မော်လမြိုင် ၊ ဩဂုတ် (၅)
၂၀၂၀ အထွေထွေရွေးကောက်ပွဲကို မွန် ၊ ကရင် ၊ တနင်္သာရီ နဲ့ ရန်ကုန်တိုင်းအပြင် ပဲခူးတိုင်းမှာပါ ဝင်ရောက်ယှဉ်ပြိုင်သွားမယ်လို့ မွန်ညီညွတ်ရေးပါတီ ပြောရေးဆိုခွင့်ရှိသူ နိုင်စံတင်က ပြောပါတယ်။
မွန် ၊ ကရင် ၊ တနင်္သာရီတိုင်း ရေဖြူမြို့နယ် နဲ့ ရန်ကုန်တိုင်းက မဲဆန္ဒနယ်တွေမှာ ဝင်ရောက်ယှဉ်ပြိုင်မယ့် ကိုယ်စားလှယ်လောင်း (၆၂) ဦး အမည်စာရင်းကို ဇူလိုင်လ (၂၅)ရက်နေ့မှာ ပါတီက ကနဦး ထုတ်ပြန်ခဲ့ပါတယ်။
လက်ရှိမှာတော့ အဆိုပါ မဲဆန္ဒနယ်တွေအပြင် ပဲခူးတိုင်းနဲ့ တနင်္သာရီတိုင်း ကော့သောင်းမြို့မှာပါ ကိုယ်စားလှယ်လောင်း (၆) ဦး ဝင်ရောက် ယှဉ်ပြိုင်သွားမယ်လို့ ဆိုပါတယ်။
“ပဲခူးမှာ နှစ်ဦးပြိုင်မယ် ၊ ကော့သောင်းမှာလဲ လေးဦး ပြိုင်မယ် ။ အားလုံး တိုင်းနဲ့ပြည်နယ် ငါးခုမှာ ကိုယ်စားလှယ်လောင်း (၆၈) ဦး ပြိုင်မယ်”လို့ နိုင်စံတင်က ပြောပါတယ်။
မွန်အမျိုးသား ကိုယ်စားပြုအနေနဲ့ ပဲခူးတိုင်းဒေသကြီးကို ၁၉၉၀ ရွေးကောက်ပွဲမှာ ဝင်ရောက်ယှဉ်ပြိုင်ခဲ့ပေမယ့် ၂၀၁၀ ၊၂၀၁၅ အထွေထွေရွေးကောက်ပွဲမှာတော့ မွန်ပါတီတွေ မယှဉ်ပြိုင်ခဲ့ဘူးလို့ သိရပါတယ်။
ဒါ့အပြင် ၂၀၁၀ ၊ ၂၀၁၅ အထွေထွေရွေးကောက်ပွဲမှာ မယှဉ်ပြိုင်ခဲ့တဲ့ ရန်ကုန်တိုင်းဒေသကြီးက မဲဆန္ဒနယ်တွေမှာတော့ အခု ရွေးကောက်ပွဲမှာ ကိုယ်စားလှယ်လောင်း (၇) ဦး ဝင်ရောက် ယှဉ်ပြိုင်သွားမယ်လို့ ဆိုပါတယ်။
၂၀၂၀ အထွေထွေရွေးကောက်ပွဲမှာတော့ မွန်ညီညွတ်ရေးပါတီဟာ မွန် ၊ ကရင်၊ တနင်္သာရီ ၊ ပဲခူးတိုင်းနဲ့ရန်ကုန်တိုင်းတို့က မဲဆန္ဒနယ်တွေမှာ ကိုယ်စားလှယ်လောင်း (၆၈) ဦး ဝင်ရောက် ယှဉ်ပြိုင်သွားမှာ ဖြစ်ပါတယ်။
လက်ရှိမှာတော့ ကိုယ်စားလှယ်လောင်းအများစုဟာ ရွေးကောက်ပွဲကော်မရှင်ထံ လျှောက်လွှာတင်ထားပြီး ဖြစ်တယ်လို့ ဆိုပါတယ်။
ကိုယ်စားလှယ်လောင်းတွေကို ရွေးချယ်ရာမှာတော့ ဥပဒေပြုရေးဆိုင်ရာ ပညာရပ်တွေ အဆိုတင်သွင်းတဲ့ အသိပညာတွေ အပါအဝင် အခြား စံသတ်မှတ်ချက် (၁၉)ချက်နဲ့ ရွေးချယ်ခဲ့တယ်လို့ ဆိုပါတယ်။
သတင်း- သံလွင်တိုင်းမ်