သထုံခရိုင်၊ စက်တင်ဘာ ၃၀
စစ်တပ်အာဏာသိမ်းပြီးနောက်ပိုင်း မြင့်တက်လာတဲ့ ကုန်ဈေးနှုန်းတွေကြောင့် တပိုင်တနိုင် အသက်မွေးဝမ်းကြောင်း လုပ်နေသူတွေဟာ စီးပွားရေးကြပ်တည်းလာပြီး စားဝတ်နေရေး အခက်အခဲတွေကို ရင်ဆိုင်နေရပါတယ်။
သထုံခရိုင်အတွင်းက တပိုင်တနိုင်ငါးဖမ်းလုပ်ငန်း လုပ်ကိုင်သူတွေမှာလည်း စက်သုံးဆီဈေး မြင့်တက်လာနဲ့အတူ ဖမ်းမိတဲ့ငါးတွေကို ပြန်လည်ရောင်းချဖို့ ဈေးကွက်မရှိတာကြောင့် ဝမ်းဝရုံသာ လုပ်ကိုင်စားသောက်နေရတယ်လို့ ဆိုပါတယ်။
“ကိုဗစ်ဖြစ်ကတည်းက ငါးဈေးကမရ။ ခုက ဆီဈေးတွေတက်။ ငါးအထိမိကလည်း မကောင်းဆိုတော့ တနေ့တခြားဝင်ငွေ ပိုပိုနည်းလာတယ်။ ငါးတွေက ပြည်ပမထွက်တော့ ရလာတဲ့ ငါးတွေကိုလည်း ဒေသဈေးတွေမှာဘဲ ရောင်းနေရတော့ အကျိုးအမြတ်က သိပ်မရှိဘူး။ ငါးဒိုင်တွေကလည်း မဝယ်သလောက်ဘဲ။ ဒါပေမယ့်လည်း စားဝတ်နေရေးကရှိသေးတော့ ဒီတိုင်းထိုင်စားနေလို့ကလည်း မဖြစ်ဘူး။ အလုပ်လုပ်နေတာကမှ အကျိုးအမြတ်မရပေမယ့် စားနေရသေးတယ်။ အလုပ်ရပ်လိုက် ရမယ်ဆိုရင်တော့ ငတ်မှာဘဲ”လို့ ရေလုပ်သားတစ်ဦးက သံလွင်တိုင်းမ်ကို ပြောပါတယ်။
ဒါ့အပြင် ကျိုက်ထို စစ်တောင်းမြစ်ဝှမ်းတလျှောက်မှာ တရားမဝင် သံဇကာပိုက်တွေနဲ့ ငါးခိုးဖမ်းသူတွေမှာလည်း ယခင်ထက် နှစ်ဆနီးပါး မြင့်တက်လာတဲ့ ငါးသယံဇာ ပြုန်းတီးမှာကို ဒေသခံတွေက စိုးရိမ်နေကြပါတယ်။
“ကျိုက်ထိုဘက် စစ်တောင်းမြစ်ဝန်းကျင်မှာဆို တရားမဝင် သံဇကာပိုက်တွေနဲ့ စည်ကမ်းမဲ့ ငါးဖမ်းတာက အဆိုးဆုံးဘဲ။ အရင် မဲဆွယ်ကာလတုန်းကလည်း တရားမဝင်ငါးဖမ်းသူတွေက လွတ်လွတ်လပ်လပ် လုပ်ခွင့်ရခဲ့သလို ခုအချိန်မှာ ပိုတောင်ဆိုးလာနေသေးတယ်။ စည်းကမ်းမဲ့ ငါးဖမ်းတာက အချိန် ၂ နှစ်ကျော်လောက် လုပ်ခဲ့ကြတာဆိုတော့ ငါးသယံဇာတက ပိုရှားလာတယ်”လို့ ဒေသခံတစ်ဦးက ပြောပါတယ်။
စစ်တပ်အာဏာသိမ်းပြီးနောက် မြန်မာ့ငွေကြေးတန်ဖိုး ဆက်တိုက်ကျဆင်းလာတာနဲ့အတူ သွင်းအားစုကုန်ပစ္စည်းတန်ဖိုး ဆက်တိုက်မြင့်တက်လို့ အောက်ခြေလူတန်းစားတွေဟာ စားဝတ်နေရေး အခက်အခဲတွေကို ကြပ်တည်းစွာ ရင်ဆိုင်နေရပါတယ်။
သတင်း – သံလွင်တိုင်းမ်
