီး ခဏအကြာမှာပဲ သေနတ်တွေ ထွက်လာတယ်၊ ပြီးတော့ လူနာတင်ကားတစ်စီး ရဲစခန်းထဲ ဝင်သွားတယ်၊ ထိခိုက်မှု ရှိတယ် ထင်တယ်”လို့ ပြောပါတယ်။
ဘီးလင်းမြို့မရဲစခန်း တိုက်ခိုက်ခံရတဲ့ ဖြစ်စဉ်အတွင်း စစ်ကောင်စီ ရံတပ်ဖွဲ့ဝင်တွေ ထိခိုက်ဒဏ်ရာရမှု ရှိ မရှိဆိုတဲ့ အခြေအနေ အသေးစိတ်ကိုတော့ သံလွင်တိုင်းမ်အနေနနဲ့ အတည်ပြုနိုင်ခြင်း မရှိသေးပါဘူး။
စစ်ကောင်စီ လော်ဘီ တယ်လီဂရမ်ချန်နယ်တွေမှာတော့ မြို့မရဲစခန်း ဒရုန်းနဲ့တိုက်ခိုက်ခံရတဲ့ ဖြစ်စဉ်အတွင်း ရဲတပ်ဖွဲ့ဝင်တွေ ထိခိုက်ဒဏ်ရာရတာ မရှိဘူးလို့ ရေးသားနေကြပါတယ်။
ပြီးခဲ့တဲ့ မေလ ၁၃ ရက်နေ့တုန်းကလည်း ဘီးလင်းမြို့မရဲစခန်း ဒရုန်းနဲ့ လာရောက် တိုက်ခိုက်ခံခဲ့ရတာ ဖြစ်ပြီး အဲဒီတိုက်ခိုက်မှုမှာတော့ ဗုံးသီးဟာ ရဲစခန်းရှေ့ လမ်းပေါ်မှာ ကျရောက်ပေါက်ကွဲခဲ့တဲ့အတွက် လူထိခိုက်တာ မရှိဘူးလို့ သိရပါတယ်။
သတင်း – သံလွင်တိုင်းမ်